Text copied!
CopyCompare
Kâte Bible - Sâcmutâc Hâsine

Sâcmutâc Hâsine 10

Help us?
Click on verse(s) to share them!
1“Dameŋ ira Wofuŋzi dâŋ kecʒiŋuc nazawec: ‘Qorac tapa jajahec mârâc fasaec‐jofakicne iŋucne mocwâc fasaec‐jofarâ tikio norao bawefuzemec, erâ jâczi katapa wâc bazemec.
2Eme qorac tapa qanʒaŋnemeŋ irec fainao dâŋqâreŋ fowec ijaha qâreŋkepe katapa maŋko râetec huzejec.’
3Iŋuc nazame jâmiŋjâczi katapa bapo, erâ qorac tapa jajahec mârâc fasaec‐jofakicne iŋucne mocwâc fasaec‐jofarâ tikio bacjofarâ fepo.
4Eme ŋoŋe tumaŋnehapie Wofuŋzi tikio ʒocbâruŋ maŋko juhuc Sâcmutâc Sanaŋ Teŋ ŋazawec i mârâc qâreŋkekicne irec sâc jaha qorac tapao qâreŋkerâ narewec.
5Nareme forisierâ tikionec waharâ qorac tapa i Wofuŋzi mutâcne‐narewec irec sâc ehuc katapa bapo irec maŋnao râepe hurâ fowec fokac jaha.”
6Eme Israe ŋicguru jaŋe Beroti‐Bene‐Jakaŋ teuŋkonec faharerâ raku Mosera haeo fisimbiŋ. Eme Aroŋ e ira hâcne hâmome duckembiŋ, ehame ŋokâ‐ticne Eleaʒa e tucticne qarâ taha bapa juwec.
7Eme jaŋe irecnec ʒuhuckerâ raku Gudogoda haeo fisirâ fombiŋ. Erâ irecnec raku Jotibata hae mâreŋko fisimbiŋ. Hae mâreŋ ira opâ wiac bocjaha forawec.
8Eme Wofuŋ e dameŋ ira Lewiŋic jaŋe ʒâʒâfic katapa‐ticne reŋkerâ ere maio kiŋaŋ gie bahuc ŋic Wofuŋte ʒâŋeo ʒuhuc‐joparâ jambuŋ‐jopaniŋte rowosâec‐jopawec. Eme jaŋe gie i hâcne bambiŋzi bahuc juŋgopieŋ jaha.
9Eme irec hâcne Lewiŋic jaŋe qomâfâc‐jeŋic jaŋerao ʒuhuckerâ mâreŋ wiac ro rauc mi eniŋmu. Wofuŋ Anutu‐ŋeŋiczi jazawec irec sâc rujeŋic erâ juhuc hone bafic ejareocmu.
10Mosezi ʒiŋuc ʒuhuckerâ muwec: “Eme no mârâc epo iŋuc jaha ehuc tikio juhape ŋafe ʒoaŋ 40 tarawec, ehame dameŋ ira Wofuŋ numucnepe mana‐narewec wâc; ehuc sipiric‐ŋopaocte boc mi afeckewec.
11Wofuŋ e iŋuc erâ ʒiŋuc nazawec: ‘Ajoc, go faharerâ ŋic micne bajaretec hata ʒuhuckerâ raku mamacfâc‐jeŋic mâreŋ mupaŋke‐jarepo ira fisirâ ro rauc enʒepieŋ.’
12“O Israe ŋicbureŋ, Wofuŋ Anutu‐ŋeŋic e wiac kecʒiŋuc jaha eniŋte ŋaza mutâc ekac: Ŋoŋe Wofuŋ Anutu araŋ bacnehuc ere kike hata bâjâpenʒepieŋ, ehuc maŋŋeŋic erao râepie domaha maŋ qâqâtâc‐ŋeŋiczi kiŋaŋ qacnenʒepieŋ.
13Ehuc Wofuŋte sâcmutâc dâŋ â dâŋsanaŋ miŋecgac ŋaza mutâc ekopac i hâcne mana rereŋ ehuc juhâc qâhâmonʒepieŋ.
14Manaŋgopieŋ, sambâŋ â mâreŋ â irec maŋnao wiac fokac sasawa i Wofuŋte biŋe.
15Ehame sifu mamacfâc‐ŋeŋic maŋjauŋ ejarehuc ɋâricfâc‐jeŋic ŋoŋe ŋic gurune gurune jaŋeraonec rowosâec‐ŋopame ŋicfâc‐ticne erâ jumbiŋzi juŋgopieŋ jaha.
16Irec ŋoŋe maŋrâŋgeŋ‐ŋeŋic beherâ maŋuruc junʒepieŋ.
17Wofuŋ Anutu‐ŋeŋic e nemu jaŋere femicne â ŋicwofuŋ jaŋere Wofuŋ, e hâcne Anutu fekicne â tâpiri‐ticnehec â araŋ babacnehec, e ra rowec ware rowec mi focnekac â bâbâmiriŋ moneŋ wâc mi roekac.
18E hozec bekâ jaŋe roroŋ sasabec ejarehuc dâŋjeŋicte bafic‐jopaekac, ehuc ŋic jabane maŋjauŋ ejarehuc nânâ opâ â ŋaqi qoruc wiac jare tahac eekac.

19Irec ŋoŋe ŋic jabane maŋjauŋ jaha ejarenʒepieŋ; ŋoŋe hâcne Aigita mâreŋko jabane jumbiŋ wâc.
20Ŋoŋe Wofuŋ Anutu‐ŋeŋic araŋ bacnenʒepieŋ, ehuc kiŋaŋ qacnehuc erao qohotanʒepieŋ, erâ ere ʒâŋeo ɋetickehuc mumupaŋ dâŋŋeŋic mupaŋkenʒepieŋ.
21E hâcne mumuteŋ‐ŋeŋic â Anutu‐ŋeŋic, wiac hâhâwicne â bipic tataranehec ʒâŋe fâri‐ŋeŋiczi honembiŋ i eki hâcne mume fuawec.
22Mamacfâc‐ŋeŋic jaŋe ŋic ŋokac 70 sawazi Aigita mâreŋko humbiŋ, ʒi ine Wofuŋ Anutu‐ŋeŋiczi basawec‐ŋopame ŋic guru sâko jâmbâŋ embiŋ juŋgopieŋ.