Hibru 8

1

2

3

4

5

6

7

8

9

10

11

12

13

¹A vuhuna ngava nga i maea: Si tahoka pali a prister dagi. I made na limana kanena Hariki na hunu, i matakari.

²Ngane i leho manga prister pololilo na kape muholi na Vure. A kape iea, i uka tara bakovi ge haea. A Vure kunana a viri i haea.

³E huriki a prister dagi lobo ri tahoka a leho ni habi a nihabi na Vure. E Kristo tara, i habi a nihabi na Vure, a vuhuna ia a prister dagi.

⁴Ia bara i made na malala, i uka ma ge ia a prister dagi, a vuhuna i tahoka e huriki a prister ri made pali, ri habi a maka nihabi na Vure, ri muri mai kunana a vinara.

⁵Ri leho manga prister na kape na Vure koea na malala. Ra kape na Vure iea, i manga kunana a hanuna kape muholi na Vure i pesi na hunu. Hosi, muga ne Moses ta ge vakapesia a kape na Vure, a Vure i takia, i ta maea, “O lohotata vona a naro na kape a vakasiri ioe vona na lolo, o ramai kamumua.”

⁶Pali ngane a leho i bolea e Isu na ngava dagi karaba i rangi a leho na ngava dagi hosi, a vuhuna a nita muholi a Vure i habi turana ngava dagi karaba i rangi a nita muholi na ngava dagi hosi.

⁷A ngava dagi hosi bara i kamumu kunana, a Vure i uka ma ge vakabele tabu a ngava dagi karaba.

⁸Pali a Vure i pukatala a naro hale ne huriki nga, i ta maea, “E Bakovi Dagi i ta maea, ‘Mu longo, iau a vulakia pali tara parava, ga rata a ngava dagi karaba turane huriki a Israel, e huriki a Iuda.

⁹Ra ngava dagi iea, i uka ma ge manga a ngava dagi hosi a rata turane huriki a gare ne ria, na tahuna a tuli tala ria o Egipto. I uka ma ri muri maia a ngava dagi nau. Lakea iau e Bakovi Dagi, a ngalahere ne ria.

¹⁰A ngava dagi karaba ta ga ratea ne huriki a Israel i maea: Iau e Bakovi Dagi a ta maea, ‘Muri ma ga ru a vinara nau ge tabuli na niluhoi ne ria, ga here a ngava nau na hatene ria. Iau, ge iau a Vure ne ria. Ge ria e huriki a ngate nau.

¹¹Na tahuna iea, i uka ma ri gi vatovo ria na ngava ne Bakovi Dagi, a vuhuna e huriki lobo bara ri lohoka nau, i vakatubu ne huriki a matasia, i lakea ne huriki a kakaina tanga.

¹²Ga dodo ria, i uka ma ga habi a nimadihi ne ria vona a naro hale ne ria. Ga longo kaburungi liu a vilo hale ne ria.’”

¹³Na tahuna a Vure i taki talea a ngava dagi karaba vona, i ratea ngane a vinara hosi i uka lehona. A ra maki hosi, i uka lehona, bara i velu.