Iburu 3

1

2

3

4

5

6

7

8

9

10

11

12

13

¹Irarighọ, inyọghuo-mhẹ ni Ẹshinẹgba ọ zẹ ni e khi ẹgbọ ni e pfuasẹ eyọli, a sa ingme oyi iJesu ni awa lui aghiusomhi na kẹẹ, ali Ọga ọyi ekpodalo ugamhi nya.

²Eri ọ ri igẹsikia deba Ẹshinẹgba, ni ọ zẹ ọli ọ ke gbe akanya eyọli, ẹzẹzẹ abi iMosisi ọni ọọ ga ọ li ri igẹsikia gbe akanya elemhi Owa oyi Ẹshinẹgba.

³A she mẹ khi iJesu ọ mhuẹ imuẹloe ni o fu dọsẹ oyi iMosisi, ẹzẹzẹ abi atsọna ọ liẹ mhọli imuẹloe ni o fu dọsẹ owa ni ọ tọ.

⁴A kie kpẹ lẹsẹ khi ọgbọ ọọ tọ owa kpa, Ẹshinẹgba ọ ma emhikpa.

⁵IMosisi ọ khi ọgbọ igẹsikia elemhi Owa oyi Ẹshinẹgba abi ọni ọọ ga. Akanya ni ọ gbe o khi ọtsẹlẹ oyi igẹsikia oyi emini a ya ngme ogbe na akọ.

⁶Ama iKirisiti ọ khi Omi Ẹshinẹgba ni ọ mhẹsẹ ẹ shi Owa ugamhi oyọli. Owa oyọli awa khi ini awa da kie mu igbedu ali irudushi oyawa ni awa regbenga mhuẹ ne.

⁷Irarighọ, abi Ayẹmhẹ-nọ-pfuasẹ ọ ngme, ni ọọ, “A kha suọ uruli oyi Ẹshinẹgba amo,

⁸a khi zese udu-a, abi eni e bia ẹ e li ẹghẹghẹ ni e rọ ọ riẹlẹ umha-suesọ deba Ẹshinẹgba. Ẹghẹghẹ ni a rọ la ọdagbe ifufu mu wẹ fẹ,

⁹ikhi obini ita ẹ e la mu mhẹ fẹ, mhẹsẹ mhẹ bino, e mẹ emini mhi riẹlẹ elemhi ikpe egbhuẹva

¹⁰Lọli o zẹ ni elemhi e rọ bi mhẹ deba oni agbhotu oghọ, ni mhi rọ liẹ, ‘Ẹghẹghẹ kpa udu oyẹwẹ o rọ rẹwẹ lo ebuli, ẹa lẹsẹ odẹ eyẹmhẹ.’

¹¹Irarighọ, mhi rọ ri elemhi-ibibi shi-ẹmuẹ liẹ, ‘Ẹa ya tigbe lo iyẹmhẹa oyẹmhẹ.’ ”

¹²Inyọghuo, a mu egbe ẹ ini ọngẹ ẹ ọ khi mhọli udu umha-miesuọ, ni ọ ya lase odẹ oyi Ẹshinẹgba ni ọ la ọ le.

¹³Ochoghọ a ke ye egbe ẹ ude, itobọ khi, “Amo.” Oni ẹghẹghẹ o kie la ọ, ni a rọ ọ mu pfi, ini udimhi ni olamhẹ ọọ di ọgbọ o khi ri ọngẹ ẹ zese udu-a.

¹⁴Eni e kuma iKirisiti ọ awa khi ini awa lolo mu igbedu ni awa rọte ekẹ mhọli mhuẹ ya ramhi ukpẹsẹ.

¹⁵Abi Ebe-no-pfuasẹ o ngme. “Ini u suọ uruli oyi Ẹshinẹgba amo, a khi zese udu-a, abi eni e bia ẹ e li ẹghẹghẹ ni e rọ ọ riẹlẹ umha-suesọ deba Ẹshinẹgba.”

¹⁶Eghuo e khi eni ẹgbọ ni e suọ uruli oyi Ẹshinẹgba ni e riẹlẹ umha suọ esọ deba li? Ọa khi eni iMosisi ọ rọte ekẹ iJipiti rue lasele?

¹⁷Eghuo ọ biselemhi deba ikpe egbhuẹva? Ọa khi eni e lamhẹ, ni e ghuloa shi ọdagbe ifufu?

¹⁸Eghuo Ẹshinẹgba ọ shi ẹmuẹ deba khi ẹa ya tigbe lo iyẹmhẹa, ọa khi eni ẹa suọ esọ na li?

¹⁹Irarighọ, awa mẹ khi itobọ umha-miesuọ oyẹwẹ ẹa rọ dobẹ lo.