1Keu jizini, miaŋgö keu kötŋi bohonŋi mi kewö: Nini mönö jike nup galöm bohoninambuk akzin. Bohonini yaŋön mönö Suep mire öŋgöba Öŋgöŋgöŋamnini yaŋgö jakömbuak dum tatat qöhöröŋe böröŋi ölŋe tatza.
2Opo seri jike ölŋi mi Suepnöŋ ahöza. Mi gölme azinöŋ memeŋi qahöpmö, Kembunöŋ nanŋak mi meyök. Jike nup galöm bohonini yaŋön mönö opo seri jikegö oleŋi töröŋi kötökŋi miaŋgöreŋ mala Anutu welenŋi qemamgö nupŋi memakza.
3Gölmegö jike nup galöm bohonŋi pakpak mi naluk kalem Anutugöra ala sömbupnöŋ jöwöwöl ohoba malmegöra kuŋgum eŋgimakzin. Miaŋgö dop jike nup galöm bohonini Jisösnöŋ mewöŋanök nanŋi Anutugö nalukŋa al waŋgiyök.
4Mosesgö Köna keugö dop naluk kalem Anutugöra alakingöra azi lök kuŋgum eŋgigetka malje. Miaŋgöra jike nup galöm bohonini miaŋön gölmenöŋ malbawak ewö, yaŋön mönö gölmegö jike nup galömŋi akŋamgö osibawak.
5Gölmegö jike nup galöm yeŋön gölmegö jöwöwöl jikenöŋ Anutu welenŋi qebingö nupŋi memakze. Jike miaŋön mönö Suep jike kömbukŋaŋgö söpsöpŋi aka imutŋi akza. Mosesnöŋ jike kömbukŋi opo serinöŋ memamgö ahöhi, nalö miaŋgöreŋ Anutunöŋ Suep jikeŋaŋgö areŋi mi indelök. Indel teköba galöm meme keuŋi kewö jii mörök, “Mötnöŋ, kunduŋe malnöŋga areŋ kondel gihiali, yuai pakpak mönö miaŋgö dop törörök wuataŋgöba memam.” Miaŋgö dop opo serinöŋ jöwöwöl jike meiga miaŋön mönö Suep jikegö korembiŋi ahök.
6Anutunöŋ oyaeŋkoyaeŋ akingö jöhöjöhö keu dölökŋi neŋgiiga miaŋön jöhöjöhö keu walŋi oŋgita ölöp sorokŋi akza. Jöhöjöhö keu miaŋön areŋ dölökŋaŋgö tandöŋi akza. Jöhöjöhö areŋ dölökŋi miaŋön mönö areŋ walŋi oŋgita qetbuŋaŋambuk akza. Qetbuŋa miaŋgö dop Jisösnöŋ jöhöjöhö areŋ dölökŋaŋgö nupŋi ölöp sorokŋi mi buŋa qem aŋguba Anutu aka ambazip sutnine kinda bauköm neŋgimakza. Nupŋi miaŋön mönö gölmegö jike nup memeŋi mi gwötpuk oŋgita aködamunŋambuk akza.
7Jöhöjöhö areŋ mutukŋan keuŋi qahö aka dop kölbawak ewö, jöhöjöhö areŋ könaŋgepŋan asuhumapköra öne qahö mamböt-pinak.
8Mewömö, ambazipnöŋ töndup böligetka Anutunöŋ könaŋini miwikŋaiba jim eŋgiba kewö jiyök, “Kembu nöŋön kewö jizal: Mötket! Nalö kun kam kuŋgumawi, miaŋgöreŋ Israel kambu aka Juda kambu embuk jöhöjöhö areŋ dölökŋi akŋam.
9Nöŋön ambösakonurupŋini böröŋine memba Ijipt kantrinöhök eŋguaŋgitpiga yaigep kagetka yembuk jöhöjöhö areŋ ahalmö, yeŋön nöŋgö jöhöjöhö areŋ mi qahö qekötahöba tem kölget. Miaŋgöra nöŋön mewöŋanök i andö eŋguyal. Kembu nöŋön mewö jizal. Jöhöjöhö areŋ dölökŋi akŋami, mi Buŋa keu walŋaŋgö dop qahö.
10Mewö qahöpmö, nalö miaŋön kam kuŋguiga Kembu nöŋön mönö Israel könagesö yembuk jöhöjöhö areŋ dölökŋi kewö aka jimam: Nöŋön mönö nani Köna keuni pakpak mi yeŋgö mötmötŋine ala uruŋine kimbi ewö ohobi ahöma. Mewö aka yeŋgö Anutuŋini akiga yeŋön mönö nöŋgö könagesöni aka malme.
11Nalö miaŋgöreŋ ketaŋi moröŋi mi körekmakörek nöŋgö könani möt yaköba malme. Miaŋgöra böhi kunöŋ Kembugö könaŋi mötmegöra sutŋine qahö kusum eŋgiba malma. Datŋan munŋaŋgöra kewö qahö jima, ‘Gi mönö Kembu möt yaköman.’
12Kewögöra ni möt yaköm niŋgiba malme: Nöŋön ahakmemeŋini bölöŋi mi saŋgoŋda mosötmam. Siŋgisöndokŋinaŋgöra mönö ölum nuŋgui mi qahö toroqeba mötmörimam.”
13Anutunöŋ jöhöjöhgöra “Dölökŋi” jiba mewö miaŋön jöhöjöhö areŋ mutukŋaŋgöra “Mönö walŋi ahök,” jiiga könaŋi mewö asuhuyök. Keu areŋ kunöŋ nalö köröpŋi ahöba walŋi akzawi, miaŋön mönö ayapkömamgö dop akza. Mewö.
