Text copied!
CopyCompare
Buk Baibel long tokples Motu - HEREVA LADA-ISIDIA

HEREVA LADA-ISIDIA 23

Help us?
Click on verse(s) to share them!
1Pavapava ida bavaniani hebou negana ai, vairamu ai ḡaudia ba itadia namonamo;
2bema aniani dika taumu, bavani heita heni.
3Ena aniani manokadia basio hekise-hekise henidia, badina be idia na hedibaḡani anianidia.
4Taḡa iabina basio hekwarahilaia; a iabina boma hadokoa, boma aonega.
5O roha heniamu negana ai na e pukimu; badina be asi kaimana hanina e hekaramu, bena guba e roho dae heniamu, ugava na heto.
6Asi mata-henina tauna ana basio ania, ena aniani manokadia basio hekise-hekise henidia;
7badina be ia na e helalomu tauna na heto; e tomu “Bavaniani, ba inuinu”, to lalona na dia oiemu ai.
8Aniani ḡaudia vada o ani na ba mumuta nege, bona emu lalo-namo herevadia na ba hapetapetalai.
9Kavakava tauna vairanai basio hereva, badina be emu hereva aonegadia na ia ese baine dadarai.
10Tano hetoana gunana basio raḡaia oho, bona ihareha edia tano ai basio raka vareai;
11badina be Ihamauridia Diravana na mai goadana; edia gini-kau gabuna ai baine durudia, oi baine laomu ahu.
12Lalomu ese hahediba baine tahua, bona taiamu ese aonega herevadia bae hakala henidia.
13Mero ta matana ihakanina ai basio daradara; au amo boma kwadia, ia na basinema mase.
14Au amo boma kwadia, bena ia laumana na mase gabuna amo do ba rauaia.
15Natugu e, lalomu bema aonega, bena lau lalogu danu bema moale.
16Udumu bibinadia na hereva maoromaorodia bae gwaurai negana ai, lau laumagu do baine moale.
17Lalomu ese kara dika taudia basine vaḡeḡe henidia, a dina idoinai Iehova garina ai ba noho.
18Momokani, vaira dinadia dounu, bona emu helaro na basine doko.

19Natugu e, a kamonai, bena ba aonega; lalomu na dala namona ai ba hakaua.
20Vine ranuna e inu momomu taudia ida basio inu hebou, bona e ani lavadaemu taudia ida basio aniani hebou;
21badina be kekero tauna bona ani-lavadae tauna na bae ogoḡami; bona mahuta momo ese tau ta dabua hedaredia baine hadabualaia.
22Tamamu, e havaramu tauna, na ba kamonai henia; bona sinamu na e burukamu negana ai basio dadaraia.
23Hereva momokani ba hoia emu, bona haida ediai ma basio hoihoilaia; aonega bona hahediba bona lalo-parara na ba hoidia emu.
24Kara maoromaoro tauna tamana baine moale hisi dae; bona natuna mai aonegana e havaraiamu tauna ese baine moalelaia.
25Tamamu bona sinamu na ba hamoaledia; e havaramu hahinena ba hamoalea hisi dae.
26Natugu e, lalomu ba henigu; matamu ese egu dala do bae ita.
27Badina be anara hahinena na guri dobuna; lebulebu hahinena na ranu gurina hekahi-hekahina.
28E bani taomu, dadidadi tauna na heto; koikoi taudia e hahutumadiamu.
29Daika etomu “Inaio”? Daika e tomu “Madi ihabaigu”? Daika e heaimu? Daika e maumaumu? Daika na asi badina vada e bero? Daika matana eme kakakaka?
30Vine ranuna e inu daudaumu taudia, bona vine ranudia idau-idau e bulodiamu bena e inu tohomuta udia.
31Vine ranuna e kakakakamu negana ai, kehere ai e kimore-kimoremu bona inuna ai e manada-manadamu negana ai, basio raraia.
32Dokona ai ia na e hekorimu, gaigai na heto; duba na heto e hekorimu.
33Matamu ese ḡau idaudia bae ita, bona lalomu amo hereva gageva-gagevadia bae dae.
34Oi na davara nuana ai e hekuremu tauna eiava lagatoi au-tubuana dorina ai e helaimu tauna heḡereḡerena ai ba hahelao.
35Baoto: E botagu, to asina hisihisi; e dadabagu, to mamina asina abia. Edena nega ai baina noga? Inuinu ḡauna ma ta baina tahua.