1Odocob Bred Jisca Qee Sab Jec deel gun, age Pasowa ein, eu dodoldon.
2Odocob ihanec dana benbenca loo je iwaladec danaca age dana cajacanu cucuiein. Eunu age Jisas qagadocnu jic oso walein.
3Odocob saen euna Seten uqa Judas, age Iskariot doloig, uqa waug dunuh len. Judas uqa malogom 12-pela agenadec oso.
4Odimei uqa ihanec dana benbenca, tempel cofdoc han danaca ageca len. Odimei uqa Jisas cel jicna age ebenegana migiannu age gami togodoin.
5Age eu dumeig wawaga ceeleceb age je gabandumeig meen qaig utecnu je cagoin.
6Judas meen qaig fimei eu agena jenu cois en. Odocobil Judas uqa dana cajaca qee cegulec saenna Jisas dewegnu ob mimei age ebenegana mudigiannu jic walen.
7Odocob Bred Jisca Qee Sab Jec deel gun cali hon. Deel euna Juda dana age sipsip nag Pasowa ja qocna joqagannu qagadoloig.
8Eu odinu Jisas uqa Pita Jonca odi maali sulalen, “Ale belimesi egena Pasowa ja qoc ege jecnu saciadosia.”
9Odocob ale jejeg hewi madosin, “Ele ana saciadocnu gale hena?” dosin.
10Odocob uqa jejenela hewi maalen, “Fesia, ale taun benna limesi dana oso halon waca gahidu humei jicna gulucaligian. Ale uqa toodu lesi jo uqa hamol ligian euna toodu lesia.
11Odimesi ale dana jo eu gug madosia, ‘Iwalgec maheia, “Jo hamol ija ijana malogom gami Pasowa ja qoc sab jecnu eu ai?” heia,’ dosia.
12Odocob hamol ben bahic ohis eu sab jec cabalca, bilec cabal ceteh cunugca ihacaligian. Ale Pasowa ja qoc sab jecnu euna saciadosia,” alen.
13Odocob ale belesin. Odimesi ale Jisas maalen odi bahic gulucdosin. Euna ale Pasowa ja qoc sab jecnu saciadosin.
14Odocob saen eu caleceb Jisas sab jec cabalna bilen. Odocob aposel ha lecebil uqa gami bilein.
15Odimei uqa maaden, “Ija maadigina, ija haun Pasowa ja qoc qee jec li hibna Anutna culna aig qoc saenna ihoc ligian. Eunu ija casac Pasowa ja qoc i age gami jimeb isi ija deweni dain tec gahidugen eunu hooligina,” aden.
17Odimei uqa gabin oso on. Anut hetaga doc je madumei maaden, “Ija maadigina, ija wain aignadec haun qee jec li Anutna cul ihoc ligian. Eunu age eu umeig age agedodoc cesawi jeiga,” aden.
19Odimei bred oso umei Anut hetaga dumei uqana malogom aadi maaden, “I ija deweni ganac eu ija agenu Anut utigina. Age ijanu cisdoqagannu odi odogina,” aden. Hibna eu ji hedumeig uqa wain gabin euha eu odi himec odimei maaden, “Wain gabin i eu Anutna bal cehec je haun eu ija golanina gabandocob agenu basecdugian,” aden.
21Odimei Jisas maaden, “Euqa feiga! Dana ija cad ebenegana mitigia odona eu uqa ijaca jec cabal ina biluwa.
22Mele bahic, Dana Melah uqa wele Anut jic maden odi toodugian eunu jic eu toodugian qa dana cad ebenegana mudigian uqa walocca biligian,” aden.
23Uqa odi maadeceb agedodoc sisildocobsisildocobimeig madein, “In uqa kobol odi odigian?” ein.
24Odocob malogom age gemona in uqa ben biligian eunu fee dadanein.
