1Baing haruanga namuxing sibuna bing: Kira lipuxira hananiangam mugamugangama na bila li, ina rung Urana Haringinga kabukabung xaitamoxiam rimang rimamo rubinia long xaiya.
2Tuxu oxatua Urana Xahing Sibunia long xaiya. Toxoratamona tongtongia. Xahia ba lipudi ditongtongia te.
3Lipu hananiangam mugamugangam longgalo Urana mogudi dahanania yahangadi xaung hananiangadi, binabu bila balau lipuxira hananiangam mugamugangama xauna bing hanania axamang tela.
4Nabu wa titia li, bing bagula wa lipu hananiangam te, namua na lipu hananiangamdi duwau, saing disina yahangadi disu mana hanaunaungua Urana sina na Moses.
5Oxatua dituxu bing babu, dikisinga ing ganina axadi duwa long xaiya. Namua naga bungina Moses xauxau ba tongtongia Urana Xahinoa, Urana hanaunau ba, “Umaxania ba utongtongia maringina axadi li bila babua ngahatanga naung bimbia.”
6Ning oxatua Yesu xap dali dingia. Xauna, haruangua hau liwe mana Urana xaung lipuadi dali mugangua. Baing axadi haruanga hauna li hau ba sinadi nakira, didali axadi haruanga muganga hau ba sinadi nakira.
7Ahatumia. Nabu haruanga mugamugangama ba Urana hau rangua lipudi sanga sibuna, bing namuxin te mana Urana hau haruanga tela.
8Ning mugamugangama sanga te, namua na Urana bagu lipudi kuboludingdi didoa, binabu harua ba, “Bagu xaidaba ma yu, bungina bagula ngahau haruanga haunua rangua lipu Isreliamdi xaung lipu Yudamdi.
9Bagula wa bila haruangua ngahau rangua mugangadingdi te, bungina ngatuxu rimadingdi bu ngaxaidi masok sangua Isip, namua na disu mana haruangua ngahau te, saing ngayamudi.
10Haruanga baguli bagula ngahau rangua lipu Isreliamdi, kimuya mana bungina baguba. Nga Toxoratamona ngaharua ba. Bagula ngata hanaunaungagudi hatumingadingia xaung bagula ngabungdi ludingia. Bagula ngawa Urana dingia, saing bagula duwa lipuxigudi.
11Bagula lipu tela tubatuba rianoa kimbo bakbaginoa te, tubatubaiga ‘Bing uxabia Toxoratamona xai’ sanga ba ditubatuba te, namua na bagula ding longgalo daxabia nga, lipu yaya teguamdi digabu lipu yayamdi xauna bagula daxabia nga.
12Namua na bagula ngayunga kuboludinga didali hanaunaungua, saing bagula ngahatumia kuboluding diandi muli te.”
13Bungina Urana uxu haruanga ba bagula hau ba “hauna,” bing libu mugamugangama oxatan te. Baing axa oxatan te, bing muganga saing haxek ba hanggalang.
