1Nò, soini ka ignangon ku. Duon on ka soini no kanta no Labow to mgo Talagpanubad no impapinnuu sikandin dio to kawanan to Magboboot no ian lagboy no mabogbog no dio to Langit.
2No si Hisus on ka Labow to mgo Talagpanubad tanow no duon to sikan no tu-tuu ian no Kinaroyawan no Ampuanan no dio to Langit no nighimu to Magboboot, no kono atag ka nighimu to mgo otow.
3Ka mgo Labow to mgo Talagpanubad to sikan no ampuanan no kai to tano, ian naabin to oyow igbogoy ran dio to Magboboot ka tibo no igbogoy to mgo otow woy ka mgo ayam no ogpohimatayan no igtubad. Sikan ian to, ka kanta Labow no Igbuyag to Talagpanubad, songo duon igbogoy rin to Magboboot.
4Di ko kai pad si Hisus to tano, kono poron ogkohimu no talagpanubad sikandin su duon dod ka tahan no mgo talagpanubad no og-ayun to Balaod ni Moisis.
5Ka oghimuon to sikan no mgo talagpanubad no kai to tano, tigbal do no ogkoiling woy ogkounawa ro to alung to sikan no tu-tuu ian no Kinaroyawan no Ampuanan no dio to Langit. Ogkounawa ian ki Moisis dongan, su to nigpohimu on ka Magboboot kandin to sikan no tagooran no ampuanan, kagi rin ki Moisis to, “Og-awoson to og-unugan nu ka impapitow ku koykow no dio ka pad to bubungan.”
6Di ka katondanan ni Hisus dio to Langit to igpataliwaro kanta to Magboboot, madmaroyow to sikan no katondanan no ogpakaalap to sikan no tahan no mgo talagpanubad to mgo Hudiu. Ian su madmaroyow ka dalan no ogkohimu on to sikan no iam no sabut to Magboboot, su dio ogligkat to sikan no madmaroyow no innangon din.
7Ian su, ka sikan no an-anayan no sabut, kono ogpakabulig kanta. Su ko makabulig pa, kono poron og-awoson to ogliwanan to iam no sabut.
8Di nigsamilian to Magboboot ka mgo otow to soini no impasulat din. Kagi to sulat to, “Kagi to Lagboy no Igbuyag ta to, ‘Duon allow uromo no oghimuon ku kaiam no sabut to mgo pinanganak ni Israil woy dio to mgo pinanganak ni Huda.
9Ka soini no iam no sabut, kono ogkounawa to sikan no tahan no insabut ku dongan to mgo kaap-apuan dan to sikan no allow to nigduma kud sikandan ligkat to ugpaan to Ehipto. Ian su waro dan paragasa ka pogtuman to sikan no sabut ku kandan. Sikan ian to nig-iniugan ku sikandan,’ ” kagi rin.
10“ ‘Nò,’ kagi to Lagboy no Igbuyag ta to, ‘Soini ka iam no sabut ku no oghimuon ku uromo to mgo pinanganak ni Israil. Ka mgo Balaod ku, igsabuk ku dio to doromdom dan woy dio ku igsulat to goinawa ran. No ogkohimu ad on no Magboboot dan. No sikandan, songo ogkohimu on no mgo sakup ku.
11No konad on og-awoson to duon ka agad hontow no og-anad to duma ran tongod kanak su ogkatagaan ad on to tibo no mgo otow taman to kinaintokan to ngaran.
12Ian su ogkohoy-uan ku sikandan no makasasalo woy kono kud on ogdoromdomon ka maroot no nohimu ran,’ kagi to Magboboot.”
13Nò, to poghingaran din to soini to iam no sabut din, impohitaga to Magboboot to ogkatahan ka sikan no an-anayan no sabut. No agad nokoy no ogkatahan on, konad on og-awoson di ogkaawo do to konad on ogkalugoy.
