1Aru bung numugu tan a labino bung na lotu na Wanlakai, ma a labino bung na lotu na beret ra kalako is uni, a kum lamlabino tene etabor torom o God, ma a kum tene ususer tagun a Warkurai det nuknuk sur tu ngas na kisapi sur det in pam ukai eno pas o Iesu, ma det in um doko i.
2Det watungi lena, “Gong dat pami una labino bung na lotu, sako a taro det in kankan ma det in ukatutur tu inaim.”
3O Iesu i kis tong o Betani, una rumu anun o Saimon, i ra numugu i misait nama lepra. Ra kura o Iesu i wangon, ara ino i wan toromi namin nokoto ra di pami nama wat. Tiro ubalan nin nokoto, a polo sangsangnain kura uni. Di watungi nama nad, ma a matano i ka doko. I sak kutus ru in kabaran nokoto, ra i lingisi unin lorin o Iesu.
4A ramano taro ra det kis tiro iai det kankan ma det wasiso etalai lena, “Sur asau ra di lingis orosi kut in nopolo sangsangnain ri?
5Ilai ra ka di siuru pasi sur lako tulu mar na denaria sur din tabor a kum sibo na taro nami?” Ma det wasiso na kankan torom a ino ra.
6Ra o Iesu i watungi tandet lena, “Mot in madek ru a ino ri. Ilai ra mot pitar a maut toromi? I sa pam tar a wakak na pinapam sakit un iau.
7A kum sibo na taro det in laun bolbolos tomo ut nam mot. Ma nangisin mot nem na pam a wakakino torom det, mot in pami kut. Ikut iau, kan kis tukum nisamot.
8A ino ri i sa pam sot pas a utna ra i elar sur in pami. I sa lingis tar in nopolo sangsangnain ri una pining, sur in waninar mugu iau sur a bung ra an mat ma din uruk a minating una kulam na minat.
9A inanos mot nama lingmulus, una kum tamon una rakrakon bual rop, ra din warawai nama Wakak na Wasiso iai, din inanos utkai un asau ra a ino ri i sa pam tari, sur a risano in tur na aim.”
10O Judas Iskariot, ara tagun a noino ma aru nat na ususer, i wan torom a kum lamlabino tene etabor torom o God, sur in pitar tar o Iesu ulamandet.
11Ra det longoro i, det gas, ma det uliliman tari sur det in kuli nam lako mani. Ra o Judas i nuknuk sur tu wakak na du bung ra in pitar tar o Iesu ulamandet.
12Una mugano bung una kum lamlabino bung na lotu na beret ra kalako is uni, ra di ser um doko a kum sipsip uni sur a labino bung na lotu na Wanlakai, a kum nat na ususer anun o Iesu det tingi lena, “U nemi sur met in nan urai, ma met in waninar andat a utna sur a labino bung na lotu na Wanlakai?”
13I tulu aru tagun anun a kum nat na ususer, ma i watungi tander lena, “Mur in nanpat sapat o Jerusalem. Ra mur sa wanpat, mur in etorom nam ara musano i los in labino koto na danim, ra mur in muri.
14Ra in ruk un tu rumu, mur in watungi tan a taman a rumu lena, ‘A Tene Ususer i watungi lena: Awai i a kukur rumu ra met nam anung a kum nat na ususer, met in nan a utna na Wanlakai iai?’
15Ma in ese tar mur una labino kukur rumu sapat netes, ra di sa waninar tari. Mur in waninar andat a utna tiro iai.”
16Aru nat na ususer der wanpat sapat o Jerusalem, ma der pastoromi ut a kum utna rop ra o Iesu i sa watung tari tander. Ra der waninar a utna na Wanlakai.
17Ra i sa lirop, o Iesu tomo nama nun a noino ma aru nat na ususer det wanpat.
18Det wangon ra i watungi lena, “A inanos mot nama lingmulus, ara tagun mot ri dat wangon tomo, in pitar tar iau ulaman a kum ebar.”
19Ra det tupunuk, det rop taktakai det tingi lena, “Awu sur iau, niko?”
20Ra o Iesu i balu det lena, “Ara tagun mot ut a noino ma aru, ra mir puk tomo amir aru du beret una dis.
21A Nutun a Musano in mat elar nami ra di sa tumus tari una Buk Tabu. Ikut in laulau sakit torom a musano ra in pitar tari torom a kum ebar. Gunuk ra ka din ususi, in wakak toromi, sako in taramo a dekdek na warkurai na minabalu.”
