1Wàéni êre ê pwina go ina: Pwa pwi a pwa ârapwaailò maina kâjè, naa napwéretòotù, ma pwi a-ipa popai kâjè na ara wà Pwiduée. Â wà Pwiduée, na é dau pwényuâa ma dau pwa pàtàmee, âna é nama é tâaboo naa gòro âji îê ba na é pitûâ kâra diri pâ muru.
2Â ê ére na dau pwicîri, na é tâa wê, âna nye âji wâ târa pwapwicîri. Ba muru pacima kà Pwiduée, â càcaa muru pwa kâra âboro.
3Pwa ê âraimeai na é tòpò, ba wàépwiri wakè kà tèpa pwa ârapwaailò naaniboo gòropuu. Â wiàna é bwaa tàgére tâa ni gòropuu wà Kériso, â pwiri càcaa pâri ma é pwi a pwa ârapwaailò. Ba pwa pàra tàpé, ni gòropuu, na rà tèpa pwa ârapwaailò wiâra ê *Naèà kà Moosé. Â wakè kàra, âna na rà pwa ârapwaailò ma tòpò pâ âraimeai.
5Êco na, diri ê pâ pwiibà, âna nye po câmu kâra ma ânuuru ê âji wâra pwapwicîri na wânidò napwéretòotù. Ba, na ia é pipwabwàtié wà Moosé, ba na é pacima ê wâra pwapwicîri pwa goro imwaano, âna é pitûâri têe wà Pwiduée pâ: Gà o pwa diri ê pâ muru, wiâra ê câmu na go jèe paari tâgà, naanidò gòrojaa.
6Ba wakè bèepwiri na ia é naa tà Kériso wà Pwiduée, âna nye dau piwéna awé, jii ê pai pwa ârapwaailò wiâra ê Naèà kà Moosé. Ba wà Kériso, âna é pwi a pame tâjè ê *auipwataâboro na bwaa âmuê, na é pwa tâjè wà Pwiduée. Â ê auipwataâboro bèepwiri, âna nye dau pwényuâa kaa jii ê Naèà. Â ée mwa pame tâjè pâ aupwényunyuâari na dau wâdé awé.
7Biu, âna wà Pwiduée, âna é *ipwataâboro târa ê Ba kêe *Isaraéla, goro ê Naèà kà Moosé. Â wiàna ê auipwataâboro bèepwiri, âna é jèe pacoo ê auniimiri kà Pwiduée, â pwiri câé caa tòpò côwâ cè béârailu wèe.
8Êco na càcaa tâbawêe ê auipwataâboro béaa, ba é pinabaèpà ê Ba kêe wà Pwiduée, na é ina pâ: O tèepaa ê pàara, na o bwaa âmuê. Bà mwa pitêrebà bau wâao Isaraéla ma wâao *Juda. Bà mwa tòpò côwâ cè auipwataâboro na bwaa âmuê.
9Ia bà ipwataâboro ma tèpa caa kàra. Ia go pacòobérà gée napô *Aigupito. Go poparà còobé, ba na rà udò. Bà tâaboo naima, na pwi tòotù-bà, â bà ipwataâboro. Â càra caa pitêre dàra. Rà ipwanauri ê popai. Â go naa càùo tàra. Go panuârà pâ jiio! Â o càcaa ipaiwà
10ê auipwataâboro na bwaa âmuê, na bu mwa pwa, wàibu ma Isaraéla, tèpa âboro kôo. Go mwa tòpò naèà kôo naa nanaarà. Go mwa wii popai kôo naa na pwâranümarà. Â go mwa Pwiduée kàra, â o mwa wàilà pwi Ba kôo. Wàépwiri kaa auipwataâboro na bu mwa pwa.
11Rà o cau tâmogòorio diri pâ âboro; O càcaa pâri ma rà pacâmuri pwi béerà gooò. O ticè na é pamogòori pwi jènereê ba na é côoinaô. Ba go o mwa wâjaarà. Rà o mwa tâa jaao wà tàpé na rà kîri. Rà o mwa medario wà tàpé na rà maina.
12Go o mwa tipirà jii ê pâ tojii kàra. Go o mwa pwanaurirà goro ê pâ èpà kàra. O câgo mwa caa niimiri ê pâ càrarà na èpà. Jérémie 31.31–34 Wàépwiri ê auipwataâboro, na é pwa ba kâjè wà Pwiduée.
13Ûna é ina gooé pâ, pwi muru na bwaa âmuê, âna pai ina wèe pâ, jèe dòroé ê auipwataâboro béaa. Ba jèe muru na jèe gòiri, â o jèe tiàué awé.
