Hebreos 8

1

2

3

4

5

6

7

8

9

10

11

12

13

¹Per mastre precisy kaknan do nii lëë xaa nii nak xipxosy no sob kwi Dios leñ kpaa,

²aan lëë xaa nak pxosy lo pkoog nii psaa Dios. Psaady chol meño.

³Kchë pxosy nii mastre non xso par kokon xaa cos, ni kuty xaa ma nii tsokon. Por ngo, wi Crist no nii kokon.

⁴Deelñee nsyo xaa lo kislyu, ni nyakty xaa pxosy, por no pxosy nii xkokon kchë nii xñabey xley Moisés.

⁵Per nak kchë nii chuuñtsyey pxosy ko sinak xmalë nii chak leñ kpaa. Ndon no nii nako sinak tu malë, por worñee nsaa Moisés pkoog, chëb Dios lo xaa: “Buy, aan psaaw sinak nyaa nii bluyaa lool kik kiy.”

⁶Per mastre buen tsiiñ nii chuuñtsyey xipxosy no, por lëë xaa xtsig meñ lo Dios, aan lëë Dios chëb nii singo kuuñtsyey xaa.

⁷Deelñee nyak tubli tiits nii pxaal Dios lo Moisés, nguiiñdy nii nxaal Dios xtiits stub.

⁸Per kon Dios nii pchilody nyuñ meñ cumplir xley Moisés. Por ngo lëë Dios chëb: Sitsib tse nii lëën kxal tiits kub lo meñ Israel ni lo meñ Judá.

⁹Kaktyo sinak tiits nii psanaa lo pxosykoltoo meñ go, tse nii kwlin xaa xtañ meñ Egipto. Aan como psoobty xaa tiits, lëë xaa psanaa.

¹⁰Sinrii kak tiits nii ksanaa lo meñ Israel tsiñee lëë tse go tsitsiñ: Leñ kik meñ go jkën xtitsaa, ni leñ styoo meñ go kono. Tsigo naa kak xDios meñ go, ni lëë meñ go kak meñ tu kyedzyaa.

¹¹Jkiiñtre nii kuuñ kseedy lsa meñ xcombañer, parñee kyuumbey meñ naa, por kchë meñ kyuumbey naa, destye xaa wiñ axte xaa kol.

¹²Naa ktsily xtol meñ go aan tsitsibtre tse nii ksaladzyaa xtol meñ go.

¹³Tsiñee xñee Dios nii lëë xaa kxaal tu tiits kub, nyoo nii lëë nii pxaal xaa klo kwyox, aan klyëëdre lëë nii kwyox ko kpichee.