Luku 2:32-46

³²Fǝtǝlɑ wei piitimnɑɑ kɑ́ nɑnɑ tɔ. Ɩnǝɣǝlɛ Ɩsɛɣɛlɩ nyǝ́mɑ teeli.

³³Ḿpʋ́ɣʋ́ piti kpɑ kɑ cɑɑ nɑ kɑ too nɑ nti ɩnɩ ɩ yɔɣɔtɑ kɑ tɔɔ kɛ́ mpʋ tɔ.

³⁴Ḿpʋ́ɣʋ́ Simiyɔŋ koolɑ-wɛɣɛ kʋpɑntʋ nɑ ɩ́ tɔ kɑ too Mɑlɩ sɩ: Pǝyɑɣɑ kɑnɛ kɑ nyǝntɛ ntɛ́ sɩ kɑ́ hu pɑɣɑlɛ nɑ kɑ́ kʋsɩ pɑɣɑlɛ kɛ Ɩsɛɣɛlɩ tɑɑ. Yǝlɑɑ pɑɣɑlɛ kɑ́ kpɛɛsǝnɑ mpi ɩ kɑ́ hʋ́lɩ́-wɛ tɔ.

³⁵Pɩɩ kuli pɑ pɑɣɑlɛ tɑɑ tɔmnɑɑ tɔɔ tǝkeelee. Lɑŋwɑkǝllɛ sɔsɔɔlɛ kɑ́ tʋlɩ toto nyɑɣɑ pʋ́ʋ́ɣʋ́ ɩsɩɩ lɑɣɑtɛ kɛ pɑ sɔpɑ-ŋ.

³⁶Ɩsɔ kʋyɔɣɔtʋtʋ tɛlǝsʋlʋ ɑlʋnyǝŋ nɔɣɔlʋ ɩ kɑ wɛ tǝnɑ tɔtɔ. Asɛɛ lʋlʋɣʋ tɑɑ tʋ Fɑnʋwɛlɩ pɛɛlɔ Anɑ. Ɩ kpɑtǝlɑ teu tǝkuŋkuŋku. Ɩ sɑɑʋ ɩ pɑɑlʋ tɔ, pɩɩsɩ nɑɑtosompɔɣɔlɑɣɑ kɛ pɑ cɑɣɑɑ ɩlɛnɑ ɩ́lɛ́ ɩ sɩ.

³⁷Nɑ ɩnɩ ɩ cɑɣɑ mpʋ hɑlǝnɑ pɩɩsɩ nɩɩnɑɑsɑ nɑ liɣiti. Ɩlɛ Ɩsɔ tǝsɛɛlɛ tɑɑ kɛ́ ɩ kɑ wɛ tɑm nɑ ɩ́ lɑkɩ Ɩsɔ tǝmlɛ kɛ ilim nɑ ɑhoo. Pɑɑ Ɩsɔ sǝlǝmʋɣʋ ɩ sǝlǝmǝɣɩ, pɑɑ nɔhɔkʋtʋ ɩ hɔkǝɣɩ.

³⁸Simiyɔŋ pɑ tɔŋnɑ ḿpʋ́ɣʋ́ lɑpʋ tɔɣɔ ɩnɩ ɩ kɔmɑ nɑ ɩ́ sʋʋ Ɩsɔ kɛ́ sɑm, nɑ ɩ́ yɔɣɔtǝɣǝnɑ pɑ tǝnɑ mpɑ pɑ tɑŋɑɑ sɩ Ɩsɔ ɩ́ wɑɑsɩ Yosɑlɛm tɔɣɔ Yesu tɔm.

³⁹Wɑɑtʋ wei pɑ tɛmɑ pǝ tǝnɑ mpi pɑ kɛɛsɑ Tɑcɑɑ kʋsǝsɩɩtʋ tɑɑ tɔɣɔ lɑpʋ tɔ, Yosɛɛfʋ nɑ Mɑlɩ pɑ mǝlɑ pɑ tɛ Nɑsɑlɛtɩ kɛ Kɑlilee.

⁴⁰Mpʋ tɔ nɑ pǝyɑɣɑ tɔŋnɑ pɩɩʋ nɑ kɑ tɔnʋɣʋ tɔkǝɣɩ nɑ kɑ́ tɔŋnɑ lɑɣɑtʋ nyǝm kɛ teu nɑ Ɩsɔ wɛ kɑ wɑɑlɩ.

⁴¹Pɑɑ pǝnɑɣɑ ŋkɑ Yesu nyǝ́mɑ pukɑɣɑ Yosɑlɛm kɛ Tɛɛʋ ɑcimɑ tɔɣɔʋ kɛ́.

⁴²Yesu lʋlʋɣʋ pǝnɑɣɑ nɑɑnʋwɑ nɑ nɑɑlɛ nyǝŋkɑ tɑɑ pɑ polɑ ɑcimɑ tɔtɔ ɩsɩɩ pɑ tɩɩ pukuɣu tɔ.

⁴³Acimɑ wɛɛ kɔmɑ nɑ ɑ tɛ ɩlɛnɑ ɩ nyǝ́mɑ tʋ mpɑɑʋ nɑ pɑ́ kpeŋ. Amɑ Yesu nɑ́ sɑɑlɑ Yosɑlɛm, nɑ ɩ nyǝ́mɑ tɑ nyɩ mpʋ.

⁴⁴Pɛlɛ pɑɑ hʋʋwɑ sɩ ntɑnyɩ ɩ wɛ tɔntɑɑ lɛlɑɑ tɑɑ, hɑlǝnɑ pɑ́ tɔ ilim nɑ pǝ tɛm ɩlɛnɑ pɑ́ sʋʋ-ɩ pɛɛkʋɣʋ kɛ pɑ lʋlʋɣʋ nyǝ́mɑ nɑ pɑ ɑsǝmɑɑ kiŋ.

⁴⁵Pɑ tɑ nɑ-ɩ, ɩlɛnɑ pɑ́ tɑɣɑnɩ Yosɑlɛm kɛ mǝlʋɣʋ sɩ pɑ pɛɛkǝɣɩ-ɩ.

⁴⁶Pǝ lɑpɑ kʋyɛɛŋ tooso ɩlɛnɑ pɑ́ nɑ-ɩ Ɩsɔ tǝsɛɛlɛ tɑɑ nɑ ɩ́ cɑɣɑ Yutɑ nyǝ́mɑ sɛɣɛsǝlɑɑ sɔsɑɑ kiŋ nɑ ɩ́ nɩɩkɩ pɑ sɛɣɛsʋɣʋ nɑ ɩ́ pɔɔsǝɣɩ-wɛɣɛ tɔmnɑɑ.