1Den ana ko baluwasan imi ko duap nunguning mu iwita: Ana nanga Kakirip yawara bo priest supuling ko bagoso. Nu Kaem Sokel Garagar umu ko daiga kuwim duruk wonong te mu ko kuting sengam mu te daigam ale bagoso.
2Nu kuwim laili nunguningkiri wore ningi priest ura beteso. Se kuwim umu kuwim nunguning, Kari Biya kota nungam, aliti kari me nungurman.
3Priest supuling suen la nunga atumu keresan umu, kariimet nuguting munan mel betesan umu se tama bita tua ko munan umu Kaem tusan. Se uwutatala priest supuling biya ana ko baluwasan mu munan bita Kaem tuokko.
4Bare nu ali imi te bagoso le mu, nu priest ko me bagoso le. Mu awuk, ali imi te priest kari alo munan bita Kaem tumonko law ko munan te baluwoso mu maingkala anisan.
5Bare nuna kuwim laili ali imi te mu ningi ura betesan imi, mel nunguning duruk wonong te aniso wore ko dora wore ningi ura betesan. Bore te se, tom Moses sel kawam laili kalokko negawaram mu Kaem den kagin tuam ale mam: “Ura mel suen la bitarko mu, mel suen la ani duruk Sinai te ko dora ka kausem umu turan tala diram la bita saparko.”
6Bare ura Jesus tam ale iluwoso ale ko priest ko bagoso mu, nononga ura mu ilu kiaram ale sokel ago nunguningkiri. Mu awuk, kontrak iru Kaem nu te kaolam mu kontrak laun umu ko sokel kiaram, ale nu ko bala ningo ningo balam.
7Se kontrak laun umu kumik te memek bo mena le mu, anape ko aking bo iru ko?
8Bare Kaem kariimet nunga memek arigam ale balam: “Ani Kari Biya iwita balsam, tom bo taiwoso mu te ani kontrak bo iru Israel kariimet se Judah kariimet nongorak kalikko.
9Se kontrak iru umu kontrak laun ani nunga girigir alo nongorak kalem, ale nunga giem nongorak Egypt beterem ale aratem umu iwita mena ko. Mu awuk, nuna aninga kontrak laun umu diram la me karo tuman se ani abiring gurugu nungarem.
10Ikialko, tom umu tai aratuk mu, ani kontrak iru imi Israel kariimet nongorak kalikko: Ani aga law mu nunga ikia ningi bitirikko, ale nongomang motam ningi batagikko. Ale ani nononga Kaem bagarik, se nuna aninga kariimet bagamonko.
11Se tom umu kariimet bo, ko bo kausokko agi, kariimet bo ko launuria manuk ale ‘Kari Biya ko ikiko,’ ma balukko tom bo mena. Mu awuk, nuna suen la, nunup mena ta nama nunup bibiya ago ta, nuna suen la aninga ikimonko.
12Se ani nunga memek suen la siwu warik ale ko angamili sapa namarukko.”
13Kaem kontrak umu ko balam iru mam umu te kontrak laun umu ko sokel menawuram. Se ana ikisan, mel sokel menaso ale tuwunaso mu eng am nama menaso.
