Text copied!
CopyCompare
GALA Sɛʋɛi - Tɛnɛ Faalaaliiti

Tɛnɛ Faalaaliiti 10

Help us?
Click on verse(s) to share them!
1Salɔmɔn ná-tɛnɛ faalaaliiti. Ɠima loun zunui ɠa ɗa ɠɛ ga kɛɛɠɛ ná-koozunɛɛi, faaɠaaɠaalala loun zunui ɠɛ ga dee ná-ziizoolɛi.
2Naavoloi sɔlɔɔ pelei ɲɔuɗai, é la faa ʋaa eyɛsu pɛ, kɛlɛ nii é ná-eteai ziɛzu telebogi zu, naa ɠa ɗa ɠizo saai ma.
3Ɠɔoɠɔ GALAGI la telebo nui yɛgana, é ʋa ɓɔlɔ ga pului, kɛlɛ toɠa ɠɛlɛ nu ɲɔi yiima vaiti ba.
4Zɔi é la yeeʋɛa faa ʋa, naa ɠa ɗa ɠɛ ga bala nu, kɛlɛ zeemaleʋebogi ɠa ɗa nu ɓɛtɛ.
5Nii é ani ɠaalɛɛzu ba, foɠo undaaɠulazuʋɛ, naa ɠa ga doun zunui, nii keleɠelegai, kɛlɛ zɔi é ɲiizu molo leʋe ziɛgi zu, doun zunui ɠa ga naa, nii ɓaa ɠa ɠula ma.
6Tuyaiti ta ʋuuni telebo nui unmaʋɛ, kɛlɛ nu ɲɔi laawooiti ta ɗa tooma vai maalɔɔɠu.
7Telebo nui ná-kizɛsui ɠa ɗa ɠɛ ga tuyai taɠiligaani bɛ, kɛlɛ zeemai ɠa ɗa wo nu ɲɔiti daaseigi ma.
8Zɔi ɠigi ma ziimaʋɛ, naa ɠa ɗa deveiti so, kɛlɛ nui é kpɔɛzuɠula ɲakaiti bosu, naa ɠa ɗa ɓɔɠɔ loo ya.
9Zɔi é ziɛzu sɔledai zu, naa ɠa ziɛzu ziilɛigi zu, kɛlɛ zɔi é ziɛzu ga pele zuzeigiti, naa ʋolu ɠa ɠula.
10Nii é gaamai lɔɔɠuzu bɔɔlaiti ba, naa ɠa ti ɓɔlɔzu, kɛlɛ zɔi é zelii losu ti ma gaamai zu, naa ɠa ʋaazu ga ziilɛigi.
11Telebo nui laawooiti ta ga zɛnvu ɗɛungi, kɛlɛ nu ɲɔi laawooiti ta ɗa tooma vai maalɔɔɠu.
12Wɔinzeɠemai ɠa ɗa sakpegi ɠaazo, kɛlɛ nɛɛbɛi ɠa ɗa faaɠaazagi pɛ suvaayɛ.
13Keleɠele nui laawooi ɠa ɗa ɠɛ ga ɠima ɓɔɛi, kɛlɛ faaɠaaɠaalala nui ʋoluʋɛ nɔnɔi ɠa ga kpakɔi.
14Ɠima nuiti ta ɗa faaɠwɛgi ɠaalɛ ba, kɛlɛ siɛgi zu faaɠaaɠaalala nui ɓɔɛzu la, maanɔɠɔi maa la mɔ ɠoozani ba.
15Kpɛtɛ nui yeaɠɔligi ɠa bɛ ga taa wolai siɠigi ma, kɛlɛ bala nui ná-maawɔin ɠa ɗa koloɠolo.
16Telebo nui ná-tɔnɔgi ɠa ɗa lo tuɠɔ, é zɛnvui wo, kɛlɛ nu ɲɔi zɔlɔɔgi ɠa ɗa ɠɛ ga faa ɲɔu ɠɛ anii.
17Zɔi é woilosu tɛnɛ gooi ma, naa zɛnvu ʋelei zeɠea, kɛlɛ zɔi é ɠɛlɛzu zelilomai ʋa, naa ɓɔɠɔ loa ya.
18Wooveledai ɠana, ɗa wɔinzeɠemai lɔɔɠuna, zɔi é leʋesu ga tɔɠɔ ɠoloɠologi ɠɛa, naa ɠa ga ɠimalala nui.

19Zɔi é kpɔɛi zuɠulazu gola, é la ɓega tɔ koloɠologi ɠɛɛzu, kɛlɛ zɔi a laaʋɛ zo, naa ɠa ga zunui, nii ɠi pagɔi ma.
20Telebo nui laawooiti ta ga walii ɲadegai, kɛlɛ tosu la faa ɲɔu ɠɛ nuiti ta-ɠisiɛi ʋa.
21Telebo nui laawooiti ta ɗa ɓɔ nuɓusɛ mɔinmɔin ba, kɛlɛ ɠimalala nuiti ta ɗa za, tɔɔzei ti ʋalagɛ faaɠaaɠai ma.
22Ɠɔoɠɔ GALAGI laa luyai ɠa a ɗa kulagaanɛɛzui ve, é la koozuʋili faa nɔpɛ pilɛga polu.
23Faa ɲɔi ɠɛɛ vai ɠa ga ɠaɠo faa ɠimalala nui ya, eɠɛʋelei ɠimalai ɠɛɛ vai la ga ɠaɠo faa ɠima nui ya.
24Nii nu ɲɔi luazu ba, naa ɠa a ɗa sɔlɔɔ, kɛlɛ nii telebo nuiti ta wɔin ɠɛ, naa ɠa ɗa ve ti ya.
25Siɛgi zu tɔngɔlɔ fiilɛi leʋesu da, nu ɲɔi ɠa ɗa ɲɛɛlɛ! Kɛlɛ telebo nui ɠa loni ani ma, nii é ná eyɛsu ɠɔ.
26Eɠɛʋelei ani ɓodai a ɗa kɛ la ga nu ɲiigai, duului ɓalaa ga ʋuuna nu ɠaazuʋɛ a ɗa kɛ la, zekana ɲaka nui la, naati bɛ niiti ti teʋesu.
27Ɠɔoɠɔ GALAGI ɠaazuluabai ɠa ɗa nui ná-eteai zuɠooza, kɛlɛ faa ɲɔu ɠɛ nui ná-konagiti su ɠa ɗa ɓuɠa.
28Telebo nui ná-maaɓɔungi ʋolu ɠa ɠɛ ga koozunɛɛi, kɛlɛ faa ɲɔu ɠɛ nuiti ta-ɠitogi ɠa ɠoloɠolo.
29Ɠɔoɠɔ GALAGI ná-pelei ɠa ga siɠigi wooɠɛɠila nuiti maaɠoolii zu, kɛlɛ toɠa ga naati koloɠolo saɓu, niiti ti faa ɲɔi ɠɛɛzu.
30Telebo nui la ɲiikpiga eyɛsu pɛ, kɛlɛ faa ɲɔu ɠɛ nuiti ti la yɛga zooi zu.
31Telebo nui laaʋɛ ɠa ɗa ɠimalai wo, kɛlɛ yaava nuiti nɛgi ɠa leʋe ga.
32Telebo nui lakɔlɔgiti ti nuɓɔɠɔlai ɠwɛɛ, kɛlɛ faa ɲɔu ɠɛ nuiti daaʋɛ yaavaʋɛ.