1Aeni na puku ni ghanaghana ilokani na lei totobo tai bosai vanighau adida na puku ni sonisukaghi te sopou dato i kokou tua tana malei haba tana madolona God.
2Igaa, te lutu tana baebale tapole tabu tana puku ni bona ni holohaba te kisua Lord, te mua kisua na tinoni.
3Mana pukuna na lei puku ni sonisukaghi mughua kara nighi hevei rana heveioli kolua na sukaghi va ta God, ma Jesus ghua dida na puku ni sonisukaghi ke gonia mughua sakai na sukaghi vania God.
4Ke ba ghahaa iani maramana ke, me ke mua manesukaghi, na pukuna na lei manesukaghi tara ghahara tua tana kemana Levi, mara sukaghi taonia nina vetena Moses.
5Gaira tara lutu tana bona ni holohaba, na mareni mana nununi na lei puku ni totobo i kokou. Mi tana bona Moses te gonidila ge ke kisua na baebale tapole tabu idania, God te diki hea na bosadila eni, “Ko righiutoa, ge ko gonighi na lei totobo taonighi na vaughilala tu tatei vanigho i vuvunga ni ghotu.”
6Ma dida na puku ni sonisukaghi, Jesus, God te hea tua na lutu te haba vulea na lutudira rana sonisukaghi ni Jew i sarana na vetena haulaghi, na pukuna gaia te bahughita nia na puku ni totobo uto kolua God, te nia tuturi tana baubahu vaolu te uto vaa.
7Ma ge na vuivuni ni baubahu ke mua hahi ke, me mua manana ge God ke tughua nia na ruani na baubahu.
8Hauvaa God heghena te kene sodoa na hahi tana baubahu haulaghi keri, ge bosa vanira, “Inau na Lord God tu bosaa, ‘Na bongi ke mai ga, inau ku gonia na baubahu vaolu kolura na vure ni Israel mi Judah.
9Na baubahu eni, ke mua vaghaa na baubahu haulaghi tu gonia vanira kolura lei kukuadira tana bona tu huli horura i Egypt, te vagha na mane te hulia na dalena nia na limana. Na pukuna te mua kabuhau didira na taluutuni ta nigua na baubahu, gu soghasanira.
10Mana baubahu vaolu eni ku gonia kolura nia rana vure ni Jew tana bongi keri, ke vagha eni: Inau ku talui nigua na lei vetena tana liodira, mi nau ku gerei tana tobadira, Mi nau ku didira God ma gaira kara nigua na vure.
11Vaho ge kara mua nia sarautu na taraiadira ghadira na komukolu, ma kara mua sarautu ghua na taraiadira na hoghodira, nia na bosa, ‘Te manana ge kau ghilala Lord God.’ Na pukuna na vure udolu te vuivuni tana pile me ke sara tana sule, kara ghilalau inau.
12Inau ku talukehai vanira na lei paludira, mu ku mua ghoi ghanaghana olighi didira na hahi.”
13Tana bona God te nia kokoe na baubahu eni te vaolu, me nea na diki baubahu me liliu ni totobo haulaghi tua, mana hava te haulaghi ke, te dika tua mara dutu ni lavikehaani.