22Det wangon utmakai, ra o Iesu i los pas a beret, i watung wakak pas uni, i tibiki, ma i tabor anun a kum nat na ususer nami, ra i watungi lena, “Mot in rakoni, iri a pining.”
23Numur i los pas a kap, i watung wakak pas uni, ra i pitari tandet, ma det rop det inum taguni.
24Ra i watungi tandet lena, “Iri a gaping, a kunubus ra i dat tomo tar a taro nam o God. A gaping ri, i tilingis sur a susut na taro.
25A inanos mot nama lingmulus, kan inum meleti mo lako wain, tuk ra an inum a matok na wain una matanitu anun o God.”
26Ra det sa kele tar a kelekele na lotu, det wan tito usapat una Tangai na Oliw.
27O Iesu i watungi tandet lena, “Mot rop mot in nan pas kut gusun iau, uni di sa tumus tari una Buk Tabu lenri, O God i watungi lena, ‘An um a tene tamtamabat anun a kum sipsip, ra a kum sipsip det in kalabor susuaro.’
28Ikut, ra a sa katutur melet gusun a minat, an mugu utong o Galili.”
29O Pita i watungi tano lena, “Ra det rop det in nan pas gusun ui, ikut iau awu.”
30O Iesu i watungi tano lena, “A inanos ui nama lingmulus, miri umirum, a kereke ken manru utmakai u kurkurirakuk, ra un ipul a tulu dino lena, ko tasman iau.”
31Ra o Pita i wasiso dekdek toromi lena, “Kan ipul ru ui. Ra iau kai an iru tomo nam ui, i wakak kut.” Ma a kum nat na ususer rop kai det watungi lenutra.
32O Iesu tomo nam anun a kum nat na ususer det wanpat una nubual a risano o Getsemani, ra i watungi tandet lena, “Mot in kis kut nin, ma iau an wararing pas.”
33Ra i ben pasi kut o Pita, Jems ma o Jon ra detul wan tomo nami. Una du bung ut ra, i turpas a taramo a labino tupunuk ma i maut doko a nuknukino.
34I watungi tandetul lena, “Anung a nilaun i maut doko nama tupunuk, milau mo an mat nami. Motul in kis kut nin, ma motul in koikoi taru ut.”
35I wan lilik taru usa numugu, i puku na urur tiro una piso, ma i wararing sur a du bung na minat in nan sakiti, ra gunuk a nemnem anun o God.
36I wararing lena, “Tita, Tita, a kum utna rop i topas ui un pami, un los ru a kap na mamaut ri gusun iau. Ikut gong u mur anung a nemnem, un muri ut anum a nemnem.”
37I milet melet torom a tulu nat na ususer, ra i tama detul, detul sa inep dumun. I ting o Pita lena, “Saimon, pepetlai, u inep dumun kut? Kon pet lari sur un koikoi un tu du bunglik kut?
38Motul in koikoi, ma motul in wararing, sur gong motul puku una ululam. A niomotul i nemi, ikut a pinimotul i tungulu kut.”
39Ra i wan gusun detul, i wararing melet nama niaring ra i sa watung tari numugu.
40I milet melet, ra i tama detul, detul sa inep dumun melet, uni a matandetul i sa sunu doko. Ka detul tasman asau ra detul in balu i nami.
41Ra i mantulu milet torom detul, i watungi lena, “Pepetlai, motul in inep liklik mukut, ma motul in mana? Gong mo! A du bung i sa sot. Tama i, di sa pitar tar a Nutun a Musano ulaman a kum tene sakino.
42Motul katutur, dat na wan! Tama i, a musano ra in pitar tar iau ulaman a kum ebar, i sa wanpat.”
43Ra o Iesu i wasiso utmakai, o Judas, ara tagun a noino ma aru nat na ususer, i wanpat, det nama kunur na taro. Det los a kum totok na inaim, ma a kum nalnal. A kum lamlabino tene etabor torom o God ma a kum tene ususer tagun a Warkurai ma a kum mugumugu det tulu ru det.
44O naro ra in pitar tar o Iesu ulaman a kum ebar, i sa inanos mugu tar a kunur na taro una ukinalong ra in pami lenri, “O naro ra an gom a pangpagor na wano, i ut ra. Mot in pam ukai pasi, mot in ben gisen pasi ma mot in tamtamabati.”
45Uniutra o Judas i wan torom o Iesu ra i watungi lena, “Tene Ususer!” Ra i gom a pangpagor na wano.
46Ra a taro ra, det pam ukai o Iesu ma det dat pasi.
