HEREVA LADA-ISIDIA 6

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Natugu e, dekemu tauna dainai boma gwau hamata, eiava idau tauna dainai boma gwau guna,

²eiava bibinamu reḡedia ese bema idoamu, eiava udumu herevadia ese bema hahekwakwanaimu,

³natugu e, ini boma kara toma, sibomu boma hahemauri, badina be oi na dekemu tauna imana ai: aola haraḡa, dekemu tauna ba noia.

⁴Matamu basie mahuta, matamu kopidia basie kapu;

⁵ba roho mauri, uda nanina ese labana tauna imana amo eiava manu ese manu-tahu tauna imana amo e roho maurimu na heto.

⁶Lahedo taumu e, dimairi ba lao henia; ena kaura ba laloa, bena aonega ba davaria.

⁷Ia na asi lohiana, asi biaguna, asi pavapavana,

⁸to lahara negana ai ana aniani e abimu, bona taboro negana ai e haboumu.

⁹Lahedo taumu e, ba hekure ela bona edena nega ai? Edena nega ai emu mahuta amo ba noga?

¹⁰Matamu ba taia, ba laḡa ani sisina, nega sisina kwaramu na imamu ai ba hahekwinaia;

¹¹bena ogoḡami ese baine abimu, dadidadi tauna na heto, bona dabu na emu ai baine kau, tuari tauna na heto.

¹²Kara kava tauna, kara dika tauna, e loa eva-evamu mai hereva gageva-gagevana ida;

¹³matana e hakunumaiamu, aena amo tano e dadaroamu, bona dodoriana e duduiamu;

¹⁴lalona gageva-gagevana amo kara dika e laloa hatamu, heiriheiri e havaraia louloumu.

¹⁵Taunabunai hahedika ese baine halahuia; mata-kunumai tamona ai baine dika, ta basine hamauria diba.

¹⁶Ḡau tauratoi Iehova ese e inai henidiamu, ḡau hitu ia ese e badulaidiamu:

¹⁷hekokoroku matadia, koikoi malana, bona asi ena kerere tauna rarana e hahebubuamu imadia;

¹⁸lalo-hadai dikadia e lalo hatamu lalona, bona kara dika e heau heniamu aedia;

¹⁹hahebade koikoi tauna, koikoi herevadia mo e gwauraimu, bona heiri-heiri na tadikaka bogaragidiai e havaraiamu tauna.

²⁰Natugu e, tamamu ena haheḡani ba badinaia, bona sinamu ena hahediba herevadia basio rakatanidia.

²¹Nega idoinai lalomu ai ba ḡuidia, bona aiomu ai ba taudia dae.

²²Ba raka negana ai bae hakaumu; ba hekure negana ai bae gimamu; ba noga negana ai bae hereva henimu.

²³Badina be haheḡani na lamepa, bona hahediba na diari, bona mata-hakani na mauri dalana.

²⁴Idia ese hahine dikana ena amo bae hamaurimu, bona ariara hahinena malana gaihona amo danu.

²⁵Ia hairaina na lalomu ai basio ḡahusia, bona nahuamu ba tohoa, matana rauna ese baine idoamu na garina;

²⁶badina be ariara hahinena na flaoa igabu ta bae davalaia, a heuda-hanai hahinena ese tau ta ena mauri e rau heniamu.

²⁷Tau ta ese lahi na kemena ai bema abia loaloa, ena dabua basinema ara a?

²⁸Eiava tau ta ese gida latadiai bema raka, aena basinema haraka a?

²⁹Dekena tauna adavana dekenai e raka vareaimu tauna na unuheto; enai e daukaumu tauna ta na mata-hakani amo basine roho mauri.

³⁰Hitolo dainai aniani baine henaoa tauna na taunimanima ese bae ihi-ihiraia ani?

³¹A bema davaria, ia na dava baine heni hahitu; ena ruma kohuna idoinai baine heni.

³²E heuda hanaimu tauna na asi darana; ia na sibona e healamu;

³³bero bona hedadarai baine abi, ena hemarai na basine heroho.

³⁴Badina be mama ese tau ta lalona e habaduamu; dava iabina negana ai, ia na asi ibogahisina.

³⁵Heaiva kohuna basine abia; bona herahia momo amo ia lalona basio hakerua diba.