Text copied!
CopyCompare
Paipel - Josua

Josua 3

Help us?
Click on verse(s) to share them!
1Iwe, lesosorusich Josua me ekewe aramasen Israel meinisin ra sai seni Sitim. Ra tori ewe chanpupu Jortan o aüetä imwer ikenan me mwen ar repwe feila pekilan.
2Mürin ülüngat rän, ekewe meilap ra fetalfeil lemenen ewe ia ekewe aramas ra nonom ie.
3Iwe, ra üreni ekewe aramas, “Lupwen oua küna pwe ekewe souasor ra mwärei än ewe Samol mi Lapalap we pworofel, ina otun ämi oupwe pwal sai seni leniemi o tapwela mürir,
4pwe oupwe silei ewe al oupwe pwerela won. Pun ämi ousap mwo pwerela won ei al me mwan. Nge epwe wor wäwän lefilemi me ewe pworofel ina epwe ükükün esop mail, pwe ousap kan ngeni.”
5Iwe, Josua a üreni ekewe aramas, “Oupwe apinikemi, pun lesor ewe Samol mi Lapalap epwe föri manaman lefilemi.”
6Nge Josua a üreni ekewe souasor, “Oupwe eki ewe pworofel o akomwola mwen ekewe aramas.” Iwe, ra eki ewe pworofel o akomwola mwen ekewe aramas.
7Iwe, ewe Samol mi Lapalap a üreni Josua, “Ikenai üpwe popuetä le atekioketä me fän mesen chon Israel meinisin, pwe repwe silei pwe ngang üa etuk usun üa eti Moses.
8Iwe, kopwe allük ngeni ekewe souasor mi mwärei ewe pworofel, pwe lupwen repwe tori ünükün ewe chanpupu Jortan, repwe tolong o üla lon.”
9Nge Josua a üreni ekewe aramasen Israel, “Oupwe kanoto o rongorong än ewe Samol mi Lapalap ämi we Kot kewe kapas.”
10Josua a pwal üra, “Ren ei oupwe silei pwe ewe Kot mi Manau a nom lefilemi, epwe wesewesen asüela me mwemi ekewe chon Kanaan, chon Hit, chon Hiw, chon Peris, chon Kirkas, chon Amor me chon Jepus.
11Nengeni, ewe pworofel än ewe Samol mi nemeni unusen fanüfan epwe akomwola mwemi o tolong lon ewe chanpupu Jortan.
12Iei oupwe filätä engol me ruoman mwän seni ekewe ainangen Israel, akaeman seni eu me eu ainang.
13Nge lupwen pechen ekewe souasor mi mwärei ewe pworofel än ewe Samol mi Lapalap, ewe mi nemeni unusen fanüfan, repwe ipwelong lon ewe chanpupu Jortan, pupun ewe koluk epwe kaüla. Nge ewe koluk mi putiu me asan epwe aioifengen.”
14Iwe, ekewe aramas ra sai seni ewe ia ra nonom ie, pwe repwe pwerela pekilan ewe chanpupu, nge ekewe souasor mi mwärei ewe pworofel ra akom mwer.
15Iwe, ewe chanpupu a urowu ekis meinisin tori ünükün, pun ei otun fansoun räs. Nge lupwen ekewe souasor mi mwärei ewe pworofel ra tori ewe chanpupu Jortan o ipwelong lepetepeetan,
16ewe koluk mi putiu me asan a popuetä aioifengen me toau tori Atam eu telinimw mi nom ünükün Saretan. Nge ewe koluk mi putiu ngeni ewe Setin Mäla esap chüen pu. Iwe, ekewe aramas ra pwerela pekila akawenewenen Jeriko.
17Nge lupwen chon Israel meinisin ra pwerela pekila won pwül mi pwasapwas, ekewe souasor mi mwärei än ewe Samol mi Lapalap we pworofel ra ütä won pwasapwas lukalapen ewe chanpupu Jortan, tori chon Israel meinisin ra toola pekilan ewe chanpupu.