Text copied!
CopyCompare
Habo nalolene bi gahenge lo winigo ogo - Mini Gigabi

Mini Gigabi 10

Help us?
Click on verse(s) to share them!
1Mana bayale gigabi bialu holenenaga Solomonohanda bi tumagi laga binigo ogodagua leda. Waneiginiru ti mini bayale gigabiwi kayagua ti ai̱ya abala turuho holebira. Anigo waneigini ti mini gigabi ndo mini nawi kayagua ko biragome ti ai̱ya abala mo tandaga holebira.
2Í̠na muni page binigome homogo hariyagua muni ogonime í̠ mo bayale naholebira. Anigo í̠na mana tigabi hangu ngaru talialu biaabo hariyagua mo ko holene mbira í̠ha nawulebira.
3Anduane Homogohanda wali agali tigabi karu tomo nolene mbira burupale nahelaga ka. Anigo wali agali mana ko biaga karume mbirale hamelo kago milo henge namiaga ka.
4Í̠ biabe bulene mangahe hariyagua yagibano noa noalo holebere. Anigo í̠ biabe ebebebi hariyagua mbirale dewawi homogo holebere.
5Agali miniwi kagome tomo nolene tu haragola bu mogobu wiaga. Anigo agali mbira ibu biabe nabi palia hangu biyagua nde horo ogoningi tomo nolene nawidagola ibu one waneigini heba ti noa noalo howa taga pani nolene wulebira.
6Anduane Homogohanda wali agali mini tigabiwi karuhondo bayale dewa miaga ka. Anigo wali agali ko kago ibugua bi laragome wali agali mo hondo holenaga miniha ohe howa bi laga ka.
7Wali agali mana bayale biaga karu homarangi marume ti mitangi bialu dara howa mani tigua bayale biyarunaga te laabo haga. Anigo wali agali mana ko biaga karu homaragola marume ti abale embedaho wahaga.
8Wali agali mini bogabi karu tigua wali agali marume ogodagua bibe lalu bi bayale lamiragola ti bayuwa hale haga. Anigo wali agali mini nawi howa bi habane nabulene kudaga bi dege laga karu ti mo ko holebira.
9Wali agali mini tigabiwi karu ti miniha maburabi holebira. Anigo wali agali mana ko biaga karu tinaga mini ko do habe nahe holebira.
10Mbiralime henene lolene ngadagua la nabi hayagua ibugua genda dewa mo yalu ibaga. Mbiralime kudaga bi dewa lagimbu biaga kago ibugua mo ko holebira.
11Wali agali mini tigabiwi karunaga bi larago haabo holene iba ale. Anigo wali agali mini kowi karunaga bi laragome tininaga miniha ko ngago do howa tigua wali agali maru karu mo ko hole manda bu haga ka.
12Handabe manga holeneme ko mo bia haga. Anigo ko biagame ko bibahende biniru gubalini holeneme la nabi wahaga.
13Mbirali ibu mini dingidangiale kagome ibunaga miniha bayale gigabiwi howa bi latagi haga. Anigo mbirali ibu mini giga napale kago ibu pani nolene wulebira.
14Mbirali mini bayale gigabiwi kagome manda tara tara bulene ibunaga miniha yu haga ka. Anigo mbiralime bame kudaga bi hangu lalu kagoria ko abale anda ibilo henge miaga ka.
15Tano pabe bu yanda howa tamuha wiagadagua wali agali homogo karu ti mbirale bu ngarume pabe bu mabu bidagola bayale ka. Tano pabe bu yanda nahe howa wiagadagua yagibano karu mbirale burupale kagome ti abale mo ko haga.
16Bayale biragonaga yolo haabo holene nga. Anigo ko biragonaga yolo ko dewa bilo mo bia haga ka.
17Wali agali maru mana birago mendealime mo tiga biragola hale haga karu ti haabo holene harigani pialu ka. Anigo wali agali maru mana mendealime mo tiga biragola i̱ ndo lalu hale nahaga karu ti mo ko holene harigani pialu ka.
18Mbiralime wali agali maruhondo keba howa nahe tingi halu kago ibunaga miniha ko do haragome ibu tindule hangu laga ka. Mbiralime diburibu loyu ibaga biaga kago ibu mini nawi lulu ale ka.

19Mbiralime bi dewa laga kayagua ibunaga bi laragome ko dewa bibehe holebira. Anigo mbirali ibu mini bayale gigabiwi kayagua bi dewa lagimbu nabi holene nga.
20Wali agali mini bayale tigabiwi karunaga bi larago muni siliba bayaleorego ale ka. Anigo wali agali ko biaga karunaga mitangi bulenego habane nabulene hangu mitangi biaga ka.
21Mbirali mini tigabiwi kagonaga bi laragome wali agali dewa biamogo bulebira. Anigo mbirali mini nawi howa biragome ibuni bo homelolebira.
22Anduane Homogo ibunime ina biamogo bialu mbirale dewa ngiyagua urunime ina genda namo ngulebira.
23Wali agali karume ko ngaruni bia dege dindi hole lowa turuho kayagua ti mini nawi lulu ale ka. Anigo wali agali manda bayalebi mini bayale gigabiwi karume mana bayale ngaru hangu bule lowa turuho holebira.
24Mini tigabiwi karu ti tini hame lara alego mulebira. Anigo ko biaga karu tini mo gi hara alegoore mulebira.
25Wali agali ko biaga karu ti kagoria ko bulene mbira ibiragola puyabu timbuni iba li heba ibuwa mbirale ngaru yalu piai hagadagua ti yalu piai holebira. Anigo wali agali mana tigabi biaga karu ti dege hongo howa bayale haabo holebira.
26Wali agali mangahe karuhondo í̠naga biabe biaha nalabe. Irane marasini kome ne hambuni kau biagadaguabi ira haguame de iba dege dindi hagadagua bialu í̠na ibuhondo handabe manga holebere.
27Anduane Homogohanda bi laradagua bialu hariyagua dindini lu holebere. Anigo ko biaga karu tigi mandi hangu halu tinaga horo nakaha abale homolene wulebira.
28Wali agali mini tigabiwi karu ti Anduane Homogohondo mini dunubia ho howa turu halu holebira. Anigo ko biaga karu tigua bayale mbira nahende ti bameore holebira.
29Mini tigabiwi karu Anduane Homogohanda ti baya hangu handayaho haga ka. Anigo mana ko biaga karu ibugua ti kagoha ko anda ibilolebira.
30Wali agali mini tigabiwi karu ti dindini bayale haabo holebira. Anigo ko biaga karu ti dindini haabo naholebira.
31Wali agali mini tigabiwi karume bi larago mini bayale gigabi holenenaga laga ka. Anigo wali agalinaga hégeme bi ko laga kago ogoninaga ne hambu ndibulo waholebira.
32Mini tigabiwi karume bi lalu howa wali agali hale ho karu ti mo dendebia holenaga manda bialu bi bayale laga ka. Anigo wali agali mini kowi karu tigua bi laragome wali agali hale ho karu mo tandaga haga ka.