Waebulaniya 8

1

2

3

4

5

6

7

8

9

10

11

12

13

¹Imbuli ng'ulu kubita ghose ghatulongile, iyo ino, tuna Mtambika mkulu iyakalile lubali lwe kujilo lwe chighoda che undewa che Mkulu ako kulanga.

²Yeye kosang'ana ka mtambika mkulu hanu hala haenzeluke kubita hanu hohose, hane bumbulika lye Imulungu lya kweli, ilitsengighwe ne Imtwatsa, si ne iwanu bae iwatsengile.

³Chila mtambika mkulu kosaghulighwa amlapfile Imulungu ghweko ne nambiko, lelo mtambika wetu mkulu kabamighwa yawe na chinu cho ukumlapfila Imulungu.

⁴Ka ang'awile wa hano muisi, ang'alekile kuwa mtambika mbe, kwaapfila ma kuna watambika iwolapfa ghweko ka pfaghalaghitse Ghamalaghitso gheng'ighwe Musa ne Imulungu.

⁵Nawo wosang'ana aghala igheghala na ghumfano au sisila lya ighali kulanga. Pfipfo Musa habamile kutsenga bumbulika lila, kalongelighwa ne Imulungu, “Ulole, utsenge ka pfulangusighwe haukalile kuchidunda.”

⁶Lekeni sambi Yesu keng'ighwa isang'ano ya ukutambika inoghile kubita yawo, ka pfayali mlamlitsi wa laghano ilinoghile kubita laghano lila, kwaapfila lima mne ipfinu pfinoghile ghendo pfalongile Imulungu.

⁷Kwaapfila ka laghano lila ililongole ng'aliwile na totso bae, ng'alibamighwa bae laghano lya keli.

⁸Lekeni Imulungu kona matotso kwe iwanu wake, kalonga, “Imtwatsa kolonga, ghamatsuwa ghakutsa, hanitsakwika laghano lya sambi ne iwanu wa Isiraeli ne iwanu wa Yuda.

⁹Ng'alitseghala bae ne laghano lyanyikile ne iwabala wawo, ghamatsuwa ghala haniwakindile ghamoko na kuwalongotsa walawe mne isi ya Misiri. Kwaapfila ng'awakindile laghano lyangu, na nene tsaniwalema.

¹⁰Lekeni alino laghano lyanitsotenda ne iwanu wa Isiraeli, hambele ha ghamatsuwa agho, nitsakwika ghamalaghitso ghangu mne tsimbutsi tsawo, nitsoghandika mne mimoyo yawo, Nitsakuwa Imulungu wawo, nawo watsakuwa iwanu wangu.

¹¹Kuduhu imunu yatsomlangulitsa miyaghe, au kumlongela ndughu yake, ‘Mmanye Imtwatsa’ kwaapfila wose iwanu wakulu ne iwadodo watsonimanya.

¹²Nitsowaleghusila matotso ghawo na nzambi tsawo sitsotsipfikitsa keli.”

¹³Kwa kulilonga laghano lya sambi, kalitenda lila lya mwanduso lilale, na chinu chochose ichilala cha habehi kuhupa.