Heberu 8

1

2

3

4

5

6

7

8

9

10

11

12

13

¹Eda ribariba eai ta, ginauri bagubagunana ede ina: eda kohena‐saesaena ta ia i babawa Eaubada ena terona namanamarina nima‐tutuna eai, galewa eai,

²apa‐tabuna mamohoina wa arinai ia tauheaeai, iaede Eaubada i abihetoro wa, nige tatao.

³Kohena‐saesaedi gamagaridi se tauribaedi bena ainauia eo aitalasam Eaubada se mosei; arinai teina eda kohena‐saesaena ta ia hinage bena enana i leama i mosei.

⁴Ena ia tanoubu eai ta ma‐miana, ia taba nige kohena eai i laulau, paana isi nonohadi ina, ainauia tautorena, doha laugagaeo eai edi dobila se mosedio.

⁵Adi paisoa eai galewa ginauridi se abiwataidi, doha tautauna se ginauri, doha Mose Eaubada i ribahesanapuei wa huia ne i hetubu bena apa tabuna wa i ginauri: i ene, “U ita komakomani, ginauri gamagaridi doha tautauna oea tupina eai se heitam wa, iaede u ginauriwataidi.”

⁶Na huia ta Keriso heaheari paisoana loloaririna i lobai, Eaubada dobila esau i hetubu, wasawasana, dobila paana ede ribahesunuma lolodi, nige doha bagubagunana wa.

⁷Ribahesunuma bagubagunana ena i lolo, taba nige esau bena ta eooi.

⁸Ia mo nige ena lolo gonoana, arinai i hegiru i ene: “Sora au ita, asubenadi abo se lage, Guiau ie riba; ribahesunuma harihariuna abo ea hetubu Isaraela numana arinai, eo Iudea numana;

⁹nige doha ribahesunuma esau wa, tamadiyao enadi ea ribaei nei asubenana eai ea abilau nimadi eai Aigupito edi tano eai ea woeahaidi; paana Guiau ie riba i ene, egu ribahesunuma nige se miatahitahini, arinai nige ea nuatuidi.

¹⁰Ribahesunumana ede ina, abo ea hetubu Isaraela numana enadi, asubenadi me muridi eai, Guiau ie riba; egu laugagaeo abo ea toredi edi nuanuatu eai, nuadi eai hinage abo ea uri‐auridi, Eau abo edi Eaubada ede, isi abo egu basileia tataodi.

¹¹Taba nige tau esau ena eanua tauna, e ena tau mamohoi i heata i ene, “Guiau bena u nuatui,’ paana gamagaridi abo abigu se atao, gagiri‐konekonena i lau e tau saesae‐aririna,

¹²Edi laulau baaea eai abo ea nuatoatoaedi, edi baaea taba nige huia esau ea henuaisiniuioi.” (Jer. 31.31-34.)

¹³Wau ribahesunuma harihariuna i ribaei wa, arinai ede bagubagunana i beabeao. Na ginauri wa i beabeao, iaede ena huia i lauo, nige baeaona abo i tauyamui ariri.