25Odocob Jisas maaden, “King maha ina bilegina age agena dana cajaca gagadic odoc ilo bilegina. Odocob age agena ilo dananu egena cesulgec egina.
26Euqa age odi cain odowain. Cain bahic. Dana age gemona ben bilina uqa dana milum bahic cinigwe biliale. Odocob agena ilo dana uqa cewel uadec odi cinigwe biliale.
27In uqa ben, acahna dana sab jecnu bilina uqafo, qee dana sab qumei ahutona uqafo? Eu dana sab jecnu bilina uqa himec. Euqa ija age gemona agena cewel uadec biliga,” aden.
28“Wele age ijaca biloloig temtec ceteh holoi eu qee culti qisactoloig.
29Odocob ija Mei cul osonu ilo miten. Eu odiwe age ijana culna ijana sab jec cabalna bibileig sab jejeig wa gab jejeig biluqagannu, odimeig bilec cabal ben kobolkobolcana bilimeig Isrel sihul 12-pela gesiladoqagannu ija ageha cul osonu ilo madigina,” aden.
31Odocob Tibud uqa Pita madon, “Saimon, Saimon! Dah maga! Seten uqa wit cabi oc dana wit me ganacca filiganalecnu fohidonawe odi age temadigiannu cois ec Anutna je wele oia.
32Euqa hinana wawin meleec qee toneiaunnu ija hinanu wele inonduga. Odocob saen ijaca falicdumeg hina cabi hijinel gagadic odoc adaga,” don.
33Odocob Pita jejeg hewi madon, “O Tibud, ija hinaca cal mecnuca, gihacdoc jona nuecnuca cois wele saciadoc biliga!” don.
34Odocob Jisas uqa Pita madon, “Pita, ija mahigina, witic ina mala manahal qee qoc ninijeb hina qee sasac ququ madegan, ‘Uqanu qee dugina,’ i cijeddogan,” don.
35Odimei Jisas uqana malogom sisiladen, “Saen age meen qaig tacecca, badomca, jaimaga tacecca qee suladem eu nuimeig cetehca qee coboinfo?” aden. Odocob age jejeg hewi madoin, “Ceteh osol osoca qee eu qee cobolom,” doin.
36Odocob Jisas maaden, “Euqa qila in oso uqa meen qaig taceccafo, badomcafo eufi cois ahewigian. Odocob oso uqa han siginca qeefi uqana lotoc ben suldumei oso fajigian.
37Eunu ija edi maadigina. Anutna jaqec je oso edi maden: ‘Age uqa loo je wooldoc dana osoben bibilegin meciadein,’ eu mele bahic ijaca hona. Ge, ijanu Anutna jaqec je tawena eu mele bahic ihoc lena,” aden.
38Odocob malogom age madoin, “O Tibud faga, han sigin lecis ihec,” doin. Odocob uqa maaden, “Eu ihoc!” aden.
39Odimei Jisas uqana kobol toodumei uqa cudun eu cuculdi Oliw Aluhna ten. Uqa gaid odoloi odi odocob uqana malogom hib toodocobil tein.
40Cudun euna ti calimeig uqa maaden, “Temadecna qee lowainnu inondoiga,” aden.
41Odimei uqa cuculadi dana oso meen qeleceb nui tonena eu odi timei gob cehimei Anut inondon.
42Odocob uqa madon, “O Mei, hina gabin i cawalitecnu cisdoc nijecebfi cawalitiga. Euqa ijana cisdoc cain toodogaun, hinana cisdoc toodoga,” don.
43Odocob ensel oso sao jobondec gagadic odoc utigiannu nen.
44Odocob Jisas deweg culumen doc tebandumei gagadic bahic Anut inondon. Odimei musul golac gagadic cinigwe mahana toocooi tonen.
45Uqa inondu hedumei caji uqana malogom ageca ceseli non. Odimei wawaga culumen adecna us ninijegin meciaden.
