Juan 1

1

2

3

4

5

6

7

8

9

10

11

12

13

14

15

16

17

18

19

20

21

¹Gwangea nga ulita bebi dodadale Cristo klebi enebi, ama klebi Chube ole, ama Chube,

²gwangea ama klebi enebi Chube ole.

³Ama giti Chube nga ulita dodadu lle ulita dodadu, Chube ni lle gdaite dodadu sugekare amage.

⁴Cristo alin giti lle ulita gwade kwian ulita gwade. Ama kwian ta gbe suge kwian chagedale mine Chube takalin kare, ama jichra kare kwian ulita alin, ama kwian ta gbe suge salengwli jichra kle kwian gbe ten nga jereske kare.

⁵Kwian me Chube uñe chage nga jereske kare, Cristo chku jichra kare kwian ene alin, jichra chku chratigenga nga jere dbiguske, nga jere dbigu tadu jichra chra gwakalinda ene jichra me chratigenga dare, nga jere dbigu me ñadu jichra gweda.

⁶Chube kwian onbre gdaite kada Juan-Bautista kagu gerule no jichra giti kwian ulita ole. Juan-Bautista gerudu no trate jichra giti, ene kwian geru e keruchuge, ene kwian ulita ñage jichra uñe jichra gai ulia Juan-Bautista giti.

⁸Juan-Bautista me jichra, ama gerunga alin jichra giti kwian ole.

⁹Jichra ulia chiu nga dba ai giti kwian ulita alin, ama kwian ta gbe Chube giti, ene suge kwiange Chube mine, jichra e Cristo.

¹⁰Cristo nga ulita lle ulita kwian ulita dodadu, Cristo ulita mauña. Ama chku nga dba ai giti kwianske agwa me chku uñale kwian ulitage ama chema.

¹¹Ama chagedu mo jwiage mo bitallanuske, ama bitallanu ulita me ama gau ngwange no.

¹²Agwa kwian bai kaire ama gau ngwange no kwian ama gau ulia, ama kwian ene gbu Chube oliale.

¹³Kwian chege Chube oliale me salengwli kwian ulita nga dba ai giti menga chebia kote kare, kwian nga dba ai giti age mau tale ama takalin kare ene ama kirogwa molen, agwa Chube kwian ta blite age Chube takalin kare, kwian ene chege Chube oliale, Chube ama ulita Ñenua.

¹⁴Chube Cristo kagu nga dba ai giti, ama chku kwian kare, ama toidu chagedu kwianske ama ta du no diali kwian ulita ole, ama agedu tanre no kwian alin, ene kwian gwage amadi chkedale uñale ama Ñenua mine ulia. Ama kledu kwianske agedu no ulita kwian alin gire cha chada ai deganga, cha ule cha chagemanalla ulita ole gwagedu amadi, ama agedu ulita uñale cha ulitage, uñale cha ulitage ama ulia Chube Kirolla gdaitre alin, ama mo Ñenua kirallaske agedu no ulita.

¹⁵Juan-Bautista gerudu no no kwian ole Cristo giti, Juan-Bautista gerudu ene: “Ai cha geruadu kwian ole be chie cha nate ama ma kweri chage, ama kledu ngeru chage, gwangea ama klebi enebi Chube ole.”

¹⁶Cristo diali age no che amanu ulita alin, diali ama kle age ma no dare che alin, ama ole age no ene diali me bidege.

¹⁷Chube Moisés ta gbu chada dege kwian ulita alin, ene suge kwiange kwian chagedale mine Chube gwa giti nga dba ai giti, agwa chada e giti me sugedu ulia kwiange Chube mine, geru ma trate ulia Chube giti Jesucristo chiu dbe kwian alin, ene nege Jesucristo giti suge kwiange Chube no kwian ulita ole Chube agedu no kwian ulita alin.

¹⁸Ni kwian gdaite nu gwageba Chubedi, Chube Kirolla alin giti kwian Chube uñe, Chube Kirolla gdaitre alin ama kaire Chube, ama talla kle ule diali mo Ñenua ole.

¹⁹Kwian israelita chugagwalla ulita una Jerusalénmu kwian gau mne gdaite kagu geru kade Juan-Bautistage, kwian mne gdaite e gweale gerunga Chube ole daba alin, kwian na gerunga Chube ole daba alin chudaboanga, kwian e ulita jo chke Juan-Bautista kle ngwadi geru kadu Juan-Bautistage: —¿Ba chema?

²⁰Juan-Bautista gerudu trate mau giti kwian ole: —Sbali Chube gerudu be kwian jwannga siere kage kwian alin, e Cristo, ba tañachuge cha Cristo, me ene, cha me Cristo.

