Text copied!
CopyCompare
Kâte Bible - Muqâqiŋ Dâŋ

Muqâqiŋ Dâŋ 10

Help us?
Click on verse(s) to share them!
1Motec moc maŋɋârâŋhec juocmu e mamac‐ticne bubiaŋ qacneocmu; â motec mutucnezi ine neŋgoc‐ticne ʒâic busâqoc bâfuacneocmu.
2Wiac sindaŋne ehuc moneŋ mafa bâbâfua izi sâcne mi bafic‐nâpoocmu, bâmec bapa giezi ine hâmockonec batarac‐nâpoocmu.
3Wofuŋ e ŋic tiŋne jaŋe nânâre hâmo sipiric eniŋte mi manasuekac, ehuc ŋic hehesicne jaŋe râsi ejarehuc buchâro‐jeŋic qame wahaekac.
4Ŋic ojoŋnezi hapetac erâ juocmu, gie ʒoɋachec baocmuzi ine moneŋ mafahec eocmu.
5Ŋic mamanaheczi qa roro dameŋ maickeme nânâ wiac qa roro eocmu, â moc e qa roro dameŋko guŋ foocmuzi ine wiac miminehec bâfuaocmu.
6Ŋic biaŋnere faio wiac biaŋne jaha feocmu, â ŋic sindaŋne e maŋticnao ʒârâ foekac i dâŋticnezi tapa baekac.
7Ŋic biaŋne jaŋe ehâmo‐nârehuc jumbiŋte manasuc‐jopaeŋgopeneŋ, â ŋic sindaŋne jaŋere ine biac nikec‐nâpoekac.
8Ŋic mamanahec jaŋe mumutâc dâŋ mana maŋ eeŋgopieŋ, dâŋ racne mueŋgopieŋ jaŋe ine sipirickeniŋmu.
9Ŋic sioc tâmiriczi wama faio juhâc qâhâmoocmu, ŋic siochec ere fuŋne ine biac bataniŋkeniŋmu.
10Ŋic moc e bahac hesoŋkehuc ʒârâ hâriŋ bâfuaocmu, â moc e wiac mocte maname sâqoreme mufuahuc wamare gie baocmu.
11Ŋic biaŋnere dâŋzi jujure opâ ʒâŋe tinac eekac, â ŋic sindaŋne e maŋticnao ʒârâ foekac i dâŋticnezi tapa baekac.
12Qaqaisoc eeŋgopieŋ ŋic i jaŋe ʒika bâfuaeŋgopieŋ, â ŋic maŋjauŋhec jaŋe ine ŋic âgofâc‐jeŋic jaŋere bahac hone qâoma eeŋgopieŋ.
13Ŋic mamanahec jaŋe dâŋ fârine jaha mueŋgopieŋ, ŋic mutuc matacne jaŋe ine bâtiŋ‐jopazo.
14Ŋic maŋɋârâŋhec jaŋe mamana sâko fua‐jareocte ʒoɋac sâko eeŋgopieŋ, ŋic mutuc matacne jaŋe ine dâŋ mupie sisipiric fuaekac.
15Ŋic mafa sâkohec e moneŋ mafa‐ticnezi bafickeekac, â ŋic qarâ suriŋne jaŋe ine hapetac juku sipirickeeŋgopieŋ.
16Ŋic biaŋne e juju‐ticnere fârine jujuhâmo bâfuaekac, â ŋic hehesicne ine juju‐ticnere fârine sisipiric bâfuaekac.
17Ŋic moc e mu bâtiŋ ecnepie mana maŋ erâ sâcne juocmu, â ŋic moc mu bâtiŋ ecnepie qikiŋnerâ hata qâsorieocmu.
18Ŋic moc e burecdâŋ muocmuzi ŋic âgofâc‐ticne qaisoc‐jopaocmu, â moc e gupe micko âkec eocmuzi ine ŋic mutuc matacne erâ juocmu.

19Sâqocne bâfuazo eeŋgopieŋ ŋic i jaŋe dâŋ bocjaha woseeŋgopieŋ, â ŋic maŋɋârâŋhec jaŋe ine dâŋ afecne sawa mueŋgopieŋ.
20Ŋic biaŋnere dâŋ i siliwa ɋaɋacne irec sâc, â ŋic sindaŋnere maŋ mamanasu izi ine wiac fâri tâmiric.
21Ŋic biaŋnere dâŋzi ŋic ŋokac bocjaha bafic‐jopaekac, ŋic mutuc matacne jaŋe ine mutuc‐jeŋicte erâ hâmoeŋgopieŋ.
22Wofuŋzi ŋic moc jambuŋkeme wiac fofo dunduŋ focneocmu, ehame ŋic e jahac ʒoɋac ehuc wiac moc ʒuhuckerâ bâbâfua i sâcne mi eocmu.
23Ŋic mutucnezi wiac hehesicne ehuc aŋac manaekac, â ŋic mamanaheczi ine maŋɋârâŋte maname wiac biaŋne eekac.
24Ŋic tiŋne e wiac irec me irec ecneocmu sâc bâfuaocmu, â ŋic sindaŋne e ine wiac irec me irec hâwickeocmu i hâcne fuacneocmu.
25Ŋic sindaŋne jaŋe sisipiricte mâŋâŋ ɋicwânʒâŋneheczi ficne suec‐jopame siroweeŋgopieŋ, â ŋic sioc tâmiric jaŋe ine dameŋ sâc juhâc qâhâmoeŋgopieŋ.
26Go ŋic ojoŋnezi gore gie moc baocte mi mucnezemec, e saŋeŋ me ʒamaŋ nâpene micsiec‐nâŋec ariweekac irec sâc, me ʒoczi hosâc‐nâpome ʒâŋe‐nâŋeczi hâhâtâweekac iŋucne.
27Go Wofuŋ araŋ bacnehuc dameŋ ʒora jufecmu, ŋic sindaŋne jaŋe ine dameŋ‐jeŋic mi maickeha biac hâmoeŋgopieŋ.
28Ŋic tiŋne jaŋe wiac biaŋnere mamanac juhuc bubiaŋ faio jueŋgopieŋ, â ŋic sindaŋne jaŋe ine wiac irec me irec mamanac sawa jueŋgopieŋ.
29Wofuŋ e ŋic bahacmâc jaŋe ŋezic‐jopaekac â ŋic hehesicne jaŋe ine bâsirowec‐jopaekac.
30E ŋic tiŋne jaŋe juju‐jeŋickonec batac bawarec mi ejareocmu, ŋic sindaŋne jaŋe ine mâreŋ‐jeŋicko mi ŋehâmoniŋmu.
31Ŋic tiŋne jaŋere mickonec maŋɋârâŋ dâŋ sawa wahaekac, ŋic sindaŋne jaŋe nameŋ‐jeŋic ine hetâcne behec ezo.
32Ŋic tiŋne jaŋe dâŋ biaŋne mueŋgopieŋ, â ŋic sindaŋne jaŋe ine dâŋ simbiŋne mueŋgopieŋ.