1Pangeklem. Nim angal hambun sao ngo kam ubukl ub non naon baolum aol wesmbao aondao ora ngo kanda, obu heneng ora yu heben bor Aondao Pon Pae ora ngo hayao ndan maomb bo haraoklao on seya oran ki tao nan o bor bereyaol kakl ka.
2Heneng ora naon baolum aol ngo obu yu heben bor and tubal komb bi hobao sao aondao ora ngo hayao on baolum aol wesmbao aondao kongon ora bu hayao o, and tubal komb bi hobao sao aondao ora ngo mbinim mbes su tenaol nao biri bor akol bu hasmi tomb and sel anda bubur, and tubal komb bi ora bu wiyaom kobur mend bu wismi sanda ubi inj yao ora. Ngub inj, and tubal komb bi ngo Aorao Aondao obun mbib bi tangar ubi ora yao.
3Angal mend di Nju semon baolum aol ngo haen lome nda baeben baehaemen inj haen lome nda ka. Ngub inj, mbini baolum aol ngo baebenom Ngaor bor kalo mabaorao haoroklme to bor some sem di ngubi sao baeben lu mabaorao haoru kaloklme ub di, osisao tangar tangar sao hakl di Ngaor bor kalo haen ko ora haen lome nda ka. Ngub bimi ndal naon baolum aol aondao ora ngo ndam di Ngaor bor mabaorao haoru kale non bu menjao hobao sao ora mend kalo haraoklao ora.
4Ngub bu haraoklao naon baolum aol wesmbao aondao ngo obu su enjo ngol bao habur ngub bu hakl beyaon, obu Libaen sem inj yaol obu mbinin baolum aol nao hakl beyao ora. Ngub inj, Nju semon baolum aol heneng baebenom Moseson manom inim Ngaor bor mabaorao ngub haoru kaloklwaebe ke wiyao ub was bu hakl beme ora. Ngub bukl beyao o obum hobao sao tangar ubi ora biyaol, obu non mbini Nju semon baolum aol heneng ngo hakl ubi inj hae ko ora hondoklme ora.
5Pangeklem. Enjo su ngo bor Nju semon baolum aol haeme baebenom ngo bu haroklme nda ub non, yu heben bor baolum aol aondao ora ngo obum ngo bu hayao on menger piksa muwale non bubur bu hayem ol, Mosesom di menger bombor ngub was bu hasao ora. Ngub bisaol mbes Moses obum su tenaol nao biri bor sel anda buklbur bisao tomb, Ngaorom Moses bor njem and ngo ngubi ora bibi ko obun kone mao komba kao kalobur kakl, Njem yu har ne ora bor po hasndis tomb Njem and tubal komb bi ngo ngubi ora bibi ko Menger muwalondis ubi ora bibi ko kao kalisao ora.
6Ngub bisao o Ngaorom ngubi tomb Njises obum baolum aol kongon hobao sao ora ngo bu haen kisao om, mbes Nju semon baolum aol hasmi baebenom naon baolum aol wesmbao aondao ora ngo hayao on menger mubur bu hasmi ub ora men mbayao. Heneng ora obu ngubi ora habur obu Ngaor hesa nao kab kobaranon dunin aol ora hayaol, Ngaorom ini bor heneng ora bisur buklwao kisao nda ub obum heneng ora Njisesom nao bu murukl haen ko haen kisao ora. Ngub bisaol Njisesom nao bu mib bu hobao sao ora ngo beyao om, Ngaorom mbes ora ini bisur buklwao ko angal ngo kisao nda di ora men mbayao ora.
7Heneng ora Ngaorom mbes pibnao Nju sem baeben bu mukl ko nen sabobur mbini obun sem ora haen kobur, baolum aol haen kisao baebenom bismi ub hambun sao ebe ngaorukl pelen bu kowes bib se sokl bisaon, Ngaor obum wakl nim ini hond homo bisur bubur bu muklwao ko angal ngo kisao ub ko mende nao kokl bisao ora.
8Ngub nao lo bisao o tenaol obun sem ngo baebenom obul hul ha nao hasmi sao hondo obum makl homobur kisao sao, mbukl waeb bor di wiyao ub Aorao Aondaon ngub ko hayao. Mabor bao mend bu pindib paklao hakl tomb Nim Njuran sem baeben di su Isreyel tenaol hambun ora Mbini ninao sem ora haen ko Mbini bisur bu, bu muklwao on Angal wen pange ora mend kao kaloklwao ora.
9Mbes nim mbinin ab sumb wil baeben bor Nim ini bisur bu, bu mubur Ini ninao tenaol ora hareklemin lowao ko Kao kalowao ubi inj lowao ora. Mbes ngo tomb non nim mbinim su Isib tuwaen kobur Mbinin ki oral men mubur Nim oborob ora maeb ha kemi powao ora Nim ngo tomb mbini bor Angal ebe hakl mend kao kalowao ol Hul ha nao hae tuwaesmil Nim mbini bor di mesao kalo Nao hende non bubur tuwawao ora ko Aorao Aondaom ngub ko hayao ora.
10Obum ngub ko habur kakl, Bao ndi tibae ngo baeben pibi haklao tomb Nim su Isreyel tenaol ngo baeben hambun ora Bisur bu, bu mubur Mbini ninao sem ora haen lowao on Nim angal tangar wen pange mend kao kaloklwao ora. Nim mbini bor ngo sao ngo sao bibaebe lowao sao di Nao mbib mbinin kone ndaon bor honda win lowao ora. Nim nao man di mbinin hibi umu ndaon bor was Waeb bu ubur lowaon Ni mbinin Ngaor ora haklwaol Mbini di ninao sem ora haklemi.
11Ngub ngo haklemi ora tomb non Aorao Aondao obu es bib se dim nao saoklaol Mondom obun aol sango bor di Njem Aorao Aondao obu ngo hae o hend ko Nao muwaloklao ora. Mondom di obum bombor o hondobur Obun haeme bor njem Aorao Aondao obu ngo hae o hend ko Nao buwalakl birib se soklao ora. Ngub inj Mbini tenaol aondao imbi wi haroklme baeben di Imbi nao wi kang haroklme baeben di Ngo baeben hambunom ni ora hondoklemi ka.
12Ngo ora tomb mbinim khorob bismi sao Mbinin kone bor uklao o hondobur di Nim mbini hond aondao ora homobur lowaon Mbinin kone bor kho ngo uklao o ora mu tuwabur Nim ngon ko mende saongao mar hakol bu Nen nao saboklwao ora ko Aorao Aondaom ko hayao ub mbuk waeb bor ngub wiyao ora.
13Ngub kisaol Ngaor obum mbes pibnao ora obun sem bor nim ini bisur buklwao ora ko angal ngo kisao ndam, tenaol obun sem ngo baeben oborob buri mao pala aondao bu bisur bib nao se ora sisaol hindisesa. Ngub hondobur kisaon obum wakl ko mende obun angal wen pange mend obun sem bor nim ini bisur bu, bu mubur lowaon ini ninao sem ora hareklemin lowao ko kao kalisao ora. Heneng ora obum ngo kisao ub angal wen pange o akl bisao tomb, obun man mbes kisao nda wakl momak hul daol osisao mend ib sam sam bu men kang sobur bum haraoklao nda ub menger e ko hendeyom ka.