²¹Kwian geru kadu nabitaite Juan-Bautistage: —Ba me Cristo, ¿ba chema? ¿Ba kwian Chube gerua ketanga dabage unsuialin kada Elías amaña chkuni? Juan-Bautista jaindunga: —Me ene, cha me ama. Kwian ulita jogeba chke Juan-Bautista ngwadi me ta chugu geru kade Juan-Bautistage, kwian gerudu Juan-Bautista ole: —Kwian Chube gerua ketanga dabage be chie, ¿ama ba? Juan-Bautista jaindunga: —Me dale, cha me ama.

²²Kwian gerudu Juan-Bautista ole: —Ba me ama, ¿ba chema? Ba gerule cha ole ba chema ulia. Cha geru ba giti dbadale, cha geru ba giti ketadale cha kagangage, ¿ba agali gerule mine mau giti?

²³Juan-Bautista jaindunga: —Cha kle age kwian Chube gerua ketanga dabage kada Isaías chada jigu degaba unsuialin cha giti gerule kare, cha gerunga kwian ole nga gballage Chugagwalla be chie giti, cha gerule kwian ole: “Kwian mo ta gbadale biale trate no Chugagwalla ngwange kwian kle jon lite trate biale chugagwalla ngwange kare.” Cha kle gerule ene kwian ulita ole.

²⁴Kwian fariseo ulita nu kwian mneite kagaba tienda Juan-Bautistadi,

²⁵ama geru kadu dare Juan-Bautistage: —Ba ulia me Cristo, ba me Elías, ba me kwian Chube gerua ketanga dabage be chie, ba me kwian e, ¿mineade Chube kalla giti ba kle daba ñe chiske gai ngaña chigage?

²⁶Juan-Bautista jaindunga: —Cha kle daba ñe chiske alin Chube kalla giti, agwa kwian gdaite kle cheske ma kweri chage, ba ulita bebi ama uñe,

²⁷ama be chie cha nate ama ma no ma kweri ulita chage, cha me ñanaske ama chudaboangale ama zapatolla jwennga ama serage —Juan-Bautista gerudu ene mau giti kwian una Jerusalénmu kagaba ole.

²⁸Boidu ene ulita una kada Betaniage, una e chege una Jerusalénge tanglegu chi Jordánge chkagu Juan-Bautista kledu kwian ñe chiske ngwadi, ne ngwadi kwian una Jerusalénmu geru kadu ene ulita Juan-Bautistage.

²⁹Nagbietege Juan-Bautista gwagedu Jesudi chie ama ngnagu, gire Juan-Bautista gerudu Jesu giti kwian ulita kledu ne ngwadi ole: —¡Gwagede, kwian e cha geruadu! Ama be mo chuge ngwadi jogeda kwian ulita alin bda cordero gwakle kwian kle age me no giti alin kare, Chube ama kagu nga dba ai giti kwian jwen siere ji chugege kwian age me no gdale. Cha gerudu ama giti kwian ole: “Be chie cha nate ama ma kweri chage, ama kledu ngeru chage, gwangea ama klebi enebi Chube ole.” Cha gerudu ene ama giti, nege ama kle chie che ngnagu.

³¹Ngeru cha agalige me chku uñale be chie cha nate ama chema, agwa cha agedu cha kaganga Chube gerudu kare, Chube cha kagu cha kwian ñe chiske Chube kalla giti ene cha giti ñage chke uñale kwian israelitage chema be chie ama jwanngale siere.

³²Cha agali me ama uñu agwa cha kaganga Chube gerudu cha ole: “Ba be kle kwian ñe chiske cha kalla giti, gire kwian gdaite be chie mo ñeange chiske bage, ama gití ba be gwage cha Oñadi chie, cha Oña be chege ama gití. Be boi ene gire be chke uñale bage kwian e amaña be cha Oña gbe kwian tale, ene kwian be chage cha Oña ole diali.” Chube gerudu ene cha ole, boidu ene ulita Chube gerudu kare, cha ama ñeu chiske gire cha gwagedu Chube Oñadi chie ngaña ama gití beusi kare, beusi e chegu jageba ama giti ngaña.

³⁴Cha gwagedu Chube Oñadi chie ama gití Chube gerudu kare cha ole, e giti chku uñale chage trate ama Chube Kirolla —Juan-Bautista gerudu ene ulita Jesu giti.

³⁵Nagbietege Juan-Bautista kledu nabitaite kwian ñe chiske gai ngaña chigage ngwadi, kwian gdaboke geru jwannga Juan-Bautistage kledu Juan-Bautista ole,

³⁶gire Juan-Bautista gwagedu Jesudi joge tangle kodi amage, Juan-Bautista gerudu Jesu giti: —¡Gwagede amadi! Chube ama kagu nga dba ai giti jogedaleda che ulita agedu me no giti alin bda cordero gwakle kwian kle age me no giti alin kare.

