1Dâŋ mukicne irec hândâŋne ʒiŋuc: Taha bapa sâko junârekac e faic sambâŋko femicne sâko ere ŋeŋefuŋko mefârenao fewec ŋeekac.
2E furu ufuŋ, mitific fârine hâcne, irec taha bapa jukac. Ufuŋ i ŋiczi mâcne, Wofuŋ e jahac bâfuawec.
3Taha bapa sâko sasawa jaŋe nânâ qowi bâzi râe rikec eniŋte mujarekicne, irec taha bapa sâko‐nâŋec wemocko taha bâzi tâmiric juzac?
4Erâ e mâreŋko juhuc muzac taha bapa mi juzac, mâreŋko sâcmutâc dâŋte sâcko bâzi ririke ŋic sâcne juŋgopieŋ.
5Jaŋe gie‐jeŋic mitific jabane â sâsâcne ira baeŋgopieŋ, fârine ine sambâŋko ŋekac. Mose e mitire qoruc boze bazo ehame Wofuŋzi ʒiŋuc âzâcnewec: “Manakic, tikio hawarine gowatukicne irec sâcko wiac sasawa bazemec.”
6Ʒi ine Jesuzi ʒâʒâfic fekicnere jâcne juekacte taha gie fekicne jaha baekac. Ʒâʒâfic fekicne ine biŋedâŋ fekicnezi hobeteŋ ecneha bâfuakicne.
7Mârâc ʒâʒâfic fowec, izi fârinehec eme muzac ʒâhec moc fuaocte dâŋne mi fuazac.
8Anutu eki ine ŋic jaŋere maname mi sâckeme ʒiŋuc muwec: “Juku dameŋ mocko Israe kikefuŋ â Juda kikefuŋ jaŋehec ʒâʒâfic ɋâricne moc bâfuapemu, Wofuŋzi iŋuc mukac.
9Mârâc mimiŋnefâc‐jeŋic Aigita mâreŋkonec jowac‐jopapere mejeŋicko rohuc jaŋehec ʒâʒâfic epo, ʒâʒâfic iŋucne mâcne; jaŋe ʒâʒâfic irec maŋnao paŋʒâic mi jupie noni râpec‐jopapo, Wofuŋzi iŋuc mukac.
10Â ʒâhec Israe kikefuŋ jaŋehec ʒâʒâfic epemu ine kecʒiŋuc: No mumupaŋ dâŋnane maŋjeŋicko râepe huocmu, erâ buhândâŋ‐jeŋicko qâreŋkepe foocmu, eme no Anutu‐jeŋic jupemu â jaŋe kikefuŋfâc‐nane juniŋmu.
11Eme ŋic moczi ŋicâgo‐ticne me ŋic moczi qomâ‐ticne ʒiŋuc mi muhuc miti qazucneocmu: Âjoc, go Wofuŋte fuŋne manac â!’ Mâcne, jaŋe wahakicnezi mecne fekicnezi mecne mâmâc manacnu‐fâreniŋmu.
12Ʒiŋucte manacnuniŋmu: No kiŋjeŋic behe‐jarepemu â sindaŋ‐jeŋicte mocwâc mi manasupemu, Wofuŋzi iŋuc mukac.”
13Eme Wofuŋ e ʒâʒâfic ɋâricnere dâŋ muhuc, mârâc fowec irec “raŋɋaŋkekicne” muwec. Eme wiac raŋɋaŋkekicne â gufekicne izi arictac ezo ekac hâcne.
