Text copied!
CopyCompare
Buka Helaga - IOSUA

IOSUA 3

Help us?
Click on verse(s) to share them!
1Daba rere neganai, Iosua be ia toreisi, Sitima ia rakatania, Israela taudia ibounai be ia danu. Ioridane Sinavai ena ranu badina dekenai idia ginidae. Idia hanaia maoromaoro lasi, to idia kamepa guna.
2Dina toi idia ore murinai, bese ena gunalaia taudia ese kamepa idia raka hanaia,
3taunimanima idia oda henia, idia gwau, “Hahelagaia taudia, Levi iduhu taudia, ese Lohiabada emui Dirava ena Taravatu Maua do idia huaia, umui itaia neganai, do umui toreisi, Maua ena murinai do umui raka.
4Unai dala dekenai emui raka dalana do umui diba, badina be inai gabu be guna umui itaia lasi. To Taravatu Maua kahirakahira do umui raka lasi, ia bona umui, padana ena daudau be kilomita ta bamona.”
5Vadaeni Iosua ese taunimanima ia hamaoroa, ia gwau, “Hari dina umui sibona do umui hahelagaia, badina be kerukeru Lohiabada ese umui emui huanai hoa kara do ia karaia.”
6Iosua ese hahelagaia taudia ia hamaoroa, ia gwau, “Taravatu Maua do umui abia isi, taunimanima edia vairana dekenai do umui raka guna.” Vadaeni Taravatu Maua idia abia isi, bona idia edia vairanai idia raka lao.
7Lohiabada ese Iosua ia hamaoroa, ia gwau, “Hari dina lau ese oi do lau hanamoa hamatamaia Israela taudia ibounai edia vairanai. Vadaeni do idia diba lau ese oi lau bamoa noho, Mose lau bamoa hegeregerena.
8Hahelagaia taudia, Taravatu Maua idia huaia taudia do oi hamaoroa, Ioridane Sinavai dekenai do idia diho lao, bona sinavai isena kahirakahira, ranu lalonai do idia gini.”
9Vadaeni Iosua ese Israela taudia ia hamaoroa, ia gwau, “Umui mai, Lohiabada emui Dirava, ena hereva do umui kamonai!”
10Iosua ma ia gwau, “Umui raka vaira neganai Lohiabada ese Kanana taudia bona Hiti taudia bona Perisi taudia bona Girigasa taudia bona Amoro taudia bona Iebusu taudia umui emui vairana dekenai do ia luludia lao. Inai dekena amo do umui diba Mauri Diravana be umui emui huanai ia noho.
11Umui kamonai: Tanobada ibounai ena Lohiabada ena Taravatu Maua ese umui do ia gunalaia, Ioridane Sinavai umui hanaia neganai.
12Unai dainai tatau 12 do umui abia hidi, emui iduhu ta ta dekena amo.
13Vadaeni, hahelagaia taudia, Lohiabada, tanobada ibounai ena Lohiabada, ena Taravatu Maua idia huaia taudia ese ranu dekenai edia aena idia atoa neganai, Ioridane Sinavai ena heau do ia doko. Bona sinavai ena ataiai kahana dekena amo ia mai ranuna be do ia gini, magu bamona.”
14Vadaeni Israela taudia ese edia kamepa gabuna idia rakatania, Ioridane Sinavai hanaia totona. Hahelagaia taudia ese Taravatu Maua idia huaia lao, Israela taudia edia vairana dekenai.
15Taravatu Maua idia huaia, ela bona edia aena be sinavai ena ranu lalonai idia atoa. Unai nega dekenai, Ioridane Sinavai ia abata noho, badina unai sinavai ena kara be, uma anina utua negadia ibounai ranu ia abata momokani. To hahelagaia taudia ese edia aena be sinavai ena ranu dekenai idia atoa neganai, sinavai ena heau ia doko momokani.
16Vadaeni sinavai ena ataiai kahana ranu be ia gini, magu bamona. Unai ranu ia gini gabuna be daudau, hanua ta ena ladana Adamu ena badibadinai. Unai be Saretana kahana ena hanua ta. To sinavai ena henuna kahana dekenai ia heau ranuna be Arabaha Gohuna dekenai ia vareai, ia boio. Unai Arabaha Gohuna ena ladana ta be Davara Mase. Vadaeni Israela taudia be sinavai idia raka hanaia, Ieriko hanua kahirakahira.
17Bona Israela taudia ibounai be tano kaukau dekenai idia raka hanaia neganai, hahelagaia taudia, Lohiabada ena Taravatu Maua idia huaia noho taudia, be tano kaukau dekenai idia gini, Ioridane Sinavai ena huana dekenai. Unuseni idia gini noho, ela bona bese ibounai be Ioridane Sinavai idia raka hanaia vadaeni.