³⁷Kwian boke geru jwannga Juan-Bautistage Juan-Bautista keruchugu gerule ene Jesu giti, gire geru jwannga Juan-Bautistage jo Jesu ole.

³⁸Geru jwannga Juan-Bautistage chagedu Jesu nate, Jesu tiunda mo nate, Jesu gwagedu kwian geru jwannga Juan-Bautistage boke kle chage Jesu nate, Jesu geru kadu ama bokege: —¿Ba kle chage llema nate cha nate? Ama gerudu: —Kwian tkanga tangle geruge, ¿ba kle toi baini?

³⁹Jesu gerudu: —Bai cha ole tienda cha kle toi ngwadi. Ama boke jo ule Jesu ole, jo chke Jesu kle toi ngwadi, ngabi chui jo chege bate no dbi giti, nga jere malen geru jwannga Juan-Bautistage boke me joni, ama chegu Jesu ole, nagbietege ama joni.

⁴⁰Kwian boke e geru jwannga Juan-Bautistage Juan-Bautista keruchugaba gerule Jesu giti gire boke jogeba Jesu ole, gdaite kada Andrés, ama Simón-Pedro daballa.

⁴¹Andrés jo siere Jesu kledu ngwadige gire blike Andrés jo mo daballa Simón jwen, ama takalin Jesu kaite daballage, Andrés gerudu daballa ole: —Sbali Chube gerudu be kwian jwannga siere kage kwian alin, e Mesías, nege ama kle cheske, ama skwendu chage. (Mesías amaña kada Cristo.)

⁴²Andrés gerudu ene Simón ole gire Andrés mo daballa Simón du Jesu kle ngwadi, Jesu gwagedu Simóndi Jesu gerudu Simón ole: —Ba kada Simón, ba ñenua kada Juan, agwa nege gwangerugu ba ka be chege jwandale Cefas, ka e amaña Pedro.

⁴³Nagbietege Jesu mo ta gbu joge nga kada Galileage, nga ege Jesu tendu Felipe ngwange, Jesu gerudu Felipe ole: —Bai chagé cha ole geru jwen chage.

⁴⁴Felipe ai toinga una kada Betsaidage, Andrés kaire Pedro una Betsaidamu.

⁴⁵Felipe jo Natanael jwen Jesu kaitadale amage, Natanael skwendu Felipege undege gli kada higuera gdoge, Felipe gerudu: —Kwian gdaite skwendu chage, kwian e giti Moisés chada jigu degaba unsuialin kaire kwian Chube gerua ketanga dabage chada jigu degaba unsuialin kwian e giti, kwian e Jesu, ama José kirolla una Nazaremu.

⁴⁶Natanael gerudu: —¿Ba tañachuge una Nazaremuge kwian gweale no chada kle degaba giti kare ñage chie? Felipe me ta chugu gerule Natanael ole, Felipe gerudu: —Bai gwage cha kle kwian geruadedi, ene suge bage chema cha kle geruade.

⁴⁷Natanael jo Felipe ole tienda Jesudi, Jesu gwagedu Natanael chie kodi Jesu ngnagu, Jesu gerudu Natanael giti: —Ai ulia kwian israelita no, ama kle gerule ulia diali no daba ole, ama me chage sole daba ole.

⁴⁸Natanael Jesu keruchugu gerule ene gire Natanael gerudu Jesu ole: —¿Baini ba cha uñe? Jesu gerudu Natanael ole: —Felipe bebi gerule ba ole cha giti gire cha gwagedu badi ba kledu undege gli kada higuera gdoge.

⁴⁹Gire Natanael gerudu Jesu ole: —Kwian tkanga tangle geruge, ¡ulia ba Chube Kirolla ba kwian israelita ulita Chugagwalla!

⁵⁰Jesu gerudu Natanael ole: —Cha gwagedu badi undege gli kada higuera gdoge, e giti alin ba cha gai Chube Kirolla, suge bage ulia cha me jo badige ba kledu ngwadi, agwa uñadu bage cha kle gerule kare e ulia, chui aige gwangerugu Chube kiralla giti cha be age tanre ma no aige ba gwa giti, ba me gwagebadi ba be gwagé.

⁵¹Kaire Jesu gerudu: —Cha gerule ulia ulia ba ole, aige gwangerugu cha giti ba ulita be gwage nga ngañadi be kle tigebanga kare, kaire ba be gwage lle boanga Chube alindige chage gwabdugu gwadbigu cha Chube Kirolla chieba kwian kare be kle ngwadi nga dba ai giti —Jesu gerudu ene ulita Natanael ole.