Heberu 2

1

2

3

4

5

6

7

8

9

10

11

12

13

¹Arinai ginauri wa ta ataiedio, i lolo ta ataieididinidi, ata ta buigabaedi abo ta sapurihai.

²Paana ena riba ta, aneru se bahei wa, mamohoina ede, eo laugagaeo utusina gamagari, eo awayagara, abo se hemaisadi nonoina duduraina eai,

³ita haedi abo eda aba‐dago, ena mauri lailai aririna ta ta nuagabaei? Guiau awana eai se hemasaraha‐bagunai, abotai ia ena riba tauataiena se hemasarahama ita arida eai;

⁴Eaubada hinage hemasarahana eai i saguidi, heiheinoi eo noo se tubu, gigibori udoi udoi, eo Earua Tabuna ena ainauia eai, i soieyama wa iabom ena nuatu eai.

⁵Tanoubu esau matada eai wa, ta ribaribaei wa, nige aneru i mosedi se tanuagai. Na haedi se ribaeyao si ene, “Tau ia saha, to u nuanuaiei? E tau natuna, to u bobodiei?

⁷Tau u hetubu, ena abatoro u mosei, i sigidobi begana aneru ubudi eai, hedebasae eo heasisi arinai u hekorona, eo u hetoro nimam paisoadi i tanuagaidi.

⁸Eo ginauri gamagaridi u toredi aena ubuna eai, ia bena se awaabiei.” (Ps. 8.4-6.) Ginauri gamagaridi tau nimana eai i toredi, ia mo nige ginauri esau Eaubada awaabina murimurina eai i toro. Abo ina ta sora nige ginauri maudoina ta ita i tanuagaiheohi.

⁹Na Iesu ta iita, huia kuukuuna ena abatoro ede aneru ubudi eai, mate amamnana debana eai ia se hekorona, se hedebasaei eo wasana i lolo, Eaubada ena ainauia eai ia mate i aiitayao, tatao gamagaridi enadi.

¹⁰Doha i dudurai, ia wa debana eai ginauri gamagaridi se tubu, eo ginauri gamagaridi enana se hetubudi, nanatunayao se gamagari ariri bena i woeaidima iabom namanamarina boeana eai, arinai edi mauri tauedabagunaena wa i helolo‐dumadumai, amamna debana eai.

¹¹Tauhetahetabu eo isi wa se hetahetabuedi, gamagaridi paadi esega. Arinai ede nige i maee esadi i ataidi ia ana bogaoyao mamohoi, i ene,

¹²“Abo esam ea ribahemasaraha egu tataoyao aridi eai, oigogo boeana eai abo ea wana eo ea hedebasaem.” (Ps. 22.22.)

¹³Eo i ribauio i ene, “Ia abo ea sunusunumaei.” Eo hinage, “Hage au ita, eau ma‐nanatuguyao ta, isi wa Eaubada i ledima arigu eai.” (Is. 8.17-18.)

¹⁴Doha merumeru tamadiyao bulumadi eo osinadi se abi tupona, ia hinage doha, ena tupo maeda ie abi, bena mate dobilana eai ia wa mate gigiborina ie abi nimana eai wa, abo i unui, iaede diabolo.

¹⁵Eo isi gamagaridi wa, edi mauri asubenadi maudoina eai mate matausina i auauidi, bena i iairigabaedi.

¹⁶Mamohoi, ia nige aneru i abidi i hepaisoaidi, Aberahama pesipesinayao mo.

¹⁷Arinai i aipate ginauri gamagaridi aridi eai maena tataoyao abo adi ao esega, bena i hemala edi kohena saesaena, enadi tautoro, taunuatoatoa ia, eo nuana i tore‐esegai, Eaubada ena dobila eai bena i woeaidi, eo tatao edi baaea maisana ia i hedudurai.

¹⁸Paana ia amamnana i abiyao, noho i hearoyao, arinai ede abina i ata tatao edi noho eai i saguidi.