1Chavaycha tachun yu aniy naunputun va inchineꞌ. Alin yu xaꞌay ukxtin, yucha kinkurajkꞌan yu vilchal la ixlhijakanaj yu ay Dios laktꞌiyan.
2Ancha tapatsay laqa chaqaꞌ taꞌan laqsaval toꞌoyakan Dios. Jantu valiꞌiy lapanakni yu katamakal ni anchanu chaqaꞌ, va kiJalhachimoꞌonukꞌan Dios yu makal.
3Qayntamin xaꞌukxtin kura lakꞌulakanta para kamoqslal lapaxkan. Ex chuncha vachuꞌ ni Jesucristo paxtoqniy kamaqxtaqlhi lapaxkan.
4Chavay incha va katiꞌukxuntayal ni Jesús aniy lakamunukpaꞌ jantu katapatsal tacha kuraj. Aniy yu kuras tamoqslay lapaxkan tacha lhinajun ixlhachimoꞌon Moisés.
5Chuncha ni chaqaꞌ taꞌan tatapatsay ni kuras kintamasuniyan tsꞌuniy tacha junita ancha laktꞌiyan. Tejkan ni Moisés va laycha ixꞌaqtaynil makanaꞌ ni chaqaꞌ taꞌan toꞌoyakan Dios, ex ni Dios lhijunil: “Ox kꞌamakꞌatꞌi kuenta ni va aqstanchun kꞌamakꞌatꞌi tacha yu ikmasunin laka aspajun.”
6Chavaycha ni Jesucristo apalay ox ixlhitapatsa xajantu yu ixtapaxtoqniy ni xaꞌukxtinin kuras. Yucha kintamapasaniyan yu apalay ox chivinti yu Dios jatꞌatamakaul ixlapanakni. Chavaycha va apalay ox yu Dios najun kamakayaꞌ.
7Ixjalhachimoꞌon Dios yu pꞌunaj jatꞌatamakaul ixlapanakni va istsꞌanqaniy tuꞌuchun. Xlhiyucha chavaycha jatꞌatamakaul ixlapanakni aputaun lhachimoꞌon.
8Dios naul ni lapanakni va ixtatsꞌanqaniy tuꞌuchun la ixlhitapatskꞌan. Va naul: Ni Dios najun: Kaminaꞌ julchan tejkan klaktꞌatamakaunaꞌ sastꞌi chivinti kun kilapanakni yu tavilanal xalakatꞌun Israel y vachuꞌ yu tavilanal xalakatꞌun Judá.
9Jantucha kunaꞌ tacha yu chivinti yu maqancha klaktꞌatamakaul ixpayankꞌan tejkan klakmaxtuchal xalakatꞌun Egipto. Yuꞌuncha jantu katataylhaꞌal kun kilhachimoꞌon. Xlhiyucha jantucha kakmakal kuenta ixputsukukꞌan, najun ni Jalhachimoꞌonuꞌ Dios.
10Ex naunchoqoy ni Jalhachimoꞌonuꞌ Dios: Anchanu julchan klaktꞌatamakaunaꞌ sastꞌi chivinti ni lapanakni yu tavilanal xalakatꞌun Israel para kaklaqꞌaqtayjul. Klakmanuniyaꞌ kilhachimoꞌon la ixjatapastakꞌatkꞌan, klaqtsꞌoqmukꞌaniyaꞌ la ixjalhanutkꞌan. Ex ni kitꞌin ixDioskꞌan kajkꞌunaꞌ, yuꞌuncha kilapanakni katajunaꞌ.
11Jantucha matichun kamalaniyaꞌ ixtꞌamachaqaꞌ. Jantucha kajunaꞌ para kamispal ni Dios. Tachun kintamispaꞌoyaꞌ, mas yu apalay lakatꞌuniy lapanaki, mas yu apalay ay kaval.
12Kakmalaqmixiniyaꞌ ixlaqtaqalkꞌan, jantucha kakmakayaꞌ kuenta ixtalaqalhinkꞌan.
13Chuncha ni Dios najun va sastꞌi ni chivinti yu chavaycha jatꞌatamakaul ixlapanakni para kalaqꞌaqtayjul. Yucha naunputun yu ataun lhachimoꞌon jantucha paxtoqniy y yu jantucha paxtoqniy kamiꞌolcha.