46Uqa maaden, “Age eetanu us nijegina? Cajimeig temadecna qee lowainnu inondoiga,” aden.
47Uqana malogom je maaaden dana am ben bahic tein. Dana aquneceb tein uqa ijan Judas uqa malogom 12-pela eundec oso. Uqa Jisas cotdugiannu cemenug ten.
48Euqa Jisas madon, “Judas, hina cotecna Dana Melah uqana cad amagana camasac mudugunafo?” don.
49Saen malogom Jisasca tawein eu age ceteh caligia oodon fimeig sisildoin, “Tibud, egena han siginna cois cadecnufo?” doin.
50Odocob malogom oso uqana han siginna ihanec dana ilona cabi dana qelimei dahig meulana isec caguton.
51Euqa Jisas maadimei, “Eu odi cain! Kobol eu culeiga!” adimei uqa qududocob dahig me muden.
52Odimei Jisas uqa ihanec dana benbenca, tempel cofdoc han danaca, Juda agena matuca age uqa hewoqaga lein eu maaden, “Eetanu age han siginca han galabca heje oc dana cinigwe hewoqagannu hoiga?
53Ija ageca tempelna gaidgaid bilolob. Odocob age saen euna ija hewitecnu oso qee odoloin. Euqa qila eu agena gagadic odoc saen. Eu tu uqana gagadic odoc gagadic bahic mena,” aden.
54Eu age Jisas hewimeig ihanec dana agena ilona jona ehi lein. Odocob Pita Jisas tabag hehewi tooaden.
55Jo eu gel dunuh ja hudein. Odocob Pita leceb leih ja cudun bilein gami bilein.
56Odocob cabi mel aid oso ono ja cudun bibilen fimei deei maden, “Dana i ha uqaca bilein!” en.
57Euqa Pita uqa qee sasac qu madon, “Caja, ija uqanu qee dugina!” don.
58Odocob saen nag gieceb dana oso fecidumei madon, “Hina agenadec oso!” don. Euqa Pita jejeg hewi madon, “Dana, ija qee iel!” don.
59Odocob aua osol odi hedocob dana oso gagadic bahic maden, “Dana i uqaha Galilidec. Eunu mele bahic, uqaca bilesin,” en.
60Euqa Pita jejeg hewi madon, “Dana, hina eetanu madagana eu ija qee dugina!” don. Saen uqa je mamaden bahic mala manahal qon.
61Odocob Tibud qaalimei Pita fen. Odocob Pita Tibud je madonnu cisdon, “Mala manahal qee qoc ninijeb hina qee sasac ququ ijanu qee dogona ec madi cijeddogan,” don.
62Odocob Pita jo eu cuculi cali limei ben bahic qajen.
63Odocob dana Jisas cofdu tawein eu age cih je madodoig ququein.
64Ameg qagimeig sisildoin, “Je hahun magaga doqa! Info qihia?” doin.
65Odimeig je qesaldoc geh bahic madoin.
66Walag daneceb Juda agena matuca, ihanec dana benbenca, dana loo je iwaladecca cegulein. Odocob Jisas eu agena gesilecnu tamanec euna ehudi ehi lein.
67Age madoin, “Hina Anutna Krais eu melefi magaga,” doin. Odocob uqa jejenega hewi maaden, “Ija maadeceminfi ijana jenu wawaga qee meleeiaun.
68Odocob ija je oso sisiladeceminfi age jejeni qee hewowain.
69Euqa qila nueceb hibna ha Dana Melah Anut gagadic odocca bahic eben meulana isec biligian,” aden.
70Eu age cunug madoin, “Hina mele bahic Anut Melah?” doin. Odocob uqa jejenega hewi maaden, “Age madegina eu odi,” aden.
71Odocob eu age madein, “Ege je dana i maden qasali magecnu dana leih qee cedoqaun. Egedodoc bahic uqa cona madeceb dah moqa!” ein.
