Esekiel 36

2

33

36

¹⁶Iahova vit risi mini vit,

¹⁷“Natin Meatin, navong me-Isrel keil amul veah en atan kati ose, keil asakin atan ose mai vilehilu en tisaen keil ka sakkalkalien keil one. En metok, sakien keil one romutotei suval ara ten mesaien koa onen mama keil.

¹⁸Keil aleh vurohien onak va kat keil ven ran meatin keil koa amu vinvini keil en atan koanek, ka veni keil asakin out vi amus ral min nana keil koa aling keil amul ien.

¹⁹Inau nalei revi usite keil ten umen ka sakien keil one ka nalesi keke armaltei en metok. Sakini, nasila rasilin keil avaha en kantri sav keil.

²⁰Ka en out vasi koa uva aro ien, keil asakin meatin sav keil avitan en Isok veni koakeil ten kantri keil enek avit, ‘Alah lat me-Isrel keil ekek ran atan kati one veni Iahova, Ahi one, keihoen onen rovinvintei vakur koe keil.’

²¹Sakini, namundem usil Isok koa vi votut, veni navong me-Isrel uva en kantri sav keil, sakien tisa one sakin meatin savsav keil alei heisav en Isok.

²²“Sakini, kiha kihiteni min me-Isrel keil kihit, ‘Koanik selusien onen Iahova, Ahi anatin. Asa koa inau numoni, nirmumontei ven kami, me-Isrel keil. Numoni vahati lat ris Isok koa vi votut. Anatin, nihati lat Isok koa kami, me-Isrel keil, mimumoni mai vi amus en meten meatin keil ten kantri vasi keil koa miro ien.

²³Inau nitie lati min meatin keil vasi ten kantri keil enek keke Isok vi votut. Anatin, Isok koa mimumoni vilehilu en mete, nisakin keil ilei kilea suk keke Isok vina nesa mok. Keil ilea suk isei Iahova koa vi Ahi anatin. Ka en kami, nitie lati min keil keke navi votut.

²⁴Nilah lat kami ran kantri keil koa mimul ien, ka nilamun kami eris mihemai en atan kati onami.

²⁵Inau nitah oai koa muto en kami ka hesakin kami miheto ran sakien tatisaso keil onami ka ran sakien tahilehiluen koa mimumoni navong mimul miva netan min nana keil.

²⁶Inau nisakin rendemien keil onami ka envatien keil onami hemai hehi heite hau. Tinomi koa keih, inau nihilesi ka nisakini hemai hemerau. Hemukonek, kami miheilea mivalong kat nau.

²⁷Niling Ninin onak hel en kami koa hesakin kami mihousil revi mengkatien keil onak ka mihelong kat revi selusien keil koa nasani tuai min kami.’”