1Ta keeda wonin giyen dhalqinsa kattsi aapea dhalqa yin giyeane: Cecinte wuldara gobshinka sagi maataa Barjosa bitamon borkotonsa mizaqinte dooqaa ogodettsin gudullasa gebhaa wosa daane.
2Kinin waadadhaynoar gon apala ooni maaton Barjosa gazan oonintene; ogo apalan ooninin konngadhoono eedisa aanka dayma Barjokane.
3Gudullasa gebhaa kalaa kalaanin wodadhayno Barjona imbhenbee marshanbeam kinin imoadettsine. Ogonante agaa gudullasa gebhaa kinin imea yer daa koda zaske.
4Kidi peendar daa ki hanna, ini gudul maatehe. Harrna hambhidianna, Muse yigginka Barjona imintonaam imayna gudulla ke dahade.
5Kenin waadadhayno cecinngayn waadimansa kamsibee shipobe maatonamne. Ogonoar Muse apalan ooninam ashkota kinin hayenka, Barjo “Dhukandar hana haapadhon kamsindettsi yer wulam mete hasaam gishayse ashkaa!” hamayse kina ki giyade.
6Keeda Yesus ena mallandara sagi agen “imayda ime” kinin hamondar waadadhen sagi mallansa motala kinin dohondettsi, kina imbhoono waadimano kesa waadimara saginone.
7Birono mallano bagime yindar qolmino ko hanna, ini lansono mallano zaskehe.
8Harrna hambhidianna, Barjo eendar bagime dohonam shedayse yin ki giyade: “Imba Barjo yi giyna: ‘Marrato! Israveel eenabee Yiwda eenabekal haali malla inin ardayno woda koda nive.
9Ogono mallano Gibth peera keam bulana kesa aaninam inin yeden wodanka, kesa eykenabesana inin ardon mallandettsitehe. Kedi isa mallanam kenin garonna intaar keam i garade’ ki hamade.
10Pir Imbaa Barjo yi giyna: ‘Marrato! Ogo wodansa budonte Israveel eenabesana inin ardayno mallano yin giyaynone: Isa yigginam kesa meskente ida wode; kesa woylamdarar ida thaape. Kesa Barjoar ida maate; kediar isa eedi keda maate.
11Yisa peen eenaam ko hannaar imbanaasaam ko hannaar “Barjoam dhesaa!” hamayse dhettsea eedi qolehe. Harrna hambhidianna, naana shaaqanara yedayse gembhaka yekka eeno wul iam dhesa ko dhese.
12Ee kenin hamaamonam kena ida gare; kesa seesonam keeda kaara os bhocchattine’ ki hamade.”
13Ta keeda “haali malla” kinin hamenka, birono mallano gecchidine hamintane. Ogonante geccho maatoono yerro wul konin kayensa wodano yeskidine.
