Text copied!
CopyCompare
Buka Hope - Zosua

Zosua 3

Help us?
Click on verse(s) to share them!
1Pana munumunu pa koivugona si vaṉunu munumunu hokara sari doduru tie Izireli, meke taluarae si arini pa Akasia. Meke topue la pa Ovuku Zodani vasina si la va turu ipi, meke aqania rini sa totoso pude karovia sa ovuku pude la pa kali karovona.
2Sipu hola ka ṉeta rane, si ene betoi ri kasa koimata sari na ipi meke tozini rini sari na tinoni, “Pana dogoria gamu sapu palekia rina hiama sa Bokese Tanisa Vinariva Egoi te Zihova sa mia Tamasa si mi va gorei sari na mia ipi, mamu ene luli la i.
4Lopu ele la ia gamu sa vasina asa visoroihe, ke arini kote va dogoroni gamu sa siraṉa. Ba mi lopu ene tata koasa Bokese Tanisa Vinariva Egoi. Mi ene va seu padana kukuru kilomita seu gua koasa,” gua si arini.
5Meke tozini Zosua sari na tie, “Mi va madi puleni gamu. Sina vugo si kote tavetia e Zihova koa gamu si keke tinavete variva magasana,” gua si asa.
6Beto asa si tozini sa sari na hiama pude palekia sa Bokese Tanisa Vinariva Egoi te Zihova, meke ene va kenue la pa kenudi rina tinoni, ke tavetia tugo rina hiama gua sapu tozini e Zosua.
7Meke zama la koe Zosua se Zihova, “Gua sapu kaqu evaṉia Rau kamahire, si pude podalae va lavatigo rina tie Izireli si agoi, guana tie arilaemu. Meke pude madi gilania rini sapu Arau si somana koa koa goi, gua sapu somana koa si Rau koe Mosese.
8Tozi ni sari na hiama pu palekena sa Bokese Tanisa Vinariva Egoi te Zihova, sapu kamoa rini sa ovuku, si kaqu gore la si arini meke turu noso pa taqelena.”
9Meke zama la koari na tinoni se Zosua, “Mae tani mamu avosia gua sapu kaqu zama nia e Zihova sa mia Tamasa.
10Pana rizu la si gamu, si kaqu hadu pani Sa sari na tie Kenani, Hitaiti, Hivaiti, Perizaiti, Qeqasaiti, Amoraiti, meke Zebusaiti. Meke pana ta paleke karovo kekenu la pa Ovuku Zodani pa kenumia gamu sa Bokese Tanisa Vinariva Egoi tanisa Baṉara tana doduru kasia popoa si kaqu gilania gamu sapu sa Tamasa toana si koa koa gamu.
12Ke kamahire si mi vizati ka manege rua tie hokara, keke pa hopeke butubutu.
13Pana neti kamo tugo pa kolo nenedi sari na hiama pu palekena sa Bokese Tanisa Vinariva Egoi te Zihova sa Baṉara tana doduru kasia popoa, si kaqu noso sa totolona sa Ovuku Zodani. Meke sa kolo sapu totolo gore si kaqu ta varigarae pa keke vasina,” gua se Zosua.
14Na totoso pakepakete sa totoso asa, meke naqe sa ovuku. Totoso taluarae rina tinoni pude la karovia sa Ovuku Zodani gua, si palekia rina hiama sa Bokese Tanisa Vinariva Egoi. Meke sipu neti gore tugo pa kolo sari na hiama,
16si noso totolona sa ovuku meke varigara eko nana pa keke vasina sa kolo, pa batuna sage sa ovuku vasina ta pozae Adama, sa vasileana nomana tata pa Zaretani. Sa totolona sa ovuku sapu la gua pa Kolo Matena si ta kumata palae hokara, ke karovo tata mo pa Zeriko sari na tinoni.
17Totoso ene karovo pa vasina popana koasa ovuku sari na tinoni, si turu noso koasa vasina popana pa kokorapana sa Ovuku Zodani sari na hiama pu palekena sa Bokese Tanisa Vinariva Egoi te Zihova, osolae karovo taloa beto tu sari doduru tinoni.