Job 1:1-8

¹Duen etew he ed-ubpà diyà te tanà he Uz he iyan ngazan din si Job. Metazeng wey wazà igkesawey kandin. Edtahud sikandin te Megbevayà wey ebpeninguhà he kenà mekevaal te mezaat.

²Duen din pitu he anak he menge maama wey tetelu he menge vahi.

³Duen din 7,000 he menge kerehidu, 3,000 he menge kemilyu, 500 he paris he vaka, wey 500 he menge vehiyan he menge asnu. Ne zuen din daan mahabet he menge suluǥuen. Iyan sikandin pinekesepian te langun he menge etew ziyà te zapit te edsilaan te Israel.

⁴Neleyaman duen te menge anak din he menge maama is ebpesemsembayè dan ebpengemuran diyà te menge valey zan ne ibpetelavuk dan sikan is tetelu he etevey zan.

⁵Ne kada egkepasad is keemuran, ebpemuhat si Job para melumpiyuwi haazà is menge anak din. Edsayu sikandin ed-enew ne ebpemuhat sikandin te menge pemuhat he edtutungen he para te kada anak din su egkeisip din he kela ke nekesalà is menge anak din, ne kela ke nekekaǥi zan te mezaat mehitenged te Megbevayà. Ne iyan heini layun ebeeli ni Job.

⁶Ne sevaha he andew, midtiǥum is menge velinsuǥuen diyà te etuvangan te Nengazen, ne midtampu kandan si Setanas.

⁷Migkaǥi is Nengazen diyà te ki Setanas te, “Hendei ka ebpuun?” Ne midtavak ni Setanas is Nengazen te, “Midriǥuriǥu a ziyà te kelibutan.”

⁸Migkaǥi is Nengazen diyà te kandin te, “Neseǥipè nu ve is suluǥuen ku he si Job? Wazà iring kandin diyà te kelibutan. Metazeng sikandin wey wazà igkesawey kandin. Midtahud e zin wey ebpeninguhà he kenà mekevaal te mezaat.”