47Ara tagun det ra det tur milau, i dat pas anun in totok na inaim, ra i tau kutus ru in talngan a tultul anun a mugumugu na tene etabor torom o God.
48Ra o Iesu i watungi tandet lena, “Pepetlai, kutiro iau a tene inaim ma a tene wolong, sur i mo ri mot wanpat nama kum totok na inaim, ma a kum nalnal sur mot in pam ukai pas iau?
49Una kum bung rop dat ser kis tomo ubalan in noworo ina rumu na etabor, a ser ususer a taro, ma ka mot pam ukai iau. Ikut di pami lenri sur din pam sot pas a wasiso na Buk Tabu.”
50Numur a taro na ususer rop anun o Iesu det kalabor susuaro pas gusuni.
51Ma ara barman ra i ser mur o Iesu, i rakup pasi kut namin namalu. Det pam ukai pasi,
52ra i kalabor gusun anun in namalu, ma i mengere mukut.
53Det ben pas o Iesu torom a mugumugu na tene etabor torom o God. Ma a kum lamlabino tene etabor rop torom o God, a kum mugumugu, ma a kum tene ususer tagun a Warkurai det wanpat tomo tiro iai.
54O Pita i mur nanan o Iesu, ikut i bakbak ut gusuni. I ruk una nubual anun a mugumugu na tene etabor torom o God, ra i minor nisan a sungun tomo nama kum tene tamtamabat.
55A kum lamlabino tene etabor torom o God, tomo nama taro na kiwung rop det sisio sur tu sakino utna ra o Iesu i sa pam tari, sur det in takuni nami, ma det in um doko i uni, ikut ka det sio lar pas tu utna.
56A susut det watung a kum torotoro na wasiso un o Iesu, ikut anundet a kum wasiso ke takai.
57A ramano taro det tur ma det watung a kum torotoro na wasiso uni lena,
58“Met longoro i, i watungi lena, ‘An rege ru a rumu na etabor ri, ra a taro det pam tari, ma una tulu bung kut, an pam pas taio ra awu sur a taro det pami.’”
59Ikut anundet a kum wasiso kai ke takai.
60A mugumugu na tene etabor torom o God i tur taru numugu tandet ra i ting o Iesu lena, “Pepetlai, kon balu det? Asau ra un balu a kum wasiso na etakun ri nami?”
61Ikut o Iesu ke wasiso. A tene etabor ra, i ting meleti lena, “Ui a Karisito, a Nutun o God ra i dan tukum, o awu?”
62Ra o Iesu i watungi lena, “Iau ut ra. Ra numur mot in tama a Nutun a Musano in kis una papor sot na laman o God, i ra i dekdek sakit, ma mot in tama i ra in nanpat una kum du bakut tagisapat una langit.”
63A mugumugu na tene etabor i kankan ra i raros anun in namalu ut ma i iting lena, “Dat nem melet lako wasiso na etakun sur asau?
64Mot sa longoro tar anun a kum wasiso laulau un o God. Asau mot nuki?” Ra det rop det mulaot sur o Iesu in iru.
65Ara taro, det turpas a ibis o Iesu, det pulus bat pas arin matano, det tubuli ma det watungi tano lena, “Ui a poropet, un inanos met. Osi ra i tubul ui?” Ra a kum tene tamtamabat det ben pasi ma det umi.
66Ra o Pita i kis utmakai nago upiso una rumu ra, ara toraro, a tultul anun a mugumugu na tene etabor torom o God i wanpat.
67Ra i tama o Pita kura i minor, i nas dekdeki ra i lena, “Ui kai u ser wan tomo nam o Iesu a te Nasaret.”
68Ikut, i ipul lena, “Ka tasman asau ra u wasiso uni, ma ka talapor uni.” I wan utong nisan a matansako ina in noworo, ra a kereke i kurkurirakuk mut.
69A toraro i tama melet pasi, ra i inanos det ra det tur tiro iai lena, “A musano ri, i kai ara ut tagun det ri.”
70O Pita i ipul melet. Numur lilik tano, det ra det tur milau o Pita, det watungi tano lena, “A lingmulus ut ra ui kai ara tagun det, uni ui a te Galili.”
71Ra i liliman torom det lena, “Ra an toro, o God in warkurai dekdek iau. Ka tasman a musano ra mot wasiso uni.”
72Ra uniutra a kereke i manru mut u kurkurirakuk. O Pita i nuk pas a wasiso ra o Iesu i sa watung tari tano lena, “A kereke ken manru utmakai u kurkurirakuk, ra un ipul a tulu dino lena, ko tasman iau.” Ra i tangis sakit pas mut.
