1Lelo mbuli itanganiche kuli aga tulingulonga ndo ali, hetwe twanaye mtambika mkulu wa kota hino, yawele ngikala honhu ha ludali lkuli chigoda cha Undewa cha Nguluwi wa kilanga.
2Heye nakakola mijito ya mtambika mkulu na Honhu Helile Ng'hatu, hawele hala mgati mwa lila ihema lya kukomya lizenjigwe na Mkulu, halizenjigwe na munhu.
3Chila mtambika mkulu kahaguligwa kumlavila Nguluwi ndolendole na nhambiko, na hino mtambika mkulu wa hetwe imgana heye yawe na chinhu cha kulavya nhambiko.
4Kota heye Kilistu na yawe wa hano muisi, yahawele ng'oo mtambika, kwa vila wabaho watambika wanji wangulavya nhambiko kota malajizo vyogalingugana.
5Mijito ja hewo ja chiutambika ndo kiwhana hela kwa gala gali kilanga. Mina Musa loyali behi kuigomanjiza lila ihema, Nguluwi nakamlonjela, “Udite chila chinhu kwa kuwinza kula kiwhana ya lila ihema lyoulajilwe kula kuchidunda.”
6Ila sambi Yesu kabochela mijito ya utambika iwele inojile kusinda ya hewo, kota vila uhanyisi woyawichile hagati ha wanhu na Nguluwi ndo kanoga ng'hatu, kwa vila lina kunoga kwake kuli ilagano lya mbuli zitanganiche ng'hatu.
7Mina kota lila ilagano lya sambi naliwehela nongwa, kwahawele na mbuli ya ilagano lya keli.
8Ila Nguluwi nakona wanhu wa heye wana nongwa nakalonga, “Mazuwa ganguya, kalonga Mkulu, aho hondidita ilagano linyale, na wanhu wa Isilaeli na wanhu wa Yudasi.
9Ilagano ali haliwa kota lila londitile na wasekulu wawo mazuwa gondiwalongoze kwa moko kulawa isi ya Misili. Hawawele wakitumbila kwa ilagano lya heni, na hiho heni siwang'ulile.
10Mkulu kangulonga, ali ndo ilagano lyondidita na wanhu wa Isilaeli, hogakwete mazuwa ago. Ndowika malajizo gangu mluhala lwao, nakwandika mnhumbula za hewo, heni ndowa Nguluwi wa hewo, na hewo wowa wanhu wa heni.
11Kuduhu nehado yalingumlangusa mkala miyage, wala yalingumlonjela mng'holeze, ‘Umzele Mkulu.’ Kwa vila weng'ha wonzela heni, wadodo na wang'hangala.
12Ndowalechela kwa gala waditile, na sikumbuchila kahi wihe wa hewo.”
13Kwa kulonga mbuli ya ilagano lya sambi, Nguluwi nakalilaliza lila litomile, na cheng'ha chilingulala na kuwa chilalile ng'hatu chahabehi kuka.
