1मिनु कोव़ङुनु, मेको करूब आन पिया आन तारी ङा बाक्तीके आ इर नीर माइश्शो हीरा खोदेंशो बाक्त। मेको ठेयब नित्तीक का खोदेंशो बाक्त।
2मिनु परमप्रभु यावेमी मेको सुती के वा फेक्शो मुर कली “करूब आन दी गे बाक्शो गुगील आन दातेम लावो। मिनु मेको करूब आन दातेम बाक्शो मी आ कोइला हुइश्शा, सहर आन तार फ्रावो” दे माइक्तु। मिनु आं कोव़ना कोव़न, मेको आगा ओव़त। इजीकीएल ९:२; प्रकाश ८:५
3मिनु मेको मुर आगा ओव़मेनु, करूब परमप्रभु यावे आ खिं आ दक्खिन गे बाक्तेक्म। मिनु गोस्स काम परमप्रभु यावे आ खिं ङा आगा ङा लाङगा ब्रीत।
4मिनु परमप्रभु यावे आ छेङछेङ करूब आन रे परमप्रभु यावे आ खिं आ लाप्चो गे लत। मिनु गोस्सुम खिं ब्रीत। मिनु आ लाङगा परमप्रभु यावे आ छेङछेङ ङा हाम्सोम ब्रीत। इजीकीएल १:२८; प्रस्थान ४०:३४; यसैया ६:४
5मेको करूब आन फ्रां आन रेयके लाङगा सम्म नेंसी बाक्त। मेको परमप्रभु यावे ब्वाक्शो खोदेंशो पा नेंसी बाक्त।
6मिनु परमप्रभु यावेमी मेको सुती के वा फेक्शो मुर कली “मेको गुगील आन दातेम लशा करूब आन दाते ङा मी पितो” दे अरेवानु, मेको गुगील आ नेक्था राप्त।
7मिनु करूब काम आ गुइ करूब आन बाक्तीक ङा मी गे दिंताक्व। मिनु मेकोमी मी आ कोइला हुइश्शा, मेको सुती के वा फेक्सीशो मुर आ गुइम कुर पाप्तु। मिनु मेको मी कुरशा लाङगा ग्रूत।
8मेको करूब आन फ्रां आगाम मुर आन गुइ खोदेंशो तांइसाक्व।
9मिनु कोव़ङुनु, मेकेर ४ ओटा गुगील करूब आन नेक्था बाक्तेक्म। करूब का आ नेक्था गुगील का बाक्त। मेको गुगीलपुकी टल्केशो पित मनी माइश्शो हीरा खोदेंशो बाक्तेक्म।
10मिनु मेको गुगील नेल्ल खाल का ङा बाक्तेक्म। गुगील का आगाम अर्को गुगील बाक्शो खोदेंशो तांइसाक्म।
11मेकोपुकी गाक्मानु, तेइ महिरथु ग्येत्थ गे उत्तर, दक्खिन, पूर्ब नु पच्छिम गे गाक्बाक्तेक्म। मेको ङोंइती ङा गुगील ते ते लमे, अर्को यो मेक मेक गे लाइबाक्तेक्म।
12मेको आन रां नेल्ल, मेको आन ची, मेको आन गुइ, फ्रां नु मेको ४ ओटा करूब आन गुगील नेल्ल मिक्ची मिक्च पाइश्शो बाक्तेक्म।
13गो मेको आन कली “गेय पाइब गुगील” देंशो नेंता।
14मेको करूब नेल्ल आन के ४ ओटा कुल बाक्तेक्म। ङोंइती ङा कुल करूब के, मेको आ नोले ङा कुल मुर के, मेको आ नोले ङा कुल गुप्स के नु नेल्ल क्येङा नोले ङा कुल ककाकुली के खोदेंशो बाक्तेक्म। इजीकीएल १:१०
15मिनु मेको करूबपुकी इर गे लाम्तेक्म। मेको ङोंइती ङा सोक्त पाइश्शोपुकी बाक्तेक्म। ङोंइती गो मेको आन कली केबार खोला आ नेक्था तशो नङमी। इजीकीएल १:१
16मिनु मेको करूब गाक्मानु, मेको गुगील आन नेक्था गाक्बाक्तेक्म। करूब इर लचा कली आन फ्रां ग्येत्थ क्युक्गमेनु, मेको आन नेक्था बाक्शो गुगील महिरथु, गाक्बाक्तेक्म। इजीकीएल १:१९
17मिनु मेको करूब दिक्मानु, मेको गुगील यो दिक्बाक्तेक्म। मेको करूब इर गे बोक्मानु मेको गुगील यो मेको नु बोक्बाक्तेक्म। मारदे हना मेको सोक्त पाइश्शो आन सोक्त मेको गुगीलमीन बाक्त।
18मिनु परमप्रभु यावे आ छेङछेङ आ खिं ङा लाप्चो रे ग्रूशा, करूब आन तार गे दिक्त। इजीकीएल १:२८
19मिनु मेको करूबम आन आन फ्रां क्युक्तेक्म। मिनु आं ङोंइती खप रे इर गे लाम्तेक्म। मिनु मेको लमानु, मेको गुगील यो मेको नु इर गे लाम्तेक्म। मिनु मेकोपुकी परमप्रभु यावे आ खिं आ पूर्ब गे ङा लाप्चो आ नेक्था दिक्तेक्म। मिनु इस्राएल ङा परमप्रभु आ छेङछेङ मेको आन तार गे बाक्त।
20मेको केबार खोला आ नेक्था इस्राएली आन परमप्रभु आ आगाम बाक्शो आं तशो सोक्त पाइश्शो बाक्तेक्म। मिनु गो मेको करूब बाक्मा बाक्त, दे तुइक्ताक्ङ।
21मेको नेल्ल आन के ४ ओटा कुल नु ४ ओटा फ्रां बाक्तेक्म। मिनु मेको आन फ्रां आगाम मुर आन गुइ खोदेंशो बाक्तेक्म।
22मेको आन कुल केबार खोला आ नेक्था आं तशो सोक्त पाइश्शो आन कुल खोदेंशो बाक्तेक्म। मेकोपुकी तेइ लमानु, ङोंइती गे पा गाक्बाक्तेक्म।
