1Josua â Israe ŋic sasawa jaŋe uupicte Sitim haeonec faharerâ rambiŋ. Raku Jordaŋko fisirâ fotâcneniŋte teuŋ âterâ fombiŋ.
2Eme ʒoaŋ gie bapa jahec â moc tarame micnefâc‐jeŋic jaŋe teuŋ sâc fotâcnehuc
3ŋic ŋokac ʒiŋuc jazambiŋ: “Lewi guruonec taha bapa jaŋe Wofuŋ Anutu‐ŋeŋicte ʒâʒâfic katapa reŋkeniŋmu i honerâ teuŋ‐ŋeŋickonec faharerâ bâjâpec‐jopanʒepieŋ.
4Ehuc hata weniŋuc jaha raniŋmu i mana taranʒepieŋ. Ŋoŋe mârâc hata ʒira rac warec moc mi embiŋ irec. Erâ ŋoŋe â ʒâʒâfic katapa ŋondeŋ‐ŋeŋicko sawane fozejec. Sawane i maile nâfocne irec sâc ezejec. Ŋoŋe irec maŋfuŋko mi ranʒepieŋ.”
5Eme Josuazi ŋic ŋokac jazarâ muwec: “Tomâcko Wofuŋzi ʒâŋe fai‐ŋeŋicko mâsi qeŋ bipinehec baocmu irec ŋoŋe sowa juhuc maŋ sahac‐ŋeŋic emasaŋke‐fâreniŋ.”
6Erâ Josuazi taha bapa jazarâ muwec: “Ʒâʒâfic katapa reŋkerâ ŋic ŋokac bânie‐jareniŋ.” Mume jaŋe katapa reŋkerâ ŋic ŋokac bânie‐jarembiŋ.
7Ehame Wofuŋzi Josua âzâcnerâ muwec: “No ʒoaŋ ʒira fuŋkerâ Israe ŋic sasawa jaŋere ʒâŋe faio bafecgupe jaŋe ʒiŋuc mana taranʒepieŋ: No Mosehec jupo irec sâc jaha gohec jupemu.
8Erâ go ʒâʒâfic katapa reŋkeniŋmu taha bapa i jaŋe ine ʒiŋuc jazazemec: ‘Ŋoŋe Jordaŋ opâ mecnao fisirâ ira domanʒepieŋ.’”
9Eme Josuazi Israe ŋic ŋokac jazarâ muwec: “Fisi‐fârerâ Wofuŋ Anutu‐ŋeŋicte dâŋ mananiŋ.”
10Erâ ʒuhuckerâ muwec: “Anutu jujune e ŋondeŋ‐ŋeŋicko jukac i ʒiŋucko mana taranʒepieŋ: E ʒâŋe fai‐ŋeŋicko Kanaaŋ ŋic, Hitiŋic, Hiwiŋic, Periʒi ŋic, Girigasi ŋic, Amori ŋic, â Jebusi ŋic jâmbomac jâpec‐jopaocmu.
11Manaŋgopieŋ, mâreŋ sâko mâreŋ irec Wofuŋ ere ʒâʒâfic katapazi bânie‐ŋarehuc Jordaŋ opâ fotâcneocmu.
12Irec Israe ŋic guru sâc ŋic moc moc rocjopakupie 12 enʒepieŋ.
13Eme mâreŋ sâko mâreŋ irec Wofuŋ ere katapa reŋkeniŋmu taha bapa i jaŋe kike‐jeŋiczi Jordaŋ opâ âte uapie tâcneocmu. Ehame opâ faicnec wahakac i kanaŋ hekicne tinac domaocmu.”
14Eme taha bapa jaŋe ʒâŋâfic katapa reŋkerâ bâniepie ŋic ŋokac jaŋe teuŋ‐jeŋickonec faharerâ bâjâpec‐jopahuc Jordaŋ opâ fotâcneniŋte rambiŋ.
15Ehuc katapa reŋkembiŋ taha bapa i jaŋe Jordaŋko fisirâ kike‐jeŋiczi opâ qaŋeŋnao hurâ âtembiŋ. (Qa roro dameŋko Jordaŋ opâzi ine boc siwiŋnehuc qaŋeŋne sâckerâ foekac.)
16Ehame opâ faicnec wahaekac izi siwiŋnerâ ferâ raku Zaretaŋ heririŋ Adama hae ŋekac ira mickewec. Â opâ juwicne ine raku mâreŋ burocnere hâwec, Hâwec Hâmocne hâcne, ira huekac i kereŋke‐jâmbâŋkewec. Eme ŋic ŋokac jaŋe Jeriko hae ŋifecnao fotâcnembiŋ.
17Fotâcnehapie Wofuŋte ʒâʒâfic katapa reŋkembiŋ taha bapa i jaŋe Jordaŋ ʒâʒâŋiŋko kereŋnao domahapie Israe ŋic guru sâko jaŋe kereŋnea fotâcneku fotâcne‐fârembiŋ.
