1O Iesu i ususer det nama wasiso elelar lena, “Ara musano i marut tar a kinobot na wain, ra i pam bat tari namin noworo. Tiro ubalan a kinobot, i kil tar in nutung sur din pas reseng a wino wain uni, sur a polono in nanpat. Ma i pam tar a nat na rumu lekeleke sur a tene tamtamabat. Numur i pitar tar a kinobot munung tan a ramano kum tene pinapam sur det in tamtamabati, ra i wan sur ara tamon gisen.
2Ra a kalang i sa sot sur din git tomo a wino wain, i tulu ru ara tultul torom a taro na pinapam, sur lako kum kur wain tagun anun a kinobot sur anunu kai.
3Ikut a taro na pinapam ra, det pam ukai pasi ma det umi, ra det tulu oros melet ru i kut.
4Ra i tulu melet ara tultul torom det, det rapus in lorino, ma det ban umaimai tari.
5Ma a taman a kinobot i tulu i bulung ara tultul, ma det um doko i kut. Ra i tulu melet a susut, det um ara taro tagun det ma det um doko ara taro kai.
6Ara sot mukut i kis toromi, o nutunulik ut, a nat na wakak. I tulu ru i bulung torom det, uni i nuki lena det in urur uni.
7Ikut a taro na pinapam det wasiso tomo pas lena, ‘I ra in keles o tamano, i mo ra i wan urin. Mot iap, dat in um doko i, sur anundat mo a kinobot.’
8Ra det pam ukai pasi ma det um doko ru i, ra det sugut pirso ru i tagun a kinobot.
9“Asau mo a taman a kinobot na wain ra in pami? In nanpat ma in um doko ru a taro na pinapam, ma in pitar tar a kinobot ra torom lako taro gisen, sur det in tamtamabati.
10Pepetlai, ka mot luk a wasiso ri una Buk Tabu? I watungi lena, ‘A wat ra a kum tene pam rumu det lakro ru tari, i ut ra, i wanpat a wakak na wat ra i udekdek a rumu.
11A utna ri, a Labino ut i sa pam tari, ma i wakak sakit una numet a tamtama.’”
12A kum mugumugu anun a taro Juda det sisio sur tu kisapi sur det in pam ukai pas o Iesu, uni det tasmani ut lena i watung a wasiso elelar ri un det. Ikut det ngaran a kunur na taro. Ra det wan mut gusuni.
13Det tulu a kum Parisi, ma a kum paspasan o Erod torom o Iesu, sur det in lari sur tu wasiso ra in watung tari ra det in takuni nami.
14Ra det wanpat toromi, det watungi lena, “Tene Ususer, met tasmani lena ui a tokodos na musano. Ko nuknuk bing un asau ra a taro det watungi un ui, uni a magiram i takai kut torom a taro rop, ma u ser ususer det una kisapi anun o God nama lingmulus. Pepetlai, i tokodos sur din pitar a takis torom a Sisa o awu?
15Dat in pitari, o gong?” I tasman lele anundet a torotoro, ra i ting det, “Ilai ra mot nemi sur mot in lar iau? Tu mani urin sur an tama i.”
16Ra det pitar tar a mani tano. Ma i ting det lena, “In masarin osi ri, ma a tumtumus ri uni anun osi?” Ra det balu i lena, “Anun a Sisa.”
17O Iesu i watungi tandet lena, “Asau ra anun a Sisa, mot in pitari torom a Sisa. Ma asau ra anun o God, mot in pitari torom o God.” Ra det longoro i, det kisin doko.
18A kum Sadusi, ra det ser ipul kut lena katu nilaun melet gusun a minat, det wan torom o Iesu, ma det tingi lena,
19“Tene Ususer, o Moses i tumus tari tandat lena, ra tu musano in mat pas gusun anun a ino, ma katu nutunder, o tisinolik in ben pasi ra in nolin nami, sur in ulabo tar lako kum nat una risan o tisino ra i sa mat.
20Ara kabo tisino, a wonom mawit na musano det. A mugano i nolin, ra i mat pas gusun anun a ino, ma katu nutunder.
21Ra a murmur tano bulung i nolin nama ino ra. I bulung i mat kut gusuni, ma katu nutunder. I lenkutkai ra,
22a wonom mawit, det nolin pas nami. Ikut a ino ra, ke usus tar tu nat un det. Ra numur a ino bulung i mat.
