Text copied!
CopyCompare
Godigo dwagi yai po buku - Bugagia Bidibo Kolesagade Po Asęai Buku

Bugagia Bidibo Kolesagade Po Asęai Buku 10

Help us?
Click on verse(s) to share them!
1Te e da te Solomongo pęwadage te wiegilama bidibo kolesagade po wali. Agai tama tiwai po wai. Te ogwago wiegi yai homu ebo kolesaga koneai elalubaso da, teda aga aya de ida si wiegi yai homu pemene ilaibao. Tiali goli, te ogwago te esela pabo kolesaga wali pobaso da, teda aya de ida si haliga sęgę mu ilaibao.
2Te nago kolesaga dwai wali pidu, tama te mone hauwa elalubo bidi pedalubaso da, teda naga te monego te nage wiegi yai ilama bidimainu ebaso, usu egobeo. Tiali goli, nago te doloba pai kolesaga wali pali da, te nage dolabo sęgo gegelama, me dologobeo.
3Genuai Bidigo te doloba pai kolesaga ebo bidi dabe te nai sǫą pomainu ilama gogologobeo. Tiali goli, agai te dwai kolesaga ebo bidi dabego te nai dabe somainu me iligobe, te augwaligo sainu te sę dene gesoai mu ebo dao.
4Te nago sę ebo hagela eyu da, te nage magi nai meni yai bidi pedelaibao. Tiali goli, nago sę bomo yali da, teda nago doado bage hauwa elaluaibao.
5Te bomai bidigo da, te nai inilama tau ebo sogo te sisinaibao. Tiali goli, te bidi pila muyu, tama te sogo sę me isiąwani da, teda aga hani sibi we wai bidi te genuai hale saibao.
6Godigo te doloba pai bidi dabeba te wiegi yai sę bugagia yaibao. Tiali goli, te dwai bidigo pogo te gasa bidi dolabo homu eyu, te aga dwai kolesaga te geme dualalubo dao.
7Te wiegi yai bidi me deli isibo sogo da, te we bidi dabego aga homu kone palama, tama pemene umabo mu yaibao. Tiali goli, te dwai sę ebo bidi dabe isibo sogo, te we bidi dabego aga polo homu kone ebo gegeda paibao. Te ni mobia pabo tiwai eyu, te bagego nogi silaibao.
8Te wiegi yai homu elalubo bidigo te gasa bidi dabego po odaibao. Tiali goli, te pedauwalidu ąį bole tulalubo bidigo te odolali tama wabo pogo te dolaibao.
9Te doloba pai bidi dabe te bugagia bidaibao. Tiali goli, te dwai sę ebo bidi dabe te geme me duala sobaso, te usu me egobeo.
10Te poli po niga selama wabo bidi dabego te dwai sę hauwa yaibao. Tama te po pedauwalide dogia pabo bidi dabe te dolaibao.
11Te wiegi yai bidi dabego po te bidibo ula mabo wę tiwai ebao. Tiali goli, te dwai bidi dabego pogo te augwa dwai homu ebo kolesaga te geme dualama, te gasa bidi dolainu tebo dao.
12Te haliga dugulubo po wabo kolesagago te we bidi hani augwa hasi peda sabo tiwai ebo dao. Tiali goli, te homu dene ebo kolesagago te dwai sęde sali sęgę hauwa sela sąbo dao.
13Te wiegi yai homu kolesaga elalubo bidigo agai te wiegi yai homu kolesaga po pusaibao. Tiali goli, augwaligo te wiegi yai homu elalusiąbo bidi dabe tudide te keloago elibo dao.
14Te wiegi yai homu elalubo bidigo te gasa tobage kolesaga sabo sę eyu, te polo tama te koneani kolesaga me hanilama me pusugobeo. Tiali goli, te kolesaga meni yai bidigo pedauwalide odolali po wabo sogo, te sęgę tama polo pedalubo dao.
15Te mone bidigo hauwa doado bagego augwali bagua selama, tama augwali bugagia bidibao, te taunde bomai dili yai obogo bagulai elalubo tiwai elalubao. Tiali goli, te magi nai meni yai bidi dabe augwa te doado bage sǫą pelama, tama augwali te dolaibao.
16Te doloba pai bidigo te aga bidibo ula te aga mone sabo tiwai yaibao. Tiali goli, te dwai sę ebo bidi dabego da, te dwai sę hauwa pedalumainu ebo dao.
17Te bidi mego te gasa bidi dabego aga dodolomainu ebaso da, teda aga te bidibo ula sabo sunumide bidibao. Tiali goli, te bidi dabego aga dodolainu ebadi, te hagoma ebo bidi yai baso da, teda agai te sunumi geda muyu ela pobao.
18Te bidigo dwai haliga te gasa bidiba elama, tama te haliga dwai te geme dualainu ebaso da, teda agai te tibo po sesemane obao. Me ma, te bidigo te gasa bidiba geme posobo po obaso da, teda aga te kolesaga umuna sai bidi mu tiwai ebao.

