Text copied!
CopyCompare
Buka Hope - Diutironomi

Diutironomi 10

Help us?
Click on verse(s) to share them!
1Meke zama mae koa rau se Zihova, ‘Mu taveti karua patu labelabe kekeṉoṉo gua puta sapu ta tavete kekenu, mamu tavetia tugo keke bokese huda pude mu vekoi si arini pa korapana, mamu ene sage mae pa toqere.
2Meke kaqu kuberi Rau gua sapu ele kuberi Rau tatasana koari na patu labelabe saripu ele va huara ineti goi, beto asa si kote voi i goi pa korapa bokese huda si arini.’
3Gua asa, ke tavete nia huda akesia rau si keke bokese, meke peqoi rau si karua patu kekeṉoṉo sapu kekenu meke paleke atuni rau pa toqere.
4Meke kuberi e Zihova koari na patu labelabe sari na zinama gua pu ta kubere kekenu, sapu sari ka manege puta tinarae saripu taraeni gamu Sa, sipu zama atu si Asa pa korapa nika koasa rane sapu varigara ia gamu pa toqere. Arini sari na patu labelabe saripu va mae i e Zihova koa rau.
5Meke kekere pule si rau meke taluarae gore pule koasa toqere. Meke vekoi rau si arini pa korapana sa Bokese Vinariva Egoi d sapu tavetia rau, gua tugo sapu garunu nau e Zihova, meke koa si arini vasina podalae koasa totoso asa,” gua se Mosese.
6Meke taluarae koari na berukehe tadi na tinoni pa Zakana sari na tie Izireli meke topue la pa Mosere. Meke vasina si mate meke ta pomunae se Eroni. Meke se Eleaza sapu sa tuna koreo si sogo hobea si asa koasa tinavete hiama.
7Meke taluarae si arini vasina meke la gua pa Gudugoda meke hola la pa Zotibata, keke popoa pu koa ia na kolo.
8Meke koasa toqere vasina si ta vizata vata kale sari na tie koasa butubutu Livae pude ṉati hiniva nia sa Bokese Vinariva Egoi pude nabulu nia guari na hiama meke manani sari na tinoni pa korapa pozana Sa, osolae kamoa pa rane ṉinoroi.
9Gua asa, ke lopu tago pepeso sari na butubutu Livae. Lopu kekeṉoṉo ri kaiqa butubutu pule sapu tago pepeso, ba e Zihova, mo sa dia tinago gua sapu tozini e Zihova sa mia Tamasa.
10Meke zama pule se Mosese, “Meke koa mo pa toqere si rau koari ka made ṉavulu puta rane na boṉi, gua tugo pa totoso kekenu. Meke va avosau na va ego pule au Zihova si rau pude lopu kaqu va kaleana gamu.
11Meke zama koa rau se Zihova, ‘Mu turaṉa lani goi sari na tie koasa siraṉa pude ene nuquru la gua koasa popoa sapu ele va tatara nia Rau koari na tiatamamia,’ gua si Asa.
12Ke gamu na tinoni Izireli, mi avoso mae kamahire, mamu taveti gua sapu hivani gamu e Zihova sa mia Tamasa pude taveti. Mi vahesia na va tabei sari doduru gua pu zamani e Zihova koa gamu. Mi tataru nia na nabulu nia si Asa pa doduru binalabala pa korapa bulomia.
13Mi va tabei sari doduru Nana tinarae, sapu ponini gamu rau pa rane ṉinoroi pude koa valeana si gamu.
14Ura te Zihova sa mia Tamasa sari na maṉauru; meke sa pepeso si tanisa tugo meke sari doduru likakalae vasina.
15Ba sa tataru te Zihova koari na tiatamamia si ṉiṉira hola, ke vizata gamu Sa ba lopu sari kaiqa votiki tie pule. Gamu si Nana tie soti.
16Gua asa, ke mi va tabea se Zihova kamahire, mamu lopu va gugue nia.
17Ura Zihova sa mia Tamasa si na ṉati Tamasa tadi doduru tamasa, na Baṉara tadi na baṉara. Na Tamasa lavata meke hehedana, meke variva matagutuna, meke garona pude tava tabe tugo si Asa. Meke lopu hoke toka kale.
18Meke toka va leanani Sa saripu eapadi na nabonabokodi meke tataruni na poni poko Sa sari na tie karovodi.

19Ke gamu ba kaqu tataruni tugo sari na tie karovodi, ura gamu ba ele na pinausu mo keke totoso pa popoa Izipi.
20Kaqu pamaṉa nia na vahesi kalea mo gamu se Zihova sa mia Tamasa. Kaqu soto va nabu pa mia rinaṉeraṉe, meke tokotokoro pa korapa pozana Sa si gamu.
21Asa sa mia Tamasa, kaqu vahesia gamu si Asa. Ura ele dogori gamu pa matamia soti sari na tiṉitoṉa variva magasadi saripu tavete vatuni Sa koa gamu.
22Ari ka zuapa ṉavulu puta mo sari na tiatamamia sipu la pa popoa Izipi si arini. Ba kamahire si va soku gamu e Zihova sa mia Tamasa si gamu gua ri na pinopino pa maṉauru.