Lucas 2:32-46

³²Tudyatu israelita ama cuana Yusu eje buchique adebamerequique. Tunaja hueca buchique tume. Tuque equedya ecuana israelita cuanaque muitabuque. Tuque equedya ecuana micue cuanaque muitabuque,” jadyatu Simeón jucuare.

³³Joséra, Jesúsja ecuaquera jadya tatsejatu anajacata ishu acuare, Simeónra ebacua nana eje bucha judadiyaque quisarati ayaju bacatsu.

³⁴Simeónra tatse cuejacuare: —Yusura jida nenarucue. Metse tsehue pajuneni, —jadya tujatu ecatse acuare. Tuequedya tujatu María isaracuare: —Jetiama Israel eque ejuracana cuanaque tuna micue bacua queja catyatibuque. Tuna tuna dyaque jida jubuque. Peya israelita cuana bacue tuaqueja catyatibuque ama. Tuna tuna dyaque canerecatibuque. Dutyara jujerira tunajatu micue bacua bijidamadurabuque.

³⁵Jadya adebataetu jubuque peadya peadyara inime tupuyaque. Miquemi nerecada jubuque, micue bacua eje bucha judadiyaque baatsu. Cuchiru ebari micue enijuju tutsuhua buchami cabatibuque, —jadyatu Simeónra María acuare.

³⁶Tumebaedyatu tuhuadya jucuare epuna Ana bacani. Tuquetu Yusu equeque quisarati cuejaquique jucuare. Tuquetu jucuare Fanuelja ebacujunaque, Aser cuare juque. Anatu jucuare esiri. Ehue ebariquetu ahuequi jucuare. Tuja yahuique tsehuetu anicuare pacarucu mara piji camadya.

³⁷Tumepatyatu jucuare eahuemajuque quimisacarucu tunca pushi earacana mara. Cuinana baecuatu jucuare Yusuja etare juque. Huecada tupu, meta tupu jadya tujatu Yusu merecuare, Yusu tsehue quisarati, arama quibeti jadya juyaque.

³⁸Simeón María tsehue quisaratiya tsunumeetu Anara jipeticuare. Yusurupaitu acuare Yusu. Yusu yusurupai aatsutu quisaratitibunecuare tuhua cuana tsehue: —Riyaque ebacua nana ri Yusura Jerusalénju aniya cuanaque jida inimeju cuinanasha ishu cuadishahuaque. Riyaquedya ri micuanara ihuahuaque, —jadya tujatu ecana acuare.

³⁹Yusura Moisés eque dutya cuatsashahuaque atillatsu tuna dirunucacuare Galileaju, tunaja epu Nazaretju.

⁴⁰Ebacua nana bacue ariari juajecuare. Casada, quinimeti, bahue jadyatu juajecuare. Yusuratu jacacuare ama. Iyuhue tsehue tujatu narucuare.

⁴¹Josétu María tsehue cuau cuau jucuare Jerusalénju dutya mara Pascua chine ishu.

⁴²Jesús amena peadya tunca beta earacana mara juhuaju tatsejatu dujucuare Jerusalénju, Pascua chine ishu, tatseja tumepatya jadya bahue jucuare tibu.

⁴³Amena chine terehuajutu María, José ecatse dirunucacuare tatseja epuju. Tumetu Jesús anicuare Jerusalénju, ecuaque, José jadya baecuaque.

⁴⁴Tatseratu Jesús ecuita cuana ducu diruya cuana bucha datse bacuare. Ajecuare tuna peadya huecaca. Amena ijeti nubihuaju tatsejatu sarecuare tatseja ata cuana ducu, tatseja eadeba cuana tsehue jadya ediruuque.

⁴⁵Dadicuare ama tatsera. Yudijidya tatse cuanucacuare Jerusalénju, tuque sarera.

⁴⁶Quimisha huecaca juatsu tatse chamacama dadicuare Yusuja etareju, cacuatsashati bahuityaqui cuana tsehue juaniyaju, tura ecana bacadurabaretsu ijaca bacaaniyaju.