Iburu 8

1

2

3

4

5

6

7

8

9

10

11

12

13

¹Ọzukhomhi emini anye ẹ ngme na. Awa mhọli Ọga ọyi ekpodalo ugamhi, ni ọ shitọ ukiẹkiẹ obita omhẹsẹ oyi Ẹshinẹgba ni ọ mhọli ekpabọ nya na obini iloghie agbọagbọ,

²ni ọọ ga abi Ọga oyi ekpodalo-ugamhi eyi Ẹshinẹgba elemhi Okholo ni a ri ode ghi ni o khi egbegbi igholo ni o la iloghie, oni Ọnọmhuẹ lọlighuo ọ tọ, ni ọa khi abọ eyi ẹgbọ a rọ tọ li.

³Eri a zẹ eni e kpeda na ekpodalo-ugamhi eyi Ẹshinẹgba kpa ni e ri isomhopfa ali iluasobo ke luasẹ. Lọli o zẹ khi Ọni ọ kpeda na ekpodalo-ugamhi eyi Ẹshinẹgba oyawa, ọ mema mhọli emini ọ li rọ ya luasẹ.

⁴Agbọ ọ kha la lọ, ọa kha fẹ khi ọkpodalo-ugamhi oyi Ẹshinẹgba, aborọkhia khi ekpodalo-ugamhi eyi Ẹshinẹgba ni ẹ deba ushi oyi ẹgbọ iJu e la aghọ eghọ.

⁵Okholo ni a ri ide tọ ni e la ga, irọkhọkhọ ali aroro oyi emini e la iloghie e khi. Lọli o zẹ khi abi iMosisi ọ rọ ya tọ oni igholo, khi Ẹshinẹgba ọọ li, “Zobẹ ni a bhale ya ẹ khi abi a li rẹ wẹ khasẹ ukhomhi ute, u li ya riẹlẹ wẹ tee.”

⁶Ama, memena, akanya ọkpodalo-ugamhi ni a rọ na iJesu, o mu ẹloe dọsẹ oni a rọ na ekpodalo-ugamhi enediọ, ẹzẹzẹ abi ishobọ ni ọ migha shi rọ gbe akanya o li mu ẹloe dọsẹ onodiọ, itobọ khi o migha nga irọnga eni e ti nẹ.

⁷Ini ishobọ oni ododẹ ọa mhọli ashini o kpọli le shi lọ, ọgbọ ọa kha ke mhọli emini a ri ishobọ olese ẹ riẹlẹ.

⁸Ama Ẹshinẹgba ọ mẹ ashini ẹgbọ eyọli ẹa kie te gba pfo, lọli ọ rẹ. “Oni ogbẹlẹ ọọ bhale, ni mhi rọ ya shobọ onogbọ na ẹgbọ iZirẹni ali ẹgbọ iJuda.

⁹Ọa ya li abi ishobọ ni mhi nu iti-itita wẹ shi, ogbẹlẹ ni mhi mu wẹ oobọ rọte ekẹ iJipiti ya fiẹ. Ẹa ri igẹsikia deba oni ishobọ ni mhi nu wẹ shi, itobọ ighọ mhi rọ rue wẹ ẹloe egbe-a.

¹⁰Ọnọmhuẹ ọọ, ogbẹlẹ ni ọọ bhale, Ishobọ ni mhi ya shi na ẹgbọ eyi iZirẹni na, Mhi ya ri ishi eyẹmhẹ shi wẹ isamhi, mhi kẹkẹ ọli shi wẹ udu. Mhi ya khi Ẹshinẹgba ọyẹwẹ, wẹwẹ e khi ẹgbọ eyẹmhẹ.

¹¹Ọngẹwẹ ọa kẹ ke sẹsẹ ọnuzava ọyọli, wẹkhi eri ọ ya liẹ inyọghuo ọli, ‘Lẹsẹ Ẹshinẹgba.’ Itobọ khi wẹwẹ nya e ya lẹsẹ mhẹ, rọte ọni ọ kpọkẹ nya ya je ọni ọ funẹ nya.

¹²Mhi ya ri olamhẹ topfa wẹ, mhi aa ke gbo ya sato ipfidọ oyẹwẹ.”

¹³Abi ọ rọ da lu ishobọ onana, “Onogbọ” eghọ, o she ri oni ododẹ mele onodiọ-a. Emini o da mele onodiọ-a ni o she ẹ womhẹ, o kẹlẹ ya kele-a.