HEREVA LADA-ISIDIA 19

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Ogoḡami tauna ena lalo-maoromaoro ai e rakamu ese kavakava tauna mai ena hereva gageva-gagevadia na e hereaiamu.

²Tau ta asi aonegana baine noho na dia namo; e raka haraḡa-haragamu tauna ese ena dala e reaiamu.

³Tau ta ena kavakava ese ena dala e hakererea vaitanimu negana ai, ia ese Iehova e lalo dika heniamu.

⁴Taḡa ese hetura taudia matamatadia momo e mailaidiamu, a ogoḡami tauna na turana ese e rakataniamu.

⁵Gwaurai-hedinarai koikoi tauna ese mata-hakani basine reaia; hereva koikoi tauna na basine roho mauri.

⁶Hutuma ese harihari-bada tauna ena lalo-namo e tahuamu, bona taunimanima iboudiai na herahia e henimu tauna turana.

⁷Ogoḡami tauna na tadikakana iboudiai ese e inai heniamu; benaini, turana ese e heautaniamu, dauha e laomu; e boi henidiamu, to idia na lasihidia.

⁸Aonega e abiamu tauna na sibona e heura-henimu; lalo-parara e abia tarika-tarikamu tauna na ena namo baine bada.

⁹Hahebade koikoi tauna ese mata-hakani basine reaia; bona hereva koikoi tauna na baine mase.

¹⁰Kavakava tauna baine noho loḡea na dia namo; bona hesiai tauna ese lohia baine biagudia na dika herea.

¹¹Lalo-maoromaoro dainai tau ta na badu ai baine halahe, bona kara dika ilalo-negena na ia hairaina.

¹²Pavapava ena badu na leona e ḡoumu na heto; ena lalo-namo na hunu rei latanai na heto.

¹³Kavakava merona ese tamana e hadikaia vaitanimu; bona hahine ena hepapahuahu na medu e hetuturu hanaihanaimu na heto.

¹⁴Ruma bona taḡa na tamada edia amo ta abimu; a mai darana hahinena na Iehova ena amo.

¹⁵Lahedo ese taunimanima e hamahutadia hedavauhemu, bona lahedo tauna na baine hitolo.

¹⁶Haheḡani e badinaiamu tauna na baine mauri, a hereva e dadaraiamu tauna na baine mase.

¹⁷Ogoḡami taudia e bogadia hisimu tauna ese Iehova enai e heni torehaimu; Iehova ese ena kara davana do baine henia.

¹⁸Natumu matana ba hakania, helaro na doini e miamu negana ai; lalomu basio hadaia ia baine dika.

¹⁹Badu dikadika tauna ese davana baine abia; badina be boma hamauria, to ma boma karaia lou.

²⁰Hahealo herevadia ba kamonaidia, hahediba herevadia bavabidia dae; unu amo aonega bavabia, nega gabena ena.

²¹Tau ta ena lalo-hadai na momo, a Iehova ena ura mo baine gini.

²²Tau ta enai ta ura heniamu ḡauna na heabidadama; ogoḡami tauna ena namo ese koikoi tauna ena e hereaiamu.

²³Iehova igari-henina ese mauri dalana ai e hakauda laomu; ienai e miamu tauna na lalona baine heḡereḡere, hahedika ta ienai basine kau.

²⁴Lahedo tauna ese imana na dihu ai e dau dobimu, bona basine abia isi uduna ai.

²⁵Ḡonaḡona tauna ba botaia, bena lalo-duhu taudia lalodia bae parara; lalo-parara tauna ba sisiba henia, bena ena aonega baine bada.

²⁶Tamana e daḡedaḡe heniamu bona sinana e luluamumerona ese hemarai bona gwaugwau e havaradiamu.

²⁷Natugu e, hahediba herevadia ikamonaina boma hadokoa, bena aonega herevadia amo ba raka oho danu.

²⁸Gwaurai-hedinarai asi anina tauna ese hahemaoro e ḡonaḡonalaiamu, bona kara dika tauna uduna ese dika badana e hadonoamu.

²⁹Ḡonaḡona taudia davadia na vada e heḡaeḡaelai; bona kavakava taudia dorudia danu bae kwadidia hiruka-hiruka.