1Kena musuna butu esa lesini lima bei Kaisare Tiberiuse ipletare, kena mere Pontiuse Pilatuse iono gubernure me otoi Yudea, Herodese iono kamale me otoi Galilea, kwalini Pilipuse iono kamale me otoi Iturea kai otoi Trakonitise eleyo Lisaniase iono kamale me otoi Abilene.
2Kai kena musune mere Hanase kai Kayapase esi ono imame elake. Kena mere Tuhane Ibeteke Eni lepate ete Yohanese, Sakaria eni nanare ndete otoi nsekile.
3Hoko Yohanese ikeu me pusue ootoi me kwele Yordane keholi kena ibeteke Tuhane Eni lepate. Yohanese ibeteke be, “Imi naku kai hleke bei ono dosa noma kai suke baptise imi leke Tuhane Iampune imi.”
4Yohanese iono ele mere sakesa kai akmenare nabi Yesaya ilekie me eni bukure elere: “Tamata sae me ibeteke loko tamata bokala ndete otoi nsekile be, ‘Imi aknekae lalane ete Tuhane, ono Eni lalane ntoli.
5Ono pusue tamata esi aknekae lalesi leke hleke bei ono dosa kai leke esi hleke esi hidupe tiare.
6Leke pusue tamata esi selu be Tuhane Ihlamate tamata mei nusa meije elia.’ ”
7Eleki tamata bokala rebe esi luake leke Yohanese ibaptisesi meru, ibeteke lokosi be, “Imire tamata rebe lepa mise po imi hidupe mise mo. Imi luake lomei leke mula? Imi betinake supu baptise bei au pine imi supu hlamate bei hukumane o? Mo, imi supu hlamate bei Tuhane mo.
8Po imi aseluke kena imi hidupe ono misete pela petu leke tamata esi rekwa be imi naku imi neunaru peneka. Imi betinake imi rulu bei Abrahame hoko imi supu hukumane mo yake. Lene! Tuhane Eni kbasare ktili kena ono Abrahame eni anubua bei batua meiju.
9Imi nete mimise! Tuhane Iakneka kena Iono hukumane ete imia rebe naku imi dosaru mosare. Sakesa kai Tuhane Iakneka kena Ilasa aije roma mpe esi lamuitu pusulu. Sepo aije esi buai misete sae mo hoko Ilasae kai Ipoiele kena auwe.”
10Eleki tamata bokala meru esi tneuI be, “Hoko suke ami ono saisare?”
11Eleki Ibeteke lokosi be, “Sepo imi lapuna usai lua hoko riluke usai esa ete tamata rebe enie sae more. Kai sire pine eni manane lesi iriluke ete tamata rebe esi manane sae more.”
12Eleki ete mere tamata maka kotie bea esi luake leke Yohanese ibaptisesi lekwe. Hoko esi tneui be, “Kuru, suke ami ono saisare?”
13Eleki Yohanese iombe, “Imi kotie lesi bei saisa rebe suke esi selire yake.”
14Kai solaluaru esi tneui lekwe be, “Amire elia, suke ami ono saisare?” Yohanese iombe, “Imi rana tamata makete esi yelu palani yake, tutuke nsalale kai teta tamata makete kena rana eni kepene yake po imi hidupe kena imi gajire neka.”
15Eleki kena mere tamata bokala esi noake me lalesi be Yohanese mere Maka Hlamate rebe esi tatikeNi pibe mo.
16Eleki Yohanese ilepa loko tamata meru rame be, “Tatike pine Ile sae me Iluake, Eni kbasare lesi beiku. Au rue sakesa kaiNe saisa mo le Eni kbasare ektili titinai. Au baptise imi kena kwele, po Iono Ro Misete Ikbasae laleimu.
17Eleki sire pine ihlaleke lokoI hoko isupu misete po sire pine ihlaleke lokoI mo hoko isupu hukumane elake eti pela.”
18Yohanese ilepae hnauna maketa lekwe ete tamata bokala kena ilepae Sou Misete bei Tuhane leke esi hleke bei ono dosa.
19Po bei Yohanese ibeteke loko kamale Herodese be imise mo le ikai saui yo kwalini mata mosa kai eni neune makete lekwe
20hoko kamale mere iono neune rame kena ikusue Yohanese kena bui.
21Kena Yohanese ikusu bui mosare tamata bokala esi supu baptise bei Yohanese peneka, eleki Yohanese ibaptise Yesuse. Eleki kena Yesuse Ikotie loko Tuhane, lanite baeke,
22kai Ro Misete Irulu lokoI selu saka manu abune. Eleki Tuhane Ilepa loko Yesuse bei ndete lanite be, “Ale Auku Anae, Au nete lokoMu, laleKu ndina le Ale.”
23Kena Yesuse Ikerike menai loko Eni makerike, Eni musuna butu telu. Tamata esi noake be Eni amai kena Yusupe, Yusupe amai kena Eli,
24Eli amai kena Matate, Matate amai kena Lewi, Lewi amai kena Malki, Malki amai kena Yanai, Yanai amai kena Yusupe,
25Yusupe amai kena Matika, Matika amai kena Amose, Amose amai kena Nahume, Nahume amai kena Hesli, Hesli amai kena Nagai,
26Nagai amai kena Maate, Maate amai kena Matika, Matika amai kena Simei, Simei amai kena Yoseka, Yoseka amai kena Yoda,
27Yoda amai kena Yohanane, Yohanane amai kena Resa, Resa amai kena Serubabele, Serubabele amai kena Sealtiele, Sealtiele amai kena Neri,
28Neri amai kena Malki, Malki amai kena Adi, Adi amai kena Kosame, Kosame amai kena Elmadame, Elmadame amai kena Ere,
29Ere amai kena Yesua, Yesua amai kena Eliesere, Eliesere amai kena Yorime, Yorime amai kena Matata, Matata amai kena Lewi,
30Lewi amai kena Simeone, Simeone amai kena Yehuda, Yehuda amai kena Yusupe, Yusupe amai kena Yoname, Yoname amai kena Elyakime,
31Elyakime amai kena Melea, Melea amai kena Mina, Mina amai kena Matata, Matata amai kena Natane, Natane amai kena Dauta,
32Dauta amai kena Isai, Isai amai kena Obeta, Obeta amai kena Boase, Boase amai kena Salmone, Salmone amai kena Nahasone,
33Nahasone amai kena Aminadape, Aminadape amai kena Atmine, Atmine amai kena Arni, Arni amai kena Hesrone, Hesrone amai kena Perese, Perese amai kena Yehuda,
34Yehuda amai kena Yakupe, Yakupe amai kena Isake, Isake amai kena Abrahame, Abrahame amai kena Tera, Tera amai kena Nahore,
35Nahor amai kena Seruke, Seruke amai kena Rehu, Rehu amai kena Peleke, Peleke amai kena Ebere, Ebere amai kena Salmone,
36Salmone amai kena Kenane, Kenane amai kena Arpaksate, Arpaksate amai kena Seme, Seme amai kena Nu, Nu amai kena Lameke,
37Lameke amai kena Metusala, Metusala amai kena Henoke, Henoke amai kena Yarete, Yarete amai kena Mahalalele, Mahalalele amai kena Kenane
38Kenane amai kena Enose, Enose amai kena Seta, Seta amai kena Adame, Adame rebe Tuhane Itolaine.
