Ezekiel 30

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

¹Migkaǥi is Nengazen kayi te kedì te,

²“Sikew is etew, tudtula nu heini is menge lalag ku he para te menge tig-Ehipto. Keǥiyi nu sikandan he siak, is Nengazen he MEGBEVAYÀ, migkaǥi a te: Sineǥew kew tenged te ebpekeuma ziyà te keniyu he kezeetan.

³Su hapit en egkeuma haazà he andew, is andew te kedhukum te Nengazen. Egkikivel ne ebmerusirem haazà he andew para te menge nasyun.

⁴Edsurungen is Ehipto, ne ebpekebmereǥen is menge tig-Etiopia. Mahabet is ebpematey ziyà te Ehipto, ne ebpenguwaan is menge ketiǥeyunan kayi he nasyun, ne ebengkaǥen heini.

⁵Kayi he tebek, ebpematey is menge tig-Etiopia, tig-Put, tig-Lydia, tig-Arabia, tig-Libya, wey is diyà te zuma he menge nasyun he nekidsevaha te Ehipto.

⁶Iyan a, is Nengazen he MEGBEVAYÀ migkaǥi he egkezeetan iyan is diyà te menge nasyun he nekidsevaha te Ehipto, ne egkaawà is gehem he impehivantug te menge Ehiptohanen. Egkeǥerà is meǥinged kayi puun te Migdol pehendiyà te Aswan.

⁷Ne egkehimu he edlavew is kegkemekevulungbulung te Ehipto te zuma he mekevulungbulung he menge nasyun diyà te peliǥuy zin, is menge inged kayi, egkehimu he iring te nevengkag he menge inged diyà te peliǥuy zin su egkengevengkag daan.

⁸Emun ebinsulan ku en is Ehipto wey ebpematey en is langun he nekidsevaha kayi, egketuenan te menge meǥinged kayi he iyan a Nengazen.

⁹“Dutun he timpu, edsuǥù a te menge menunudtulà he ed-untud te menge untuzà he tenged kandan utew egkahandek is menge tig-Etiopia he ebpeeyehey zà. Egkeheratan sikandan dutun te timpu te kedèdeeti te Ehipto su siguradu egkeuma heeyan he timpu.”

¹⁰Migkaǥi zaan is Nengazen he MEGBEVAYÀ te, “Egemiten ku si Hadì Nebucadnezar he hadì te Babilonia te kebpenhimatey te mahabet he menge etew ziyà te Ehipto.

¹¹Ibpezezeetan ku is Ehipto ki Nebucadnezar wey te menge sundaru zin he edlavew he mesipala kenà te zuma he mesipala he menge sundaru ziyà te menge nasyun, ne ebpekepeyapat is ebpematey ziyà te minsan hendei.

¹²Ebpekemezahan ku is Wahig he Nilo, ne ibeǥey ku is Ehipto ziyà te lalung he menge etew. Edèdeetan ku is tivuuk he nasyun he Ehipto wey is langun he neseled kayi pinaaǥi te ebpemuun diyà te senge nenasyun. Iyan a, is Nengazen, is migkaǥi kayi.”

¹³Migkaǥi pa is Nengazen he MEGBEVAYÀ te, “Edèdeetan ku zaan is menge ledawan te menge ed-ezapen diyà te Memfis. Wazè en ebpengulu te Ehipto ne ebpelihendeken ku is langun he meǥinged kayi.

¹⁴Edhimuwen ku he mekevulungbulung is Patros, ebinsulan ku is Zoan, ne edsilut a ziyà te Tebes.

¹⁵Ibpeǥezaman ku is kegkepauk ku ziyà te Pelusium, wey ziyà te melig-en he inged te Ehipto, ne ebpenhimetayan ku is mahabet he menge etew ziyà te Tebes.

¹⁶Ebinsulan ku is Ehipto! Ebpekezag-es tenged te kegkesekiti is menge tig-Pelusium. Egkezeetan is Tebes, ne layun egkahandek is menge tig-Memfis.

¹⁷Ebpematey te tebek is menge vetan-en he maama ziyà te Heliopolis wey ziyà te Bubastis, ne is egkesamà he uuyag kayi he menge inged ne ebihaǥen.

¹⁸Emun edèdeetan ku en is gehem te Ehipto egkehimu heeyan he merusirem he andew para te menge tig-Tapanhes. Egkeawè en is impehivantug he ǥehem te Ehipto. Egkeselikuvungan is Ehipto te kivel, ne ebihaǥen is menge meǥinged diyà te menge inged kayi.

¹⁹Iring keniyan is kedsilut ku ziyà te Ehipto, ne egketuenan dan he iyan a Nengazen.”

²⁰Ne hein ikepitu he andew te nehuna he vulan, dutun te ike-11 he tuig te kegkevihaǥa kenami, migkaǥi is Nengazen kayi te kedì te,

²¹“Sikew is etew, midlepuan ku is bekelawan te Faraon he hadì te Ehipto. Ne wazà ebpekevawì kayi wey meulii su wey med-uman mebmezesen te kegawed te ispada.

²²Umbe, keǥiyi nu sikandin he siak, is Nengazen he MEGBEVAYÀ, migkaǥi a he kuntada ku sikandin. Edlepuan ku is dezuwa he vekelawan din, sikan is wazè pa melepui wey sikan is daan en he nelepuan, su wey zin melekai is ispada zin.

²³Ibpeyapat ku is menge Ehiptohanen diyà te nekedseselekawà he menge nasyun.

²⁴Edteǥuan ku te zesen is menge vekelawan te hadì te Babilonia ne ebpeǥewezan ku kandin is ispada ku. Piru edlepuen ku mulà is menge vekelawan te hadì te Ehipto, ne ebpekezag-es sikandin is pelien he edserupatey en diyà te etuvangan te hadì te Babilonia.

²⁵Edteǥuan ku te zesen is menge vekelawan te hadì te Babilonia. Piru is menge vekelawan te hadì te Ehipto egkeinutil mulà. Emun ibpeǥewezan ku en is ispada ku te hadì te Babilonia, wey egemiten din en heini te kedezaat te Ehipto, ne egketuenan te menge Ehiptohanen he iyan a Nengazen.

²⁶Ibpeyapat ku is menge Ehiptohanen diyà te nekedseselekawà he menge nasyun, ne egketuenan dan he iyan a Nengazen.”