1Cunanka chay parlaskanchejmanta aswan curajka caymin: Chayjina Diosman Kayllaycuchej capuwanchej. Paytaj tucuy atiyniyoj Dioswan cusca janaj pachapi tiyaycucorka.
2Payka cheka caj janaj pacha yupaychana-wasipi Diospa ñaupakenpi kayllaycuchejpa ruwanasninta ruwashan. Chay cheka caj yupaychana-waseka Señorpa ruwaskan manataj runaj ruwaskanchu.
3Cay pacha yupaychana-wasipi tucuy ruwanayojka koskastapis uywastapis jaywananpaj churaskamin. Chayraycu Cristopis jaywanata jaywanallantaj carka.
4Chaywanpis sichus cunan Cristo cay pachapi cashanman chaypis, mana yupaychana-wasipi ruwanayojchu canman, waj ruwanayojcuna caskancuraycu. Chaycunaka Moisespa camachiskasninmanjina jaywanancupaj churaskas carkancu.
5Paycunaka ruwarkancu cay pacha yupaychana-wasillapi. Chay yupaychana-waseka janaj pachapi cajpa rijch'acuynillanmin. Chayraycu Moisés orkopi cashajtin payta Dios camacherka cay pachapi yupaychana-wasita wasichananpaj. Nerkataj: “Khaway, orkopi ricucherkayqui chaymanjina ruway tucuy imata”, nispa.
6Cunanrí janaj pachapi Cristoka aswan sumaj ruwanasniyojmin, mosoj traton atiyniyoj caskanta ricuchispa. Dioska chay mosoj tratonta aswan sumaj niskasninwan kowanchej. Chaymanjinataj Cristoj ruwanasnenka aswan sumajmin.
7Sichus ñaupa camachiskasnin Diospa munayninta tucuyta junt'anman carka chayka, mana ujtawan waj traton cananta munanmanchu carka.
8Chay ñaupa runas mana niskanta junt'askancuta ricuchinanpaj Señor Dioska palabranpi nin: Sumaj p'unchaycuna jamonka. Chay p'unchaycunapi mosoj tratoyta churasaj Israel ayllupaj Judá ayllupajpis.
9Cay mosoj tratoytaka mana ñaupa tatasnincupaj churaska quiquintachu churasaj. Chaypachaka paycunata qhuyacuspa Egipto jallp'amanta pusamorkani yanapayniywan atiyniywanpis. Astawanpis paycunaka mana munarkancuchu casuyta. Chayraycu nokaka sajra munaynincuman paycunata sakeporkani.
10Chay jamoj p'unchaycunapi Israel ayllupaj mosoj tratoyka caymin: Yuyaynincupi camachiskasniyta churasaj entiendenancupaj. Sonkoncupitaj camachiskasniyta kelkasaj casuyta munanancupaj. Diosnincutaj casaj, paycunari runasniy cankancu.
11Ajinaka sapa uj llajta-masinta chayrí sapa uj waukentapis, manaña yachachenkachu, “Señorta rejsiy”, nispaka. Astawanpis tucuy rejsiwankancu juch'uy cajmanta aswan jatun cajcama.
12Qhuyacuyniywan juchasnincuta khechusaj, ni jayc'aj yuyaricunaypaj, nin Señor Dioska.
13Mosoj tratonmanta parlaspaka ñaupa cajtaka mauc'aña caskanta ricuchin. Chay mauc'ataj chincapunayashanña.
