1Da' nga zejechen lao yogo' da' ba gwnia': zoa bx̱oz blao c̱hechon' ben' nac cayaṉe' chazlaže' Diosen', na' ba chi'e yaban' chnabi'e txen len Diosen' ben' nac ḻa'zelagüe beṉe' zaca'.
2Chone' žin gan' zoa X̱ancho Diosen', gague ḻo' yo'o dan' goson beṉac̱h cont yesonxene' ḻe'.
3Na' yogo' bx̱oz blao c̱he beṉe' Israel gualaž c̱hechon' nite' chosonežjue' Diosen' bi da' chosonežjue'ne' na' chesote' beyix̱e' chosolalje' xc̱hemba' lao Diosen'. Na' dan' nac Jesúsen' bx̱oz blao c̱hecho, benen byen bnežjw cuine' blalj xc̱hene' ṉec̱he xtoḻa'chon'.
4Na' šaca' ṉe' zoe' yežlio nga bi naque' bx̱oz, ḻe nita' bx̱oz c̱he beṉe' Israel gualaž c̱hechon' chjasesane' bi da' chjasesane' lao Diosen' con can' ža ley dan' bzoj da' Moisésen'.
5Na' beṉe' ca', chesone' bi da' chesone' ḻo' yodao' da' naquen ca ḻ gua'a ḻsaca' c̱he yaban' gan' zoa Diosen'. Na' ṉezecho naquen ca ḻ gua'a ḻsaca' c̱he yaban' gan' zoa Diosen', ḻe cate' za' gon Moisésen' yodao' dan' chacte chedobe gan' goson bx̱oz ca' žin c̱he Diosen' cani', Diosen' gože'ne': “Yogo' da' ba gwnia' gonḻe, ḻe gonen cayaṉen' blo'eda' le' caten' gwzoacho ḻo ya'an.”
6Na' da' chon Jesúsen', da' xen zaca'chen ca da' cheson bx̱oz c̱he beṉe' Israel gualaž c̱hechon', na' can' gwna Diosen' gaclene' chio' lagüe da' bnežjw cuin Jesúsen' ṉec̱he xtoḻa'chon', ḻecze da' xen zaca'chen ca dan' gože' da' x̱ozxta'ocho ca' cani'.
7Ḻe Diosen' gože' da' x̱ozxta'ocho ca' gac güen c̱hegaque' še yesone' can' ža ley c̱hen', perw bi bosozenague', na' da'nan' byažjen gwdix̱jue' to da' cobe.
8Na' Diosen' bi bebede' ḻegaque', san gwne': Gwžin ža cate' ṉia' to da' cobe da' gona' gaclena' le'e nacle xi'iṉ diaža c̱he beṉe' ca' gosenite' Israel, na' len le'e nacle xi'iṉ diaža c̱he beṉe' ca' gosenite' Judá. Neda' naca' X̱anḻe Dios žia' ca'.
9Nža' can' goša' da' x̱ozxta'ole gona' gaclena' ḻegaque' cani', bži'ilaže'da' ḻegaque' na' bena' cont besyechoje' ḻo na' beṉe' nación Egipto. Ḻegaque' bi gosone' can' goša'ne' cont gac güen c̱hegaque'. Na' da'nan' gwleza' bich goclena'ne', neda' X̱anḻe Dios žia' ca'.
10Na' quinga gona' gaclena' xi'iṉ diaža c̱he le'e nacle beṉe' Israelen' cate' žin ža: Neda' X̱anḻe Dios gona' cont šo' yic̱hjgaque' da' nona' mandadw yesone', na' gona' cont yesyebeden' ḻo' yic̱hjlažda'ogaquen', na' toza' neda' yesejnilaže', na' ḻegaque' yesaque' nación c̱hia'.
11Na' bi yažjen yosozejni'i ḻježe' cont yesombi'e neda', ṉeca yažjen yosozejni'i no beṉe' biše' ḻježe', ḻe cana' yogo'ḻoḻe' yesombi'e neda', bi' bixjw lente beṉe' nac beṉe' gole.
12Canan' yezi'xena' xtoḻa'gaquen', na' bich gona' cuent še bi da' malen' ba gosonen'.
13Na' Diosen' be'e diža' c̱he da' cobe da' gwne' gone' gaclene' nación c̱hechon', na' da'nan' ṉezecho ba bzoe' to šḻa'ale da'na' gože' da' x̱ozxta'ocho ca' cani'. Na' da' gole da' ba bzoe' to šḻa'ale ba zoa yeniten.