23Una nilaun melet gusun a minat, a ino ra, anun osi na pasandet mo? Uni a wonom mawit rop, det sa nolin pas nami.”
24O Iesu i balu det lena, “Mot raro doko, uni ka mot tasman a Buk Tabu ma a dekdekin o God kai.
25Ra a taro det in katutur melet gusun a minat, ka det in nolin melet mo, det in elar mukut nama kum ensel sapat una langit.
26Ra mot ipul lena, a kum minat ka det in katutur melet gusun a minat, pepetlai, ka mot luki utmakai a Buk anun o Moses, ra i wasiso unin nanai ra i kunabor? O God i watungi torom o Moses lena, ‘Iau a God anun o Abaram, a God anun o Aisak ma a God anun o Jekop.’
27Mot raro doko. O God awu sur a God anun a kum minat, i a God anundet ra det laun.”
28Ara tagun a kum tene ususer tagun a Warkurai i wanpat torom o Iesu, ma i longoro i ra i wasiso tomo nama kum Sadusi. I longoro o Iesu ra i balu wakak det, ma i tingi lena, “Asi na warkurai ra i labo sakit taun det rop?”
29O Iesu i balu i lena, “Iri a warkurai ra i labo sakit, ‘Mot a taro Israel, mot in longoro i! A Labino anundat a God, i ara sot kut.
30Mot in nem a Labino anumot a God nama balamot rop, a niomot rop, a nuknuki mot rop, ma a dekdeki mot rop.’
31Ma a manru na warkurai i lenri, ‘Un nem o pasam elar nami ra u nem ui ut.’ Katu warkurai melet mo i labo tan aru warkurai ri.”
32A tene ususer tagun a Warkurai i watungi tan o Iesu lena, “A lingmulus ut, Tene Ususer! I tokodos anum a wasiso lena o God i ara sot kut, ma kataio melet mo.
33Dat in nem o God nama balandat rop, a nuknukin dat rop ma a dekdekin dat rop, ma dat in nem a kum paspasan dat elar nami ra dat nem dat ut. Ra dat in mur aru warkurai ri, i labo taun a kum etabor ma a kum etabor kai ra di tuntuni torom o God.”
34Ra o Iesu i tama i ra i wasiso na mananos, i watungi tano lena, “Ko bakbak mo gusun a matanitu anun o God.” Numur kataio melet mo i wan toromi nam tu iting, uni det ngara.
35Ra o Iesu i ususer det ubalan in noworo ina rumu na etabor, i watungi lena, “Ilai ra a kum tene ususer tagun a Warkurai det watungi lena, a Karisito i a nutun o Dewid?
36A Tokodos na Nion i mugu o Dewid ra i watungi lena, ‘A Labino i watungi torom anung a Labino lena, “Un kis una papor sot na lamang, tuk ra an winim pas anum a kum ebar sur det in kis utuntudu in anum a warkurai.” ’
37O Dewid ut i watung a Karisito lena, i anun a Labino. Ra i lenra, der tamano pepetlai?” A labino kunur na taro det gas doko ra det longoro a wasiso anun o Iesu.
38Ra i ususer det, i watungi lena, “Mot in tumarong mot gusun a kum tene ususer tagun a Warkurai. Det nemi sur det in nan tuptupukus nama kum wakak na ememar, ma det nemi kai sur a taro det in pitar a labino urur torom det una kum nubual na inawan tomo.
39Ma det nem a kinkinis sa numugu una kum rumu na lotu, ma a kinkinis na labino sa numugu una kum lukaro.
40Det ser urop a kum ululeng anun a kum ula, ma det ser pam a kum walalos na niaring sur a taro det in tama det. In labo doko a warkurai na minabalu anun o God torom det.”
41O Iesu i kis milau taru nisan a dino ra di ser woro mani uni, tiro na rumu na etabor. I tama a taro ra det woro anundet a kum mani. A susut na tene gongon kai, det woro a labino mani.
42Ikut, ara sibo na ula, i woro tar aru toia kut.
43Ra o Iesu i kabo pas anun a kum nat na ususer toromi, ma i watungi tandet lena, “A inanos mot nama lingmulus, a sibo na ula ri, i woro a labino mani taun det rop ra det woro anundet a kum mani.
44Det woro tari kut a sibano tagun anundet a kum mani, ikut a sibo na ula ri, i sa woro rop ru asau ra in topas anun a kinkinis.”
