1Mande yeteto ŋuro murí ŋuko ŋandiro. Uni ŋunde quko noreŋo o qa-qa unindoro tapá uninani tunoqaró, ene wiri yerete uni parámi horémboro kandí kondésina samboko kunditaró.
2Huru-huru koro Tuwi Yamaru hamó ŋuno kho teyote. Yamaru hamó ŋuko unindo kama towaŋgurí. Kini. Uni Parámi eneŋombo towaró.
3Hamó, o qa-qa unindoro tapá uni soso khoye tero o Anutu te inoro o qa-qa taŋgurí. Asa ko Yesu ŋuya khoyó tero oka rero te inaró.
4Ŋunde ŋuroko enendo nokono yote tiníqo, o qa-qa uni kama yoweya. Dokoro, pukoyó meyowomboro sowe qundo hutuŋo mande howero o qa-qa teyoteŋgo.
5Uni ŋundo Anutu koro pase ŋuno o qa-qa kho teyoteŋgo. Quko ŋu pase ŋuko pase horé samboko yote ŋuro rokóŋo ŋunde naŋge. Komo Moses Anutu koro pase ka towowero taró quno ŋuno Anutuko ŋande miraró, “Ke rokó ŋu mira purímo witú kerenowó ŋu okeyá ta howero tuwi yamaru towo qembe.”
6Quko Yesuko o qa-qa kho ka raró, kho ŋuko o qa-qa uni meyowomboro khoye ŋu takate. Dokoro enendo mande kondé ka sopoyote, ko mande kondé ŋuro keweroko uni tunoqaró. Mande kondé keta ŋundo mande kondé komo qu ŋu takate. Dokoro Anutuko noreya mande kusiyaró. Ko mande kusiyote ŋundo mande komo kusiyoro yunaró ŋu takate.
7Qeni, ko mande kondé korete ŋundo meté horé taró tiníqo, asa Anutuko mande kondé kaŋuya kama teweya.
8Quko uniparetoro quhuríye rihimoro ŋande yaró, “Uni Parámimbo ŋande yete, ‘Qeni, imemoŋgo ta mande kondé keta qu Israel koro wini quya Juda koro sowe quya tewano.
9Komo Isip noŋgo usi-siye kandeyemo yondoworo mahenowó. Ŋu naruko ŋuno eneya mande kondé ka tanowó. Quko mande kondé keta ŋako komo quro kiraró qembe kini. Dokoro usi-siyembo neneŋo mande kondé ŋu kama howaŋgurí. Ŋunde tiqo, huwó yerenowó.
10Mande kondé keta ŋa imemoŋgo Israel uniparetoya tewano ŋuko ŋandiro: Neneŋo hutuŋo mandene rero iŋo-iŋoyemo rewano, mande ŋu rero newondeyemo nakayáŋowano. Nondo eneŋo Anutuye yowano, enendo neneŋo uniparene yowaŋgo.
11Ko uni kato topoye iŋo-iŋo rondaqe yunoro ŋande kama yewaŋgo, “Uni Parámimboro ŋa iŋo inoyi.” Kini, uni owéye moré kini quya uni owéye moré qu, asa, unipare soso ŋundo niyoro iŋowaŋgo.
12Dokoro, otete piyimi teyoteŋgo ŋuro sikíye te yunoro quhuríye se rotoro ŋuro pitu ko kama iŋowano.’”
13Anutuko mande kondé keta karo yaró. Ŋunde yero mande kondé korete qu riní kina yote. Ko mande kina yote ŋundo waka ta kini teweya.
