1Yoo, iyeta mene cabu ca cine weebibine bii jijinago, ai ngene atwanena baborage gyene egä mime tääpume pisi nyene cabucewe je iiwäreja babo biname lui te adnatäneji enajenige Acejiyame me camu poto teeme miiji puupu cabu.
2Tabe iiwäreja biname gyene Acejiyame ne awejename mime tääpume pui cabucewe puupu cabu. Peei lui Acejiyame me toraca iiwäreja puupu, ingle peema pisi nyene Acejiyame me toraca mete, lica biname bime ime ca wawenäneji, yepä Acejiyame miji wawenäneji gyene peei mete.
3Yoo, iyeta iiwäreja babo biname teeme kaakesea lui cibu mäju ca Acejiyame ne yiiwäräjusi piiyepu nuuja owecu gwidape teebine yääcärusi. Pui name pi cuta Yeesu mime Iiwäreja Babo Biname te miiji Acejiyame tääpume owecu gwidape ceera, siige tabe teeme tääpe ne ecäruji.
4Yoo, Yeesu liba ai gawecewe cabu enajuji, tabe iiwäreja biname lica ge, ingle ama ibibi iiwäreja biname piti nemi, lui cina Israela biname bime cotre mene cabu ca yiiwäräjemusi.
5Pui iiwäreja biname bime kaakesea lui owowä pana gyene Yeesu me toraca iiwäreja kaakesea tääpume lui gyene cabucewe je. Teeme iiwäreja mete cuta piiyepu owowä pana gyene toracarage mete cabu ca lui cabucewe je. Pui name pi Moose liba gwidape jebasecretnemuji mete wawename Acejiyame tääpume, lui mete cibu tääpe ca wawenäneji ge, Acejiyame piba teebine jejuji egä, “Maane iyeta gwidape pui ootonuta pana cängena jewenemepi, cane lipu meebine itu naawabepene Sinai Podo cabu.” Yoo, peei mene cabu ca mine umle egä pui mete lui owowä pana ge cabucewe mete tääpume.
6Yepä, Yeesu me kaakesea lui baborage gyene Israela iiwäreja biname bime kaakesea cabu ca, piiyepu kirece jajeji mene Yeesu lui ne mime tääpume toraca me jaawenuji, baborage gyene sasa mene cabu ca, ingle pui mene toraca ibibi gyene egä Yeesu te mibibine niiya mule cabu ca nisecrärinuge ten cama iyeteta lenajame.
7Sasa jajeji mene, cotre waweneca piiyepu jäje iiwäreja poto cidi me, ibibi lica ge biname bine kälyä wawenecame. Peei liba ibibi gyene, Acejiyame piba singi lica kirece jajeji mene ceerame.
8Yepä, sasa mene ibibi lica ge, ingle biname bime niiya mule cuta piti nemi. Acejiyame peei poto cidi me jiicuji Oogäräneji Mene cabu egä, “Cane lui Yageyame gäne, cane jijenininine egä, ‘Padare te pa tädepi, cane piba kirece jajeji mene cire jaawenepene Israela biname bime kaakesaare tääpume, cuta piiyepu Yuuda me ingle biname tääpume.
9Ai kirece jajeji mene mara gyene sasa jajeji mene cabu ca, cane lui ne jewenujine teeme niinäce kaakesaare tääpume, cane liba teebibine ime ca sewecnemujine Aikupito gawe cabu ca. Yepä, teepi cäme jajeji mene lica cängena acata wawenecame. Cane peei name pi teebibine kaake me jewenemujine.’”
10Mime Yageyame cuta jiicenige egä, “Yoo, agesa kirece jajeji mene cane ingwe ca cire jaawenepene Israela biname bime tääpume. Cäme cotre bine cane cire yoogäremepene teeme ngenecu bora; teeme ngene atwanena cabu cire yaacitepene. Cane teeme tääpume Acejiyame cirege äbita, cuta teepi cäme biname cirege lenaja.
11Pui padare cabu piba nuuja te lica teeme binamewale bine, coo teeme naniganewale bine cire yaabiberäjemepesi egä, ‘Acejiyame tääpume umle äbitepeye,’ ingle matimati cabu ca modamoda biname me teepi iyeta cäme tääpume umle cama cire yaacrajemepi.
12Yoo, cane teebibine kälyä cire jaawenemepene; cane ingwe ca lica teeme niiya mule bine ngene jaapecnemepene.”
13Siige, peei mene cabu Acejiyame jiicenige egä teeme kirece jajeji mene tuwängle gyene sasa jajeji mene tääpume. Page pui sasa mene te mameta ge ämlita.
