Hebreos 8

1

2

3

4

5

6

7

8

9

10

11

12

13

¹Naꞌa, ca rna lë naꞌ ziꞌa gniaꞌ, nac cni: Zoa queëruꞌ tu bxuz blau cni, Nu naꞌ gröꞌ cuit lëꞌë yubél Dios ga niꞌ röꞌë, rna bëꞌë yehuaꞌ yubá.

²Lëꞌ runëꞌ dxin ca bxuz blau lu latj nactër laꞌy, le nac gdauꞌ nac gdutë, lë naꞌ buchisëꞌ Xanruꞌ, len clëg bunách.

³Dios rucuꞌë yúguꞌtë bxuz blau quië laꞌguꞌë lahuëꞌ Dios yuguꞌ le tuꞌnö́dzj bunách, lencaꞌ xchöncbaꞌ böaꞌ bëdx. Qui lë ni naꞌ ben bayúdx soa caꞌ bi gluꞌë Cristo lahuëꞌ Dios.

⁴Laꞌnaruꞌ zoëꞌ luyú ni, cutu caꞌ gaquëꞌ bxuz, le nacuáꞌteczëꞌ bxuz ni, nup taꞌgúꞌu lahuëꞌ Dios yuguꞌ le tuꞌnö́dzj bunách ca rna bëꞌ zxba queëꞌ Moisés.

⁵Yuguꞌ bxuz ni tunëꞌ dxin qui tu le ruluíꞌz, len le nac ca bxin qui lë naꞌ zoa yehuaꞌ yubá. Cni nac, le gudxtsquëꞌ Moisés Dios catiꞌ ziꞌa uchisëꞌ yuꞌudauꞌ naꞌ náquini guid, gnëꞌ: “Byutscaꞌ, ben yúguꞌtë gdu ca nac lë naꞌ buluiꞌidaꞌ liꞌ lu guiꞌa niꞌ.”

⁶Naꞌa, bxuz blau queëruꞌ ni runëꞌ dxin qui le nactër lsacaꞌ, atiꞌ niꞌa qui le benëꞌ Lëꞌ zoa queëruꞌ tu didzaꞌ rucáꞌn tsahuiꞌ le nactër lsacaꞌ le ruiꞌ didzaꞌ qui le nactër lsacaꞌ gzxiꞌ lu nëꞌë Dios gataꞌ queëruꞌ.

⁷Laꞌnaruꞌ gdap gdutë yöl‑laꞌ huac didzaꞌ naꞌ rucáꞌn tsahuiꞌ gzoa ziꞌal, cutu ben bayúdx soa didzaꞌ buróp ni rucáꞌn tsahuiꞌ.

⁸Naꞌa, Dios ruluꞌë cutu glac gdu dxiꞌa bunách niꞌ catiꞌ bëꞌë didzaꞌ ca naꞌ nayúj lu guich laꞌy, gnëꞌ: Gul‑yutscaꞌ, gnëꞌ Xanruꞌ. Zaꞌc dza Catiꞌ uzóaꞌ tu didzaꞌ cub ucáꞌn tsahuiꞌ, Le gúnlenaꞌ bunách Israel len bunách Judá.

⁹Cutu gac ca guc didzaꞌ niꞌ rucáꞌn tsahuiꞌ, Lë naꞌ bénlenaꞌ xuz xtauꞌquëꞌ, Dza niꞌ gdel‑laꞌa naꞌquëꞌ, Bubijaꞌ lequëꞌ luyú Egipto. Le gulucaꞌnëꞌ didzaꞌ quiaꞌ rucáꞌn tsahuiꞌ, Nedaꞌ bucaꞌnaꞌ lequëꞌ, rnëꞌ Xanruꞌ.

¹⁰Qui lë ni naꞌ, cni gac didzaꞌ ucáꞌn tsahuiꞌ Gúnlenaꞌ bunách Israel Töd yuguꞌ dza niꞌ, rnëꞌ Xanruꞌ. Uchiziaꞌ icj ládxiꞌdauꞌquëꞌ zxba quiaꞌ Len uzujaꞌ lei lu icj ládxiꞌdauꞌquëꞌ. Niꞌr gacaꞌ Dios quequëꞌ Atiꞌ lequëꞌ lacquëꞌ bunách quiaꞌ.

¹¹Cutu gun bayúdx nu usëdi lzëꞌi, gna: Benbëꞌë Xanruꞌ, Le lunbëꞌë nedaꞌ yúguꞌtëꞌ, Ga su lau nu nac caꞌz, Ga gdxintë nu nac blau.

¹²Huechiꞌ ladxaꞌa lequëꞌ, Len unít lahuaꞌ le cunác tsahuiꞌ glunëꞌ, Len cutur tsajneydaꞌ dul‑laꞌ nabágaꞌquëꞌ.

¹³Catiꞌ niꞌ ruꞌë didzaꞌ Dios qui tu didzaꞌ cub rucáꞌn tsahuiꞌ, nac le chbgul lë naꞌ gzoa ziꞌal, atiꞌ chzoa gdua lë naꞌ nagúl len chnac glas.