19Te po hauwa wabo bidigo, agai te aga pode te sęgę sabo po weyu tebao. Tiali digi, te po hauwa me wasiąbo bidi da, agai homu kolesaga te wiegi yai elalubao.
20Te doloba pai bidigo po te wiegi yai nai silva tiwai mu dao. Tiali digi, te dwai bidigo homu kolesaga te olo bage tiwai eyu, tama te dwai mu dao.
21Te doloba pai bidigo pogo te bidi hauwa tau saibao. Tiali digi, te wiegi yai homu isąwani bidi dabe da, teda augwali te isaibao, magi baso meni, te augwaligo augwa bidibo kolesagade homu kone paliyu, dolo dagalobo menio.
22Te Genuai Bidigo digi dabolo te wiegi yai doado bage hauwa mayu, agai te doado bagego dabolo te sęgę momainu me ebo menio.
23Te wiegi yai homu elalusiąbo bidi dabe, augwaligo te tobage dwai kolesaga yabo pemene ebo dao. Tiali digi, te wiegi yai homu elalubo bidi dabego da, augwa te wiegi yai doloba pai kolesaga yabo pemene ebo dao.
24Te dwai sę ebo bidi dabe te nai hauwade wi yaibao, tama te nai dabe te augwaliba pedelaibao. Tiali digi, te doloba pai bidi dabego wei homu ebo nai dabe Godigo mabo dao.
25Te dwai sę ebo sogo te dwai sę ebo bidi dabeba pedaliyu da, te tebogo te augwali mu silaibao, te genuai sigi ąį asiyu, tama te pobele bage doado bage te tolasa pabo tiwai ebo dao. Tiali goli, te doloba pai bidi dabe te augwa bomo mu eyu, tama augwa sesemane sogo bugagia bidibo dao.
26Nago te hagela bidi nago sę emainu me sigio. Tiyu, nage agade hagela mu yabuo, te nago te pedauwalide te ha ebo nai tiwai eyu, tama te sia hanogo te gedu ąį mu pela silibo tiwai ebo dao.
27Te nage Genuai Bidide wi eyu, aga dologode bidiyu, tama nago aga sesemane sogo wali pidu da, teda nage te tǫde sesabi elama bidaibao. Tiali digi, te dwai sę ebo bidi dabe te pęwadage sogo bidama, tama te augwali isaibao.
28Te doloba pai bidi dabe te Genuai Bidigo augwaliba te wiegi yai sogo menama, tama te augwa sulama, te augwa wiegi yai pemene yaibao. Tiali goli, te dwai sę ebo bidi dabe da, te odolali tonalueibao. Augwaligo te wiegi yai sogo me sugobeo.
29Te doloba pai bidi dabego Genuai Bidigo po wali pobaso, agai augwali bugagia tonaluaibao. Tiali goli, te dwai kolesaga ebo bidi dabego agai po wali pisąbaso, augwali dolaibao.
30Te doloba pai bidi dabe te augwa bulu tǫ pedaide bugagia bidaibao. Tiali digi, te dwai sę ebo bidi dabe augwali te tiwai gilama me bidigobeo. Menio.
31Te doloba pai bidi dabego te wiegi yai homu hauwa elalubao, tama augwaligo te we bidi dabeba pusaibao. Tiali goli, te po dwai wabo bidi te dolaibao.
32Te doloba pai bidigo po da, te dolo usu dao, tama te we bidigo olode pusu yaibao. Tiali goli, te dwai bidi dabego pogo da, te we bidi dabego haliga dolobo dao.