Job 1:1-8

¹Ŋac teŋ gêmoa gamêŋ Usŋa, ênê ŋaê gebe Job. Ŋac tau kêsa nê lêŋ tolaŋônêm sawageŋ ma eŋ ŋac gêdêŋ. Eŋ ketoc Anôtô sa to gejob tau gêdêŋ sec.

²Ênê latui 7 to latuio têlêac.

³Ênê domba 7,000 to kamele 3,000 ma bulimakao 1,000 to doŋki 500 sêmoa. Ma sakiŋwaga taêsam sêmoa, tec eŋ kêtu ŋac tolêlôm kêlêlêc lau ŋagêdô, taŋ sêŋgôŋ gamêŋ oc kêpi ŋa naŋ, su ŋêŋgeŋ.

⁴Eŋ latui seno moasiŋ gêjô tau-gêjô tau aŋga nêŋ andu kêtôm ŋanocgeŋ ma sêkalem luŋio têlêac mêŋseŋ moasiŋ sêwiŋ tauŋ.

⁵Ma gêdêŋ bêc samob, taŋ moasiŋ tonaŋ gêbacnê naŋ, Job gêdi sa gêdêŋ bêbêc kanucgeŋ ma kêkêŋ daja kêtôm êsêacnêŋ namba, kêtu nê gôlôac têtu selecŋa. Eŋ gêgôm gêŋ tonaŋ ŋapaŋ, gebe eŋ taê gêjam gebe “Moae latuci sêgôm sec ma sêsêm biŋ alôb-alôb kêpi Anôtô aŋga nêŋ ŋalêlôm.”

⁶Gêdêŋ bêc teŋ lau undambêŋa jasêpi tageŋ gebe sêkô Apômtau laŋônêmŋa. Ma Sadaŋ gêô lasê gêwiŋ êsêac amboac tonaŋgeŋ.

⁷Apômtau kêtu kênac eŋ gebe “Ma aôm gômôêŋ aŋga ondoc.” Sadaŋ sêjô eŋ awa gebe “Aê gaja ônê ma gamêŋ onec to gajac laoc nom ŋagamêŋgeŋ.”

⁸Go Apômtau kêsôm gêdêŋ Sadaŋ gebe “Aôm gôlic ŋoc sakiŋwaga Job me masi. Ŋac teŋ kêtôm eŋ gêmoa nom atom. Eŋ kêsa nê lêŋ laŋônêm sawageŋ ma eŋ ŋac gêdêŋ. Eŋ ketoc aê sa ma gejob tau gêdêŋ sec.”