HEREVA LADA-ISIDIA 10

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Solomon ena hereva lada-isidia: Aonega merona ese tamana e hamoaleamu, a kavakava merona ese sinana lalona e hahisihisiamu.

²Kara dika amo e abimu kohudia ese namo se habadaiamu, a kara maoromaoro ese mase amo e haherauamu.

³Iehova ese kara maoromaoro taudia na edia hitolo ai se rakatanidia, a kara dika taudia edia ura dikadika e laodia ahumu.

⁴Ima manokana ese ogoḡami e havaraiamu, a ima-lalo-ani tauna imana ese taḡa e habadaiamu.

⁵Ḡeiḡei negana ai aniani e habouamu merona na lalo-parara merona, a taboro negana ai e mahuta hedavauhemu merona ese hemarai e havaraiamu.

⁶Kara maoromaoro tauna kwarana ai hahenamo na e kaumu, a kara dika tauna uduna ai daḡedaḡe e mia hehunimu.

⁷Kara maoromaoro tauna ilalo-taona na mai hahenamona, a kara dika tauna ladana baine hogohogo.

⁸Lalona e aonegamu tauna ese haheḡani baine badinadia, a udu-mauri tauna baine dika vaitani.

⁹E raka momokanimu tauna na e rakamu mai namona ida, a e raka gageva-gagevamu tauna na ena kerere baine hedinarai.

¹⁰Matana e kunumaiamu tauna ese hekwakwanai e havaraiamu, a sisiba herevadia igwauraidia se garimu tauna ese maino e havaraiamu.

¹¹Kara maoromaoro tauna uduna amo mauri e lohilohiamu, a kara dika tauna uduna ai daḡedaḡe e mia hehunimu.

¹²Inai ese heiri-heiri e havaraiamu, a lalokau ese kerere iboudiai e ḡovadiamu.

¹³Lalo-parara tauna bibinana ai aonega e hedinaraimu, a lalo-duhu tauna doruna ai na hekwadi auna mia.

¹⁴Aonega taudia ese edia diba e habadaiamu, a kavakava tauna ena udu-mauri ese hahedika e mailaiamu.

¹⁵Taḡa tauna ena taḡa na ena hanua aukana, a ogoḡami taudia na edia ogoḡami ese e hadikadiamu.

¹⁶Kara maoromaoro tauna davana be mauri e davariamu, a kara dika tawla ahuna be ena dika e habadaiamu.

¹⁷Hahediba herevadia e kamonaimu tauna na mauri dalana ai e rakamu, a sisiba herevadia e dadaraidiamu tauna na e raka kereremu.

¹⁸Inai e huniamu tauna bibinana na e koikoimu, bona hahebade herevadia e gwauraimu tauna na kavakava tauna.

¹⁹Hereva momo ese kara kerere e havaradiamu, a uduna bibinadia e rudiamu tauna na mai aonegana.

²⁰Kara maoromaoro tauna malana na silver namo-hereana, a kara dika tauna darana na negenege ḡauna.

²¹Kara maoromaoro tauna bibinana ese hutuma e ubudiamu, a kavakava taudia na asi daradia dainai e masemu.

²²Iehova ena hahenamo ese taḡa e habadaiamu, bona lalo-hisihisi sina taina se atoa kaumu.

²³Kavakava tauna ese kara dika na ena gadara ai e halaoamu, a lalo-parara tauna ese aonega karadia e moalelaimu.

²⁴Kara dika tauna ese e garilaiamu ḡauna na ienai baine kau, a kara maoromaoro tauna ena ura na baine abia.

²⁵Lai gubana e toamu, murinai kara dika tauna na lasihia, a kara maoromaoro tauna na e gini hanaihanaimu.

²⁶Inuinu ḡauna iditana mamina taunimanima isedia ai, eiava kwalahu heḡarana matadia ai, kunu-metau tauna na unuheto, e siaiamu taudia ediai.

²⁷Iehova igari-henina ese mauri e hadaudauamu, a kara dika tauna ena mauri laḡanidia bae gadoi.

²⁸Kara maoromaoro tauna ena helaro na moale ai e gugurumu, a kara dika tauna na ena helaro ai baine baia.

²⁹Iehova na goada gabuna, kara maoromaoro tauna enai, a ia na hahebua-tari, kara dika taudia ediai.

³⁰Kara maoromaoro tauna na basine heabi oho, a kara dika taudia na tano ai basie noho.

³¹Kara maoromaoro tauna uduna amo aonega e lasimu, a mala gageva-gagevana na baine heutu oho.

³²Kara maoromaoro tauna bibinana na heabi-dae herevadia mai dibana, a kara dika taudia ududia na gagageva-gagageva.