6Pə kəlɑ teu sɩ yʋlʋ ɩ́ wɛɛnɑ ŋkute kʋlʋmtəlɛ nɑ ɩ́ nɩɩkɩ leleŋ, nɑ mpi ɩ kɑ́ wɛɛnɑ ŋkulee nɑɑlɛ nɑ pə́ wɛ kɑtɛ tɔ.
7Mɑ nɑwɑ tɔtɔɣɔ kɑtɛ lɛntɛ kɛ tɛtʋ tɔɔ.
8Yʋlʋ wɛnnɑ ɩ tike təkoŋ, ɩ fɛɩnɑ ɑlʋ yɑɑ neu, yɑɑ pəyɑɣɑ, pəcɔ ɩ lɑkɩ təmlɛ ɩɩ nyəɣəsəɣɩ. Ɩ cɑɑ kɛ́ sɩ ɩ́ sɔɔsəɣɩ wɛnɑʋ kɛ́ tɑm. Pɑɑ nɑ mpʋ tɔ, nɑ ɩ́ pɔɔsəɣɩ ɩ təɣɩ tɑm sɩ: Awe tɔɔ kɛ́ mɑ wɩɩkɩ nɑ mɑ́ kisiɣi leleŋ nɩɩʋ. Yɑɑsi ɩnɩ ɩ kɛ́ ɩsɑɣɑʋ kɛ́ nɑ ɩ cɛkənɑʋ wɛ kɑtɛ.
9Pə kəlɑ teu sɩ yəlɑɑ nɑɑlɛ ɩ́ kɑɑ, nɑ mpi yʋlʋ kɑ wɛɛ ɩ tike tɔ. Mpi tɔ, pɑ wɑɑkɩ pɑ təmlɛ tɑɑ kɛ́.
10Pəyele pɑ tɑɑ wei ɩ́ tɩɩ hotɑɑ lɛlʋ kʋsɩ-ɩ. Amɑ wei ɩ wɛ ɩ tike tɔ ye ɩ hotɑɑ ɩɩ nɑɑkɩ kʋsʋlʋ.
11Ye yəlɑɑ nɑɑlɛ ɩ həntɑɑ, pə hɑŋəɣɩ-wɛɣɛ. Amɑ pə kɑɑ hɑŋ wei ɩ wɛ ɩ tike tɔ.
12Ye yʋlʋ wɛ ɩ tike ŋmɑkəllʋ ŋmɑkələɣɩ-ɩ kɛ́. Amɑ ye pɑ wɛ nɑɑlɛ ɩlɛ pɑ pəsɩ-ɩ. Ɩfɑtəlɛ ɩɩ cɛkɩ lɔŋ ɩsɩɩ ŋmənɑɣɑ mɑɣɑmɑɣɑ.
13Ɩfepu wei ɩ́ tɑ kɛ kɑsɑɣɑmpu nɑ ɩ́ wɛnɑ ləmɑɣɑsɛɛ tɔ ɩ lɑpɑ sɑnɑ nɑ wulɑʋ kʋkpɑtʋlʋ kʋmɛlɛŋ ŋku kʋ kisiɣi lɑɣɑtʋ tɑsʋɣʋ tɔ.
14Pɑɑ sɑləkɑ tɑɑ kɛ́ ɩfepu ɩnɩ ɩ lɩɩnɑɑ sɩ ɩ tɔkɩ kɑwulɑɣɑ, yɑɑ pɑ tɩɩ lʋlɑ-ɩ kʋnyɔntʋ kɛ kɑwulɑɣɑ tɑɑ,
15mɑ nɑɑkɩ sɩ ɩfepu wei ɩnɩ ɩ kɑ tɔɣɔ kɑwulɑɣɑ kɛ wulɑʋ ɩnɩ ɩ lonte tɑɑ tɔ yəlɑɑ tənɑ kɑ́ wɛɛ ɩ wɑɑlɩ kɛ́.
16Yəlɑɑ tuutuumɑ kɑ wɛɛ ɩ wɑɑlɩ kɛ́, pɑɑ nɑ mpʋ pɛlɛ pɑ wɑɑlɩ nyə́mɑ lɑŋɑ kɑɑ hʋlʋmənɑ-ɩ. Mpi tɔ, pəlɛ pə wɛ kɑtɛ tɔtɔɣɔ ɩsɩɩ yʋlʋ lʋkʋɣʋ sɩ ɩ́ tiiki heelim tɔ.
Ləmɑɣɑsɛɛ tʋ 4
Ləmɑɣɑsɛɛ tʋ 4